தமிழகக் குடும்ப வாழ்க்கை

குடும்பம் என்பதற்கு உறவு, ஒரு குடியிலுள்ளோர், வீடு என தமிழ் மொழியகராதி பொருள் கொள்ளுகிறது. வாழ்க்கை என்பதற்கு ஜீவிப்பு எனப் பொருள் கொள்ளலாம். குடும்ப வாழ்க்கை என்பதற்கு ஒரு வீட்டின் ஜீவிப்பு என்று நேரடியாகப் பொருள் கொள்வோம்.

நேற்றையக் குடும்ப வாழ்க்கை

சென்னைத் தொலைக்காட்சியில் 1992 தீபாவளி அன்று ஒரு பட்டிமண்டபம் ஒளிபரப்பப்பட்டது. அதன் தலைப்பு எது சிறப்பு? தனிக்குடும்பமா-கூட்டுக் குடும்பமா? என்பதாகும். நடுவர் கோ. சாரங்கபாணி வாதங்களைப் பரிசீலித்து விட்டுத் தனிக்குடும்பமே சிறந்தது அதுவே தேவையும் கூட என முடிவு சொன்னார். அடுத்த வார ’’எதிரொலியில்’’ (வாசகர் கடிதப்பகுதி ) வந்திருந்த, வாசிக்கப்பட்ட, 31 கடிதங்களும் இத்தலைப்பின் முடிவைப் பற்றி விமர்சனம் செய்திருந்தன, அனைத்துக் கடிதங்களும், தனிக்குடும்ப முடிவு தவறான முடிவு, கூட்டுக் குடும்பமே தமிழகத்தின் மரபு, அதுவே தேவை எனக் கூறியிருந்தன.நேற்றைய தமிழகத்தை, அதன் வரலாற்றைப் புரட்டிப் பார்க்கிற போது தனிக்குடும்பம் ஒரு சோதனை முயற்சிக்காக ஏற்று நடத்தப்படிருக்கின்றது என்பதைக் காணமுடிகின்றது. திருமணம் ஆனவர்கள் எவ்வாறு தன் வாழ்வை நடத்திக் கொள்கிறார்கள் என்பதனை அறிந்து கொள்ளும், சோதனை முயல்வாக தனிக் குடும்ப முயல்வு நிகழ்த்தப்பட்டிருக்கிறது. சங்க இலக்கியத் தலைவனும், தலைவியும், தனி குடும்ப வாழ்வில் இன்பங்கண்டனர் என்பது ஏற்றுக் கொள்ள வேண்டிய ஒன்றாகும். இதற்கான பல சான்றுகளை சங்க இலக்கியப் பாடல்கள் தருகின்றன. சங்க காலத்தில் ஒரு கணவனும், மனைவியும் இனிய வாழ்க்கை நடத்திக் கொண்டு வருகின்றனர். அவர்களைப் பார்ப்பதற்காக, தாயொருத்தி பகலெல்லாம் நடந்து வந்து மாலை நேரத்தில் இவர்களின் வீட்டிற்கு வருகின்றாள்.அப்போது அவள் கண்ட காட்சி, அவள் பிள்ளையின் வீட்டின் முன் ஒரு மலர்த்தோட்டம் இருந்தது. அங்கே ஒரு அகலமான மேடை, அம்மேடை அருகில், முல்லைக்கொடி அடர்ந்து படர்ந்து, மலர்களைச் சுமந்து கொண்டிருந்தது. அவ்வேளையில் பாணர் முல்லையாழில் முல்லை நிலத்து இன்னிசையை மீட்டிக் கொண்டிருந்தனர். கணவன் மேடையின் மேல் முகமலர்ச்சியுடன் அமர்ந்து, எதிரேயிருக்கும் தன் மகனை எடுத்துத் தன் தொடையின் மேலே அமர்த்தி, அக்குழந்தையின் இரு குழந்தை கைகளையும் பிடித்து, யாழின் இசைக்கு ஏற்பத் தாளம்கொட்டுமாறு செய்து மகிழ்ந்து கொண்டிருந்தான். வேறொரு புறத்திலே மனைவி முல்லை மலரைப் பறித்து அவற்றை மாலையாகத் தொடுத்துக் கொண்டிருந்தாள். பின்பு தான் தொடுத்த மாலை ஒன்றினைக் கணவன் மடிமேல் தாளம் கொட்டிக்கொண்டிருந்த சிறுவனுக்குச் சூட்டி, மற்றொன்றை, தனக்கும் சூட்டிக் கொண்டாள். கணவன் மனைவியின் அழகை அப்போது, பருகிக் கொண்டிருந்தான். அந்நேரத்தில் தாய் வீட்டிற்கு வர, இந்நிகழ்வையெல்லாம், தாய் கண்டு மகிழ்ந்தாள்(1).இதைப் போல பல பாடல்கள் சங்க இலக்கியத்தில் தனிக்குடும்ப நிலையை விளக்கிக் காட்டியுள்ளன. சங்க இலக்கியங்களைத் தொடர்ந்து வந்த இலக்கியங்களிலும் தனிக் குடும்ப வாழ்க்கை முறையைக் காணமுடிகிறது. கோவலனும் கண்ணகியும், மணம் முடித்த பின் ’’மனையறம் படுத்த காதை’’ வழியாக தனிக் குடும்பம் நடத்த முனைகின்றனர்(2). குடும்ப விளக்கில் பாரதிதாசனார், பெற்றோர்களை விடுத்த தனிக்குடும்பத்தினை தலைவன் நடத்தும் நிலையை ’’இனித்திட இனித்திடத்தான் நகைமுத்தன் எழில் அறம் நடத்துதற்கு தனியில்லம் கொண்டான்’’ என வெளிப்படுத்துகின்றார் (3).இத்தகைய சான்றுகளின் மூலம் தனிக் குடும்ப நிலை வழிவழியாகத் தமிழகத்தில் நடை பெற்றிருப்பதை அறியலாம். ஆனாலும் தனிக்குடும்ப வாழ்வில் சுற்றத்தாருக்கும், பெற்றோர்க்கும் உரிய தொடர்பு தரப் பெற்றிருந்தது என்பதும் ஏற்றுக் கொள்ளப்பட வேண்டிய ஒன்றுதான்.தமிழ் மரபில் களவு, கற்பு என்ற இரண்டு நிலைகள் உண்டு. களவென்பது காதல் வாழ்க்கை. கற்பு என்பது மணவாழ்க்கை. கற்பு வாழ்க்கையே குடும்ப வாழ்க்கை எனக் கொள்ளப்படுகின்றது.’’தலைவனும், தலைவியும் இவ்வுலகத்தில் ஒன்றாய்ப் பிணைந்து, சுற்றத்தாரோடும், மக்களோடும் கூடி இல்லறம் நிகழ்த்தும் பொழுது உலகத்தில் நுகர வேண்டிய நுகர்வுகளை எல்லாம் ஒவ்வொன்றாய் நுகர்ந்து அவை நிலையில்லாதன என அறிந்து தௌ¤வு பெற்று நிலையான வீட்டின்பத்தை விரும்பி வாழ்தல் தான் குடும்ப வாழ்வின் பயன்’’ என்கிறார்’’ தொல்காப்பியர்(4). வையத்துள் வாழ்வாங்கு வாழும் இம்முறையே குடும்ப வாழ்வின் சிறப்பாகும்.இல்வாழ்வில் தலைவியும் தலைவனும், உடல் உயிராகவும், உயிர்- உடல் ஆகவும் வாழ்ந்திருக்கின்றனர். இன்பம் நுகர்வதற்கும், இல்லறக் கடன்களைச் செய்வதற்கும், இருவராக பிரிந்து நின்றே செயலாற்ற வேண்டியிருப்பதால் இவ்வுலகில், ஆணும் பெண்ணும் இருவராய்ப் பிறக்கின்றனர். கடன்களைப் பொறுப்புடன் செய்யும் போது இடையிடையே ஆணும் பெண்ணும் பிரிதல் வேண்டியிருக்கிறது. தலைவனும் தலைவியும் அப்பிரிவை பூ இடைப்பட்டலும், ஆண்டு கழிந்ததைப்போல் உணரும் மகன்றில் பறவையின் பிரிவைப் போலக் கருதியுள்ளனர்(5). ஒருவர் பிரிய நேரின் மற்றவர் இறக்கக் கருதியுள்ளனர். உயிரின்றி உடல் இயங்கல் இல்லை போல, தலைவன் தலைவியரின் இல்லற வாழ்வு இணைந்தே நடைபெற்றிருக்கின்றது.குடும்பத்தில் தலைவியின் பங்கினைக் குறுந்தொகைப் பாடலொன்று அழகாக விளக்குகின்றது. ஒரு இலக்கியக் குடும்பம் அது. கணவனுக்கு முதன்முதலாக, தானே சமைத்து உணவிட மனைவி விரும்புகிறாள். தயிரைப் பிசைந்து மோர்க்குழம்பு ஆக்குகிறாள். தயிர் கட்டி பட்டிருக்கின்றது. அதனைத் தன் காந்தள் விரல் நோகத் தலைவி பிசைகின்றாள். பிசைந்த போது விரல்களின் இடுக்கில் தயிர்த்துளிகள் ஒட்டிக் கொள்கின்றன. பின் அதனைத் தக்கவாறு பாகம் செய்ய அடுப்பில் ஏற்றுகிறாள். அப்போது ஆடை சிறிது நெகிழ அதனையும் தன் கையால் எடுத்துச் சொருகிக் கொள்கிறாள். இப்போது ஆடையில் தயிர் துளிகள் பின் தாளிப்பதற்காக பாகங்களை எடுத்து அடுப்பில் வைக்கிறாள். கண்நோக புகை படிய, பார்த்துப் பாரத்துத் தாளிக்கின்றாள். ஒரு வழியாய் மோர்க்குழம்பு வைத்துவிட்டுத் தன் கணவனுக்கு உணவிடுகிறாள். கணவன் அதனை இனிதாய் இருக்கின்றது என உண்கின்றானாம். இந்தப் பெருமைப் பேச்சு, அவளின் துன்பத்தையெல்லாம் கரைத்து, அவளை நாணிப் போகச் செய்து விடுகிறது(6). அப்படிப்பட்ட இலக்கிய வாழ்வை நேற்றை தமிழகத்தோர் வாழ்ந்திருக்கிறார்கள்.குடும்பத்தின் பயன்இவ்வளவு பெருமை பெற்ற குடும்ப வாழ்விற்கு பயன் என்ன என்ற வினாவிற்கு விடை - மக்கட் பேறாகும். ’’குறுகக் குறுக நடந்து சிறிய கையினை நீட்டி, உணவுக் கலத்தில் கிடந்ததைத் தரையிலே இட்டும். கீழே கொட்டியும், தோண்டியும், வாயிற் கவ்வியும், கையால் துழாவியும், நெய்யுடைச் சோற்றை - உடம்பில் சிதறியும் எனப் பல விதங்களில் உணவினை உண்ணும் மக்களைப் பெறாதவரின் வாழ்க்கை, பயனில்லாத வாழ்க்கை’’(7) எனப் புறநானூறு பேசுகிறது. மகவின் சிறுகை அளாவிய கூழ்போல வேறொரு அமுதம் உலகில் இல்லை என்கிறது திருக்குறள்.குடும்பத்தின் பயன் என வருகிறபோது, மக்கட் பேறுதான் அதில் முதலிடம் வகிக்கின்றது. தாய் மகனைப் பெறலும், தந்தை சான்றோனாக அம்மகனை ஆக்கலும் கடனாகக் கொண்டு சங்கத் தமிழர் வாழ்ந்திருக்கின்றனர்(8). குடும்பத்தின் கடமைகள்சங்க காலத் தமிழ்க் குடும்பங்களுக்கு, கடமை என்ற ஒன்று இருந்திருக்கிறது. இல்லறத்தான் என்பான் இயல்புடைய மூவர்க்குத் துணையாக வாழ்தல் வேண்டும்(9). அதுவே அவனின் கடமையாகும். துறவறத்தோர், விருந்தினர், சுற்றத்தார் என்ற மூவர்க்கும் துணையாக இல்வாழ்வினர் அமைய வேண்டும்.விருந்தினர் என்பார், முன்பின் அறியாதவராய்ப் பசித்து வரும் இல்லற நிலையினர். நற்றொழில் காரணமாக இடம் பெயரக் கருதும்போது, தமக்கு வேண்டிய உணவு கருதி முன்பின் அறியாதவரின் வீட்டிற்கு விருந்தினராக வருபவர்கள் விருந்தினர்கள். இவர்களை உபசரித்தலை சங்ககாலக் குடும்பத்தினர் கடமையாகக் கொண்டனர்.தலைவன் ஒருவன் தான் சந்தித்த தலைவியிடம் ஒரு உறுதி செய்து தருகிறான். தலைவியே உன்னை நான் திருமணம் செய்து கொண்டு இல்லறம் நடத்தி, வரும் விருந்தினருக்கு உணவளித்து அவர்கள் உண்ட மிச்சிலை நான் உனக்களித்து உண்பேன் என்னை ஏற்பதிலே உனக்கு ஒரு குறையும் இருக்காது(10)’’ என உறுதி கூறுகிறான். எனவே நேற்றைய தமிழகத்தில் விருந்து புரத்தல் சிறப்பாகக் கருதப்பட்டுள்ளது என அறியலாம். ’’செல்விருந்து பார்த்து வருவிருந்து நோக்கிய’’ (11) அக்கால நிலையை வள்ளுவரும் குறிப்பிடுகிறார். சுற்றமெனப்படுவர் - உடம்பின் தொடர்பாலும், பிறவற்றாலும், சூழ்ந்து நிற்பவர் ஆவர். இவரன்றி இடத்தின் தொடர்பாலும், அலுவல் தொடர்பாலும் சுற்றம் ஏற்படலாம். துணையற்ற பெண்டீர்க்கும், ஏழைச் சிறுவர், சிறுமியர்க்கும், உண்டி உணவு கொடுத்தல்- தலைவன் தலைவியர் வாழ்வில் ஒரு கடனாகக் கருதப்பட்டது. ஒளவையாரை அதியமான் புரந்ததும், பாரி, கபிலர் முதலியவரைப் புரந்ததும் இப்பாற்பட்டதாகும். துறந்தோர் என்போர் அனைத்தையும் துறந்தவராவர். எனவே அவர்களின் வாழ்வும் இல்லற வாழ்வில் திகழ்வோரின் நிலையை எண்ணியே வாழ வேண்டிய அவசியம் இருந்தது. எனவே இவை மூன்றும் சங்ககால இல்லறத்தார் கடமை என உணரலாம்.பரத்தைஇல்லற வாழ்வு நடைபெற்றுக் கொண்டிருக்கையில், தலைவன் தலைவியை விட்டுப் பிரியக் கூடிய சூழல் ஏற்படலாம். இப்பிரிவிற்கு ஆறு காரணங்களை இலக்கண ஆசிரியர்கள் குறிப்பிடுகின்றார்கள். ’’பரத்தை, ஓதல், காவல், தூது, துணை, பொருள் வயிற்பிரிவு’’ என பிரிவு அறுவகைப்படும். இதில் பரத்தை மட்டுமே- தலைவனின் மாறுபட்ட ஒழுக்கம் கருதிய பிரிவாகும். மற்ற ஐந்தும் கடமை கருதியதாகும். பரத்தைபால் பிரிதல் என்றே இதனைத் தனியாக வகுத்து அதற்குரிய காலமும் வரையறை செய்யப்பட்டுள்ளது. இவ்வொழுக்கம் மன்னர் முதல் அனைவருக்கும் ஏற்கப்பட்டிருந்தது.பேகன் என்ற மன்னன், தன் மனைவியை விடுத்து பரத்தை பால் சார்ந்திருந்தான். அதனை இடித்துரைத்து அரிசில்கிழார் போன்ற புலவர்கள், அவனை திருந்திய வாழ்விற்கு அழைத்து வருகின்றனர்(12) பேகன் பரத்தை ஒழுக்கம் கொள்ளினும் அவனின் மனைவி கண்ணகி, அவனையே நினைத்து வாழ்ந்திருத்தலைச் சிறப்பு எனச் சங்க கால புலவர் கருதினர். ஆடவன் மாறினும் மனையுறை மகளிர்க்கு (13) ஆடவரே உயிர் என வாழ்தலே சிறப்பாக, அக்கால சமுதாயம் கருதியிருக்கிறது.காப்பிய காலத்தில் இற்பரத்தையைச் சார்தல் என்ற நிலை வளர்வு பெற்று அதுவே கதையம்சமாகத் திகழ்ந்திருப்பதை- சிலப்பதிகாரம் காட்டுகின்றது. கோவலன் மாதவியின்பால் ஏற்பட்ட கலையன்பில் உள்ளங்கொண்டு அவளைச் சார்கின்றான். இருப்பினும் கண்ணகி அவனையே நினைத்து வாழ்ந்து, இறுதியில் அவனின் உயர்விற்காகப் போராடிய திறம் சிறப்பாகும்.சிலம்பின் ஒரு பகுதியில் தேவந்தி கணவனால் கைவிடப்பட்ட கண்ணகியைப் பார்த்துச் ’’சோமகுண்டம், சூரியகுண்டம் மூழ்கின் உன் கணவன் கிடைப்பான்’’ எனக் கூற (14) ’பீடன்று’ எனக் கண்ணகி ஒதுக்குகிறாள். கண்ணகியின் இந்நிலையைக் காணுகின்ற போது, கணவன் இன்பமே, தன் இன்பம், கணவன் எங்கு இன்பம் காணுகின்றானோ அங்கே காணட்டும். எம் வணங்குதலால் அவன் இங்குவரின் இன்பம் குறையலாம் எனக் கருதி கண்ணகி அப்படிச் சொல்லியிருக்கலாம் என உணர முடிகின்றது.பெரிய புராணத்தில், இந்நிலையினின்று சற்று மேம்பட நிலையைக் காணமுடிகின்றது. திருநீலகண்டர் என்ற நாயன்மார் சிற்றின்ப மிகுதியால் பரத்தையிடம் சென்று விட்டு வீட்டிற்கு வருகின்றார். வந்ததும் அவரின் நிலையறிந்த மனைவி ’’என்னைத் தீண்டுவீராயின் திருநீலகண்டம்’’ (15) எனச் சொல்லி உடல் இன்பத்தினை அவரிடமிருந்து பெறுதலை வெறுத்ததோடு உள்ள அன்போடு மட்டும் வாழ்ந்தார். பரத்தை ஒழுக்கம் கடிந்த பெண்ணாக இவரைச் சேக்கிழார் படைத்துள்ளார். எனவே ஒரு காலத்தில் பரத்தை ஒழுக்கம் மறைவான ஒழுக்கம் எனக் கருதப்பட்டிருப்பினும் அதனை ஏற்றுக் கொண்ட மனைவியர், பின்பு அவ்வொழுக்கத்தினை கடிந்தவராக வளர்ந்து வந்துள்ளமையை அறிய முடிகின்றது.வீரம்ஒருபுறம் சுக வாழ்வில் இன்புற்றிருந்த தமிழர்கள், மறுபுறம் வீரவாழ்வில் வெற்றியையே துணையாகக் கொண்டு வாழ்ந்துள்ளனர். ’’உன் மகன் எங்குள்ளான்’’என ஒரு சங்க இலக்கியத் தாயிடம் கேட்டால் அவள் சொல்கிறாள்- ’’என்மகன் எங்குள்ளான் என யான் அறியேன். ஆனால் புலிவந்து சற்று நேரம் படுத்துக் கொண்டிருந்து பின் வெளிப்பட்டுப் போன மலைக்குகை போல அவனைப் பெற்றெடுத்த வயிறு இதுவாகும். அவன் பெரும்பாலும் போர்க் களத்தில் காண்பபடுவான்’’- எனக் கூறுகிறாள்(160).அந்த அளவிற்கு வீரர்கள் வாழ்ந்த உலகாக, அக்காலத்தில் தமிழகம் திகழ்ந்திருக்கின்றது. மற்றொரு தாய், போருக்குச் செல்ல யாரும் இல்லாத போது தன் ஒரே மகனை, பாலகனை அழைத்து அவன் குடுமிக்கு, எண்ணெய் தடவி, கையில் வேலைக் கொடுத்து போர் முரசு கேட்டதும் அனுப்பி வைத்தாளாம்(16. அ). குழவி இருப்பினும், ஊன் தடி பிறப்பினும், அதனை வாளினால் அறுத்துப் புதைத்த வீரபரம்பரையினைச் சார்ந்தவர்கள் தமிழர்கள் (17). முல்லை நிலத்தில் நடந்த அடலேறு தழுவலும் வீரத்தின் அடிப்படையே ஆகும். இதன் வழி திருமணங்களும் நிகழ்ந்தன. கொல்லேற்றுக் கோடஞ்சுவானை மறுமையிலும் எண்ணாள் முல்லை நிலப்பெண். இதனுடைய வளர்ச்சி பின்னாளில் போட்டிகளின் வாயிலாகப் பெண்களை மணத்தல் என்பதாக நிகழ்ந்தது. சீவக சிந்தாமணியில் சீவகனுக்கு வைக்கப்படும் போட்டிகளும், பாண்டியன் பரிசில் ஏற்படும் அன்னத்திற்கான - பேழை- போட்டியும், இவ்வகை நிகழ்வின் அடிப்படையே எனலாம். எனவே சங்க இலக்கியகாலம், இல்வாழ்வை, அன்பும், அறனும், வீரமும் செறிந்ததாகக் கொண்டு வாழ்ந்த காலம் என்பதில் ஐயமில்லை.பக்தி இலக்கிய காலத்தில், குடும்ப வாழ்வில் சில மாற்றங்கள் ஏற்பட்டன. எல்லாமே இறைவன் எனக் கருதப்பட்டது. சுற்றமும், விருந்தும் அவனே. அதனால் தான் வணங்கும் இறைவனை அப்பனாய், அம்மையாய் சேயனாய், அன்புடைய மாமனாய், மாமியாய், ஓப்புடைய மாதருமாய், சுற்றமுமாய், எல்லாமாய் நாவுக்கரசர் கண்டார்(18). ’’அம்மையே அப்பா, ஒப்பிலா மணியே, பால் நினைந்தூட்டும் தாயினும் சாலப்பரிந்து’’ என்று மாணிக்கவாசகரும் பாடுகின்றார்.இதற்கெல்லாம் மகுடம் வைத்தாற் போல் ஆண்டாள் இறைவனையே, தன் கணவனாகப் பாவித்து அவனன்றி வேறு மானிடர் எவர்க்கேனும், என் உடல் பேச்சுப்படில் உயிர் வாழேன் என்று கூறுகிறாள்(19). சங்ககால சமுதாயத்தில் கணவனும் மனைவியும் உயிரும் உடலுமாய் ஒன்றியிருந்த வாழ்க்கை இக்காலக் கட்டத்தில் கடவுள்- மனிதத் தொடர்பு என்ற நிலையில் உயர்த்திப் பேசப்பட்டுள்ளது. இருப்பினும் இல்லற வாழ்விற்கு எக்குறையும் ஏற்படவில்லை. பெரிய புராணத்து மெய்யடியார்கள், பலர் இல்லற நெறியில் நின்று இறைவனைக் கண்டுள்ளனர். இல்லறக் கடமையான, துறவறத்தாரைக் காத்தல், விருந்து சுற்றம் காத்தல் போன்றவற்றை குறைவறச் செய்திருக்கிறலீர்கள் என்பது உண்மை. பாரதியின் கண்ணன் பாடல்களும், இதன் வழிவந்தனவே எனலாம். தோழனாக , தாயாக , தந்தையாக , சேவகனாக , அரசனாக, சீடனாக, சற்குருவாக, குழந்தையாக, காதலன் - காதலியாக, பாங்கியாக, ஆண்டானாக, குல தெய்வமாக, விளையாட்டுப் பிள்ளையாகப் பாரதி- கண்ணனைப் பாடியதும் இதன் வளர்நிலை என்றே கருதலாம். பக்தி இலக்கிய கால கட்டத்திற்கு பின் எழுந்த 96 வகை சிற்றிலக்கியங்களின் முதல் தலைமுறை நூல்கள் கடவுளைப் பாடுபொருளாக்கின. அடுத்த தலைமுறைச் சிற்றிலக்கியங்கள் மனிதர்களை, மன்னர்களைப் பாடின. கடவுள் தமிழர்களின் வாழ்வில் இவ்வாறு நீங்கா நிலைத்த இடம் பெறுகிறார் என்றாலும் இல்லற நெறியின் வலுவூட்டலாகவே கடவுள் படைப்பும் கடவுள் இலக்கியப் படைப்புகளும் அமைந்தன என்பது கவனிக்கத் தக்கது.19, 20நூற்றாண்டுகளில் எழுந்த விடுதலைப் போராட்ட உணர்வு , மற்றும் மேலை நாட்டுத் தாக்கம் போன்றன தமிழிலக்கியத்தை புதிய வடிவ நிலைக்குக் கொண்டு போயின. இலக்கியக் களத்திற்கு புதிய பாடு பொருள்கள் கிடைத்தன. சமுதாய நலனோடு இலக்கியங்கள் அணுகப்பட்டன. எனினும் குடும்ப வாழ்வில் அதே அளவு அன்பு, பற்று, பாசங்கள் பின்பற்றப்பட்டன.தாயன்பு குறித்துப் பாரதிதாசன் அற்புதமான காட்சி ஒன்றைக் காட்டுகிறார். ஒரு தாய் தன் குழந்தையோடு கட்டிலில் படுத்திருக்கின்றா¦ள். சிறிதே அவள் புரண்டு படுத்தாலும், தாயின் உடல் அக்குழந்தையின் மீது படிந்து விடும். இதை அறிந்த அந்தத் தாய் தன் வலக்கையினைத் தலையணையின் மீதும் இடக்கையினை கூடாரம் போல் குழந்தையின்மீது பாடமலும் வைத்துப் படுத்திருந்தாள். இவளை எழுப்ப அவளின் கணவன் நினைக்கின்றான். பக்கதில் கிடந்த பூச்செண்டிலிருந்து ஒரு மலரை எடுத்து அவளின் திங்கள் போன்ற முகம் மீது இட்டான். எவ்வித அசைவும் அவளிடம் ஏற்படவில்லை. ஒரு மலரிதழை எடுத்துக் குழந்தையின் மீது இட்டான். இப்போது அந்தத் தாயினது கரம் இதழ் விழுந்த இடத்தைத் துடைத்து விட்டுச் சென்றது (20). நேற்று வரை, அன்பும், அறமும் உடையவர்களாக வாழ்ந்த தமிழ் மக்களின் நிலை இன்று எப்படியுள்ளது என இனி ஆய்வோம்.

இன்றைய தமிழகம்

சங்ககாலத்தில் பின்பற்றப்பட்ட மூவகைக் கடமைகளும், இக்காலத் தமிழர்களாலும் ஏற்றுக் கொண்டு நடைமுறைப் படுத்தப்படுகின்றன. ஆனால் அன்பு , வீரம் என்ற இரு தலையாய கொள்கைகளும் மாறுபட்டு அழிந்து போகுமளவிற்கு இன்றைய தமிழ்ச் சமுதாயத்தின் குடும்ப நிலை அமைந்து வருகின்றது.திருமணம் என்பது அன்பின் வெளிப்பாடாக, காதலின் முடிவாக, குடும்ப வாழ்வின் வாயிலாக நேற்று வரை கருதப்பட்டது. ஆனால் இன்றைய திருமணங்கள் பொருளாசை மிக்கதாக, வாழ்வின் முடிவினைத் தரும் முடிவு நிலையாகக் கூட மாறிவிட்டன.இன்றைய பெரும்பாலான திருமணங்கள், பொருளாதாரக் காரணங்கள் கொண்டே ஆய்ந்து நிச்சயிக்கப் படுகின்றன. வரதட்சணை என்ற பெயரில் பொருளாதாரக் கொடுமைகள் நடக்க திருமணங்கள் வழி வகை செய்கின்றன. வரன்- தட்சணை- பெண்ணை மணந்து கொள்ளப்போகும் வரனுக்கு பெண் வீட்டார் தட்சணை கொடுக்க வேண்டும். இவ்வொப்பந்தமே இரு மனங்களின் வாழ்வினை நிச்சயிக்கின்றது. திருமணங்கள் அன்புச் சொர்க்கத்தில் நிச்சயிக்கப்பட்ட காலம் மாறி ரொக்கத்தில் நிச்சயிக்கப்படுகிற காலம் இன்று தமிழகத்தில் நிகழ்கின்றது. ’’எனக்கு இராமன் வேண்டாம் தூக்கி கொண்டு போகும் இராவணன் கிடைத்தால் போதும்’’ என்று ஏங்குகின்ற கன்னி கழியாத பெண்கள் பலர் தமிழகத்தில் உள்ளனர்.வரதட்கணையைத் தருவதாகச் சொல்லிவிட்டு சில தந்தையர் பெண்களைத் திருமணம் செய்து கொடுத்து விட்டு பின்னால் கொடுக்க முடியாது போனபோது, அவர்களின் மகள் மாப்பிள்ளை வீட்டாராலேயே கொலை செய்யப்படும் கொடுமையான நிகழ்வுகளும் தமிழகத்தில் இன்று தினசரிகளின் செய்திகளாகிவிட்டன. ஸ்டவ் வெடிப்புதான் வரதட்சணைக் கொடுமையின் இறுதி ஆயுதம். ஒரு புதுக் கவிஞன் பாடினான் மருமகள் ஏற்றுகிற ஸ்டவ் மட்டும் வெடிக்கிறதே மாமியார் ஏற்றும் ஸ்டவ் வெடிப்பதில்லையோ என்ற அவனின் வரிகள், வரதட்சணைக் கொடுமையை -படம் பிடிப்பதாகும். குடும்ப வாழ்வின் இன்பமான அன்பு நிலை அடித்தளத்தை மறந்து விட்டு இன்றைய தமிழகம் வாழ்கின்றது. அன்பை விலை பொருளாக்கிக் விலை கூவும் நிலை தமிழகக் குடும்ப அவல நிலையின் ஒரு கொடுமையான பகுதியாகும். வரதட்சணைக் கொடுமையினின்று வீறு பெற்று எழுந்த பெண்களும் உண்டு. அதனால் சாம்பலாகிப் போனவர்களும் உண்டு.மக்கட்பேறு எவ்வளவு இனிமை எனக் கருதப்பட்டதோ அவ்வளவிற்கும் இழிவானதாக மக்கட் பேற்றினை ( அதுவும் பெண் மக்கட் பேற்றினை ) கருதுகிற நிலையை இன்றைய தமிழகம் சந்தித்துக் கொண்டிருக்கின்றது. பெண் குழந்தைகளைச் சாகடிக்கும் கொடுமை, தமிழகத்தின் உட்பகுதிகளில் நடைபெறுகின்றது. பிறந்த பெண் குழந்தையின் வாயில் நெல்லைப் போட்டுவிட, அது மூச்சுத் திணறி இறந்து படுகிறது. இப்படி ஆயிரம், ஆயிரம் குழந்தைகள் இந்நிலையைச் சந்தித்து மண்ணாய்ப் போயுள்ளன. இவைகளைத் தடுக்க தமிழக அரசு, இப்போது ஒரு புது முடிவை எடுத்தது. ஒவ்வொரு ஊரிலும் தொட்டில் வைக்கப்பட்டது. இதற்கு அரசாங்கத் தொட்டில் என்று பெயர். இதனுள் பெண் குழந்தைகளை வளர்க்க முடியாத பெற்றோர்கள் குழந்தையை இட்டு விடலாம். அக்குழந்தைகளை வளர்க்கும் பொறுப்பினை அரசாங்கமும் சில பொது நிறுவனங்களும் ஏற்றுள்ளன. இது எந்த அளவிற்கு நடைமுறைக்குச் சரியாகும் என்பது போக போகத்தான் தெரியும். இதைப் பிரதிபலிக்கும் வகையில் ஒரு புதுக் கவிஞன் பாடினான். தொட்டிலில் போடப்பட்ட குழந்தை ஒன்று இரண்டானது. மூன்று நான்கு நூறானது. ஆனால் இதை கவனிக்கும் ஆயா மட்டும் ஒருவரே, குழந்தையின் அழுகைக்குள் ஆயாவின் தாலாட்டு மறைந்து போனது என்று(21).பரத்தை இன்றுஅடுத்து இன்றைய நிலையில் பரத்தையர்- ஓழுக்கம் பற்றி ஆராய்வோம். இன்றைய நிலையில் தமிழகத்தில் பரத்தை ஒழுக்கம் என்பது கேவலமான ஒழுக்கமாகக் கருதப்படுகின்றது. பெரும்பாலான ஆண்கள் இவ்வொழுக்கத்தில் பெரும்பாலும் ஈடுபடுவதில்லை. அவ்வாறு ஈடுபட்டால் எந்தப் பெண்ணும் கண்ணகி போல் சாந்தமாக இருப்பதில்லை, அவள் அவனைப் பல்வேறு முறைகளில் தண்டிக்கின்றாள்.இது ஒரு புறம் இருக்க, பம்பாய் சிவப்பு விளக்குப் பகுதிகளைப் பற்றிச் சற்று முந்தைய காலத்தில் ஒரு செய்தி பேசப்பட்டது. அங்கு உள்ள பரத்தையரில் பாதிக்கு மேல் தமிழ்ப் பெண்கள் என்பது கணக்கிடப்பட்டது. பெரும்பாலான தமிழ்ப் பெண்கள் ஏமாற்றப்பட்டு அங்கு கொண்டு செல்லப்பட்டுள்ளார்கள். இதைத் தடுக்க தமிழக அரசு ஒரு எக்ஸ்பிரஸ் திட்டத்தை அறிவித்தும் எவ்வித பலனுமில்லை.குடும்ப நிலையைப் பொறுத்த வரையில், இவ்வொழுக்கம் களையப் பட்டிருப்பினும், திருமணமாகாத, குடும்ப நிலை சாராத பெரும்பாலான இளைய சமுதாயம், இதனை இன்ப நிலைக்காக ஏற்றுக் கொண்டுள்ளது என்பது மறுக்க முடியாததாகும். இதன் விபரீதத்தை உணர்த்தும் அவர்கள் ஈடுபடுவது முரண்பட்ட போக்குதான். எனவே இன்றைய தமிழகம் அன்பு வாழ்வினை மறந்து போலி அன்போடு வாழ்கின்றது என்பது தௌ¤வு.

நாளைய தமிழகம்

தமிழகத்தின் எதிர்கால நினைப்பினை நினைக்கும் போது ஒரு மகிழ்வு ஏற்படத் தான் செய்கின்றது. நாளையாவது விடியுமா என்ற நிலையில் வாழ்ந்து கொண்டிருக்கும், பம்பாய், இலங்கை, தமிழகத் தமிழர்களின் குடும்ப நிலை நாளை எப்படியிருக்கும் என்று சிந்தித்துப் பார்க்கலாம். இதோ ஒரு கற்ப்னை விடியல்.இந்த ஆய்வை எழுத்தாளர் சுஜாதா ’’என் இனிய இயந்திரா’’ என்ற நாவலின் மூலம் சிந்தித்துப் பார்க்கிறார். ’’பல்வேறு கட்டுப்பாடுகளுக்கிடையே வாழும் சமுதாயம், பெயர் இரண்டெழுத்தில் இருக்க வேண்டும். குழந்தையை கூட கேட்டுதான் பெற வேண்டும் என்ற நியதி, இவைகளுக்குத் தலைவனான ஜீவா என்ற சர்வாதிகாரி, 50 வயதுக்குப் பின் முதியவர்களுக்குக் கட்டாய சாவு ’’ என பல முரண்பட்ட நிலைகளை அந்நாவல் முன் வைத்திருக்கிறது.இதைப்போல ஒரு கட்டாய வாழ்க்கைக்கு தமிழகம் தள்ளப்பட்டுவிடுமா இயந்திரவாழ்வு அங்கீகரிக்கப்படுமா ஓரளவு இப்போது ஒட்டிக்கொண்டிருக்கும் அன்பெனும் தத்துவமும் அழிபட்டு விடுமா எது போனாலும், தமிழனின் விருந்தோம்பல் பண்பும், சுற்றம் துறவறம் போற்றும் பண்பும் மாறலீதுங மாறக் கூடாது. இவை தமிழனின் தனித்த பண்புகளாம்.

----------------------------------------------------------------------------------------------குறிப்புகள்1. பாணர் முல்லை பாடச் சுடரிழைவாணு¦த லரிவை முல்லை மலைய இனிதிருந் தனனே நெடுந்தகை துளிதீர் கொள்கைத் தன்புதல்வனொடு பொலிந்தே. ஐங்- 4082. சிலம்பு ,மனையறம் படுத்த காதை3. இனித்திட இனித்திடத் தான்எழில் நகை முத்தினோடுதனித்தறம் நடாத்துதற்குத்தனியில்லம் கொண்டான்.-பாரதிதாசன் குடும்ப விளக்கு. ப. 50(3, 4, 5)4. ’’காமஞ்¢ சான்ற கடைகோட் காலைஏமஞ்சான்ற மக்களொடு துவன்றிஅறம்புரி சுற்றமொடு கிழவனும் கிழத்தியும்சிறந்தது பயிற்றல் இறந்ததன் பயனே’’தொல் கற்பியல்-515. பூவிடைப்படினும் யாண்டு கழிந்தன்னநீருரை மகன்றிற் புணர்ச்சி போலப்பிரிதரி தாகிய தண்டாக் காமமொடுஉடனுயிர்போக தில்ல கடனறிந்துஇருவேமாகிய உலகத்தொருவே மாகிய புன்மைநா முயற்கே. -குறுந்தொகை6. முளிதயிர் பிசைந்த காந்தண் மெல்விரல்கழுவுறு கலிங்கம் கழாஅ துடீஇத்குவளையுண் கண் குய்ப்புகை கமழத்தான்றுழந் தட்ட தீம்புளிப் பாகர்இனிதெனக் கணவ னுண்டலின்நுண்ணிதின் மகிழ்ந்தன்றெண்ணுதன் முகனே- குறுந் 1677. படைப்புபல படைத்து பலரோடு உண்ணும் உடைப்பெரும்¢ செல்வராயினுமிடைபடகுறுகுறு நடந்து சிறுகை நீட்டிஇட்டுந் தொட்டும் கவ்வியுந் துழந்தும்நெய்யுடை யடிசில் மெய்பட விதிர்த்தும் மயக்குறு மக்களை யில்லோர்க்குப் பயக்குரை யில்லைத் தாம் வாழுநாளே- புறம் 188.8. ஈன்றுபுறந்தருதல் எந்தலைக்கடனே சான்றோன் ஆக்குதல் தந்தைக்குக் கடனே -புறம் 3129. குறள்-4110. விருந்து உண்டு எஞ்¢சிய மிச்சில் பெருந்தகை நின்னோடு உண்டலும்புரைவது -குறிஞ்சிப்பாட்டு -வரி 20611. குறள் -8612. புறநாநூறு- 14613. குறுந்தொகை 13514. சிலம்பு கனாத்திறம் உரைத்த காதை15. பெரிய புராணம். திருநீலகண்டர் புராணம் 16. புறநானூறு-8616. அ. புறநானூறு- 27917. புறநாநூறு-7418. அப்பர் தேவாரம்19. நாச்சியார் திருமொழி20. பாரதிதாசன் குடும்ப விளக்கு (3, 4, 5 மக்கட்பேறு . பக் . 80)21. தொட்டிலைத் தேடும் பெண் சிசுக்கள் பெற்றவர்களே தொட்டிலில் போட்டு விட்டு பேட்டி கொடுக்கும் பெருமிதம்,இன்று ஒன்று அழுகிறது. நாளை ஒன்பதாய் மறுநாளில் நூறாய் ஓரே அழுகை இத்தனை சிசுக்களுக்கும் தாலாட்டுப் பாட ஓரே ஒரு ஆயா, ஆயாவின் தாலாட்டும் அலரலாய் மாற. . . - தொடரும் (சிற்றிதழ்), அக்- டிச, 1992 வெளியீடு- கிருங்கை சேதுபதி- கிருகாக்கோட்டை muppalam2003@yahoo.co.in

சி,கே. சுப்பிரமணிய முதலியாரின் பெரிய புராண உரைத்திறன்

என் நான்காம் நூல் மே 10 அன்று வெளிவர இருக்கிறது. அதன் தலைப்பு சி,கே. சுப்பிரமணிய முதலியாரின் பெரிய புராண உரைத்திறன் என்பதாகும். இது தமிழகத்தில் திருச்சிக்கு அருகில் உள்ள காரைக்குடி நகரத்திற்கு அடுத்துள்ள புதுவயல் என்ற என் சொந்த கிராமத்தில் வெளியிடப் பட இருக்கிறது. விரைவில் அழைப்பை அனுப்புவேன்.

விடுதலைக்கு முந்தைய பெண்களின் நாவல்கள்

என் மூன்றாம் புத்தகம் விடுதலைக்கு முந்தைய பெண்களின் நாவல்கள் இது இந்திய விடுதலைக்கு முன் தமிழ் நாவல் உலகில் வாழ்ந்த படைத்த 22 பெண்படைப்பாசிரியர்களைப் பற்றித் தெளிவு படுத்தும் நூல். இதில் மொத்தம் 43 நாவல்கள் அலசப்படுகின்றன. இந்த நாவல்களைச் சமூக ஆவணங்களாகக் கொண்டு அக்காலத் தமிழகத்தை அக்காலப் பெண்களின் நிலையை தெளியமுடிகிறது. இந்த நூலின் விலை ரூ 125என்னிடம் இந்த நூல் கிடைக்கிறது

பெண்ணிய வாசிப்பு

என் இரண்டாம் புத்தகம் பெண்ணிய வாசிப்புஇது தமிழ் இலக்கியங்களில் சிலவற்றைப் பெண்ணுக்குச் சாதகமாக வாசிக்கத் தலைப்பட்டுள்ளது. அதனோடு பெண் எழுத்துக்களைத் தனித்த திறனாய்வு நோக்கில் அலசவும் செய்கிறது. இது காவ்யா வெளியீடாகும். சென்னை - கோடம்பாக்கத்தில் உள்ள காவ்யா பதிப்பகத்தில் இப்புத்தகம் கிடைக்கிறது. விலை ரூ 80

பெரியபுராணத்தில் பெண்கள் ஓர் ஆய்வு

என் முதல் புத்தகம் பெரியபுராணத்தில் பெண்கள் ஓர் ஆய்வு என்பதாகும். இது பெரிய புராணத்தில் உள்ள 34 பெண்களை வெளியுலகிற்கு எடுத்துக்காட்டும் வகையில் எழுதப்பட்டுள்ளது. இது என் முதுகலைத் தமிழ்க் கல்விக்காகச் செய்யப்பெற்ற ஆய்வேடு ஆகும். இதன் விலை 35 ரூபாய். இது என்னிடம் கிடைக்கிறது

தோற்றம் நிலக்குப் பொறை

நில்லாமல் சுழல்கின்ற உலகம் ஈதாம்
நீங்காமல் இரவுபகல் வந்து போகும்
பல்வகையாம் உயிரினங்கள் மறையும் தோன்றும்
எண்ணற்ற மாற்றங்கள் ஆகும் போகும்
நல்லவையும் தீயவையும் நிற்கும் மாறும்
நிலையாக எதுவுமில்லை சுழலும் மண்ணில்
நில்லாமை எனும்தத்துவம் ஒன்றே நிற்கும்
நீடுபுகழ் அதனோடு சேர்ந்தே வாழும் 1


கடிகாரக் கால்கள் நிற்காது ஓடும்
கவனமாய்ப் போட்டியிடும் மனித உள்ளம்
அடிமையாய்ப் பணமிருக்கும் இடத்தை நாடும்
ஆனாலும் அரைக்காசு காணா துண்மை
அடிமுடியாய்த் தேடியோடி கிடைக்கும் காசு
அப்படியே குவிக்கமனம் திட்டம் போடும்
முடிவொன்றே இல்லாமல் சேர்க்கும் காசு
முடிவிலா பூதம்காக்கும் புதையல் ஆகும் 2


பெட்டிபெட்டியாய்ப் பணஞ்சேர்த்துப் பயனும் என்ன?
பெருமையால் பிறருக்கு ஈதல் வேண்டும்
வட்டிக்கு வட்டிகூட்டி பயனும் என்ன?
வாழ்க்கைக்கு வசதிபெருக உதவ வேண்டும்
பூட்டுமேலே பூட்டிட்டு பயனும் என்ன?
பிள்ளைகள் வாழ்க்கைக்கு ஆக வேண்டும்
கட்டுக்கட்டாய் பணமிருந்தும் பயனும் என்ன?
கவலையின்றி அனுபவிக்க மனந்தான் வேண்டும் 3


எண்ணியெண்ணிக் காசுகளை முடிந்து வைத்தால்
ஏக்கங்கள் கூடிவிடும் மகிழ்ச்சி ஏது?
கண்போலே சேர்த்திட்ட காசை எல்லாம்
கணக்காகச் செலவழித்தால் இன்பம் உண்டு
மண்வாங்கி மனைகட்ட வசதி சேரும்
மகிழ்வுந்து பயணத்தால் மகிழ்ச்சி கிட்டும்
பெண்மணந்து பிள்ளைபெறப் பேறு உண்டு
பணமிருந்தால் இவையெல்லாம் நமது ஆகும் 4


ஆனிப்பொன் அணிசெய்தால் பூண்பது அழகு
அணைந்தபொருள் அனுபவித்தல் அழகிற் கழகு
இனிப்பென்றால் தந்துண்பது நல்ல இன்பம்
ஈகையே உலகினர்க்கு இன்பத்து ளின்பம்
கனிமரமாய் ஊருக்குள் நிற்றல் மேன்மை
கருதாது அளிப்பது மேன்மைக்கு மேன்மை
தனியாக வாழ்வது யாருக்கும் வன்மை
தளராது ஈதலே வன்மைக்கு வன்மை 5


முப்பாலீந்த முழுப்புலவர் வள்ளுவ ஆசான்
முறையாகச் சொல்லிட்டார் அதனைக் கேளீர்
முப்போதும் பொருள்சேர்த்துத் தானும் உண்ணாது
மகிழ்வாகப் பிறர்க்கும் கொடாத செல்வம்
எப்போதும் அதுநன்றியில் செல்வம்? என்றார்
எளிமையாய் வாழ்ந்தாலும் பிறர்க்குத் தந்துத்
தப்பாது வாழ்ந்திருத்தல் இன்ப வாழ்வாம்
வறுவது பூமிக்கு எடையாம்? ஓரீர். 6

காற்று வற்றிய காரணம்

விதம் விதமாய் மனிதர்கள்
மளிகைக் கடையில்
பொறுப்போடு பொருள் வாங்கி
வெளியில் வந்தால்
ஏறிவந்த இருசக்கர வண்டி
காற்று வற்றிக் கிடந்தது

உடன் வந்த மனைவி
முணுமுணுக்கிறாள்.
நீங்களும் சரி
உங்கள் வண்டியும் சரி
சரியான நேரத்திற்கு உதவாது என்று

காற்று வற்றிப்போனதற்கான
காரணம் என்ன
என மனம் தேடியபடி
எங்களின் ஊர்வலம்

வண்டி,
வண்டியைத் தள்ளியபடி நான்,
என் பின்னால்
குழந்தையைத் தூக்கியபடி மனைவி,

புதிய பள்ளங்களைத்
தோண்டிப்போடும் கூலியாட்கள்
பள்ளங்களின் வெளிப்பாட்டில்
வீதிக்கு வந்த கற்கள் யாரை நோவது
காற்று வற்றியதன் காரணம்

மளிகைக்கடை வாசலில்
பார்க்க வினோதமாய்
ஒரு சிறுவன்
வெளிவந்த
எங்களின் அசைவையே
உற்றுக் கவனித்த
அவனின் சிறப்பு கவனம்
அவன்தான் ஏதோ செய்திருக்க வேண்டும்

கடை அடைந்து
காற்று வற்றிய காரணம்
கண்டுபிடிக்க முயல
கடைக்காரர் கேட்டார்
யாருக்காவது இடைஞ்சலாக
வண்டியை நிறுத்தினீர்களா?
காற்றைப் பிடுங்கி விட்டிருக்கிறார்கள்

சரி
சரி
சரி செய்த வண்டியோடு பயணம்
நல்லவேளை
டயர் டியுப்க்குப் பழுதில்லை
muppalam2003@yahoo.co.in
http://www.vaarppu.com/

தற்காலத் தமிழ்ப்பெண்ணியம் பற்றி ஓர் ஆணின் சில பதிவுகள்

மார்ச் 8. உலக மகளிர் தினம். மகளிர் தமக்கான வாழ்க்கையை, கல்வியை, கலாச்சாரத்தை, இலக்கியத்தை, மொழியை, இன்னும் எவை எல்லாம் உள்ளனவோ அவை எல்லாவற்றையும் எவ்விதத் தடையுமில்லாமல் ஏற்படுத்திக்கொள்ள, அனுபவிக்க, ஆய்வு செய்ய விழிப்புணர்வு தரும் ஒரு தினமாக இந்த மகளிர் தினத்தை மகளிர் எடுத்துக் கொள்கின்றனர். உலகம் முழுவதிலும் உள்ள பெண்களிடம் இந்த விழிப்புணர்வு உள்ளதா? ஏற்பட்டுவிட்டதா? அல்லது இந்த விழிப்புணர்வு அடையப்பட்டு விட்டதா? என்பது அறியப்பட இத்தினம் ஒருவகையில் உதவி செய்யலாம்.

தமிழ் நாட்டைப் பொறுத்தவரையில், தமிழ்மொழியைப் பொறுத்தவரையில் மகளிர் தினம் என்பது குறித்த விழிப்புணர்ச்சி ஓரளவிற்கு உள்ளது என்பதை 2006 மார்ச் 8 உணர்த்துகிறது. இத்தினம் கருதி பல கருத்தரங்குகள், கூட்டங்கள், செய்திகள் ஊடகங்களில் இடம் பெற்றுள்ளன. இதன் வாயிலாக படித்த பெண்கள் ஓரளவிற்கு விழிப்புணர்வைப் பெற்றுள்ளனர் என்பது தெரிய வருகிறது.

இந்த வளர்ச்சி போதுமா? போதாதா? என்றெல்லாம் கண்டுபிடித்து இவ்வளர்ச்சி போதாது எனக்கருதி அதனைக் கட்டாயமாக வளர்த்தெடுக்கப் பாடுபடுவது என்பதெல்லாம் நடைபெறவேண்டிய செயல்கள்தாம். அது ஒரு பக்கம். . இதனைத் தாண்டி தமிழகப் பெண்கள் நிலை ஓரளவிற்குச் சொல்லிக் கொள்ளும் அளவிற்கு வளர்ச்சி அடைந்துள்ளது என்பது ஏற்க வேண்டிய கருத்தாகும். கல்வி, வேலைவாய்ப்பு முதலிய துறைகளில் பெண்களுக்கு ஏற்பட்டுள்ள வளர்ச்சி தமிழ்நாட்டுச் சூழலில் வியக்கத்தக்கதாக உள்ளது. இதனை அடைவதற்குப் பெண்களும் முயன்றுள்ளனர். ஆண்களும் முயன்றுள்ளனர்.

பாரதியார் இந்த முன்னேற்றத்தின் தொடக்கப் புள்ளி ஆவார். அவரின் கூற்றுப்படிப் பட்டங்கள் ஆள்வதும் சட்டங்கள் செய்வதும் பாரினில் பெண்கள் நடத்த வந்துவிட்டார்கள். இதற்கு அடுத்த நிலை என்ன என்றபோது பாரதியைத் தாண்டி சிந்திக்க வேண்டியுள்ளது. பெரியார் இதற்கான ஒரு வளர்புள்ளி. அவரின் பெண் குறித்த புதிய எண்ணங்களைப் படித்த, கேட்ட பெண்களைக் கவர்ந்தன. அவ்வெண்ணங்கள் புதிய சிந்தனைகளைத் தூண்டின என்றால் அது மிகையாகாது.

பாரதியார், பெரியார் ஆகிய ஆண்களின் செயல்பாடுகள் ஒருபுறம். இவர்கள் காலத்திலேயே பெண்களின் விடுதலைக்காகப் போராடிய பெண்களும் உண்டு. தமிழகத்தின் முதல் பெண் மருத்துவர் சுப்புலெட்சுமி அம்மையார், மூவலூர் ராமாமிர்தத்தம்மாள் போன்றோர் குறிப்பிடத்தக்கவர்கள். இன்னும் பெயர் தெரிந்த தெரியாத பெண்களும் உண்டு.

இந்த வளர்ச்சி ஒட்டுமொத்தமான சமுதாய வளர்ச்சி என்றே அக்காலத்தில் கருதப்பட்டது. இந்த ஒட்டுமொத்தச் சமுதாய வளர்ச்சியிலிருந்துப் பிரிந்துத் காலப்போக்கில் தனித்துப் பெண்வளர்ச்சி என்பது வளர்ந்தது.இந்த 2006ஆம் ஆண்டை ஒரு எல்லையாக வைத்துப் பார்த்தால் அதன் பின்னோக்கிய இருபது ஆண்டுப்பயணம் தமிழ்ப் பெண்ணியத்தின் தனித்த தொடக்கக் காலப்பகுதியாகக் கொள்ளலாம்,.
இந்த இருபது ஆண்டுகளில் பெண்களை முன்வைத்து, இலக்கியங்களை முன்வைத்துத் தமிழ் உலகில் பெண்ணின் நிலைப்பாடு, பெண்ணின் அடையாளம் ஆகியன அறியப்பட்டன. இந்தப் புரிதலில் ஒட்டிய பெண்படைப்பாளர்கள், ஒட்டாத பெண்படைப்பாளர்கள் படைப்புகள் அவ்வப்போது வெளிவந்து கொண்டிருந்தன. பெண்திறனாய்வாளர்கள் பெண்ணிய விழிப்புணர்வோடு ஆய்வு செய்யத் தலைப்பட்ட்னர். மேல்நாட்டுப் பெண்ணியக் கொள்கைகளின் தாக்கத்தால் ஓரளவிற்கு பெண்ணியத்திறனாய்வுகள் தமிழில் கிளைத்தன. இந்த வருகை தமிழிலக்கியத்தின் புதிய பக்கங்களைத் திறந்தன,

இதன்விளைவால் கீழ்க் கண்ட முக்கிய மாற்றங்கள் தமிழ் இலக்கிய உலகில் நிகழ்ந்தன.

1, தமிழ் மொழியின் நீண்ட இலக்கியப் பரப்பில் பெண்படைப்பாளிகள் இனம் காணப்பட்டனர்.

2, புதிய பெண்படைப்பாளிகள் எழுதத் துவங்கினர். அவர்களுக்கிருந்த எழுத்துத் தடைகள் சற்று விலகின. பெண்களின் படைப்புகளை வெளியிட ஆண்வயப்பட்ட வெளியீட்டுலகம் முன்வந்தது. அவர்களின் படைப்புகளை விமர்சிக்கவும் ஆண்உலகம் வந்தது பெண்படைப்பு என்பதற்கு ஒரு தனி மதிப்பு வந்தது. பெண்படைப்பாளர்களுக்கு மட்டுமான போட்டிகள் வைக்கப்பெற்றன.

3. பெண்படைப்பாளிகளின் வாழ்க்கை தெரியவந்தது. இதற்கு பத்திரிக்கைகள், தொலைக்காட்சிகள் போன்ற வெகுஜன ஊடகங்கள் உதவின.

பெண்ணிய விழிப்புணர்வால் பெண் படைப்பாளிகளுக்கு ஏற்பட்ட விடுதலை வழிகள். இந்த வழியை ராஜபாட்டையாக்க தற்காலப் பெண்படைப்பாளிகள் முனைப்புடன் செயல்பட்டுவருகின்றனர்.
இதே இருபதாண்டு சூழலில் பெண்ணின் சமுதாய இருப்பும் சில மாற்றங்களுக்கு உள்ளாகியுள்ளது கவனிக்கத்தக்கது. பெண்களின் பள்ளிக்கூடம், கல்லூரிகள் அதிகமாகி உள்ளன. பெண்கள் மட்டும் வேலை பார்க்கும் அலுவலகங்கள் தோன்றியுள்ளன. குறிப்பாக மகளிர் காவல் நிலையங்கள். இது தவிர பெண்கள் மட்டுமே வேலை பார்க்கும் வங்கிகள் உருவாகியுள்ளன. பெண்களின் கூட்டமைப்புகள் உருவாகியுள்ளன. மகளிர் சுய முன்னேற்ற உதவிக்குழுக்கள். இந்தக் குழுக்களை வளமையாக்க மாநில அரசோ மத்திய அரவோ உதவிய செய்தியில் அரசியல் இருந்தாலும் கடன் பெற்று அவற்றை நிர்வகிக்கும் பொறுப்பு பெண்களுடையது என்பது குறிக்கத்தக்கது.

பெண்ணாசிரியர்களால் நடத்தபப்டும் பெண்களுக்கான பத்திரிக்கைகள், பெண்களால் பெண்களுக்காக நடத்தப்படும் தொலைக்காட்சி நிகழ்ச்சிகள் என்று ஊடகங்களிலும் குறிப்பிடத்தக்க இடம் நேரம் ஒதுக்கப்பட்டிருப்பதையும் எண்ணிப்பார்க்கலாம். பெண்களின் அரசியல் பங்கேற்பில் ஆண்களைச் சார்தல் என்ற பண்பு அதிகம் இருந்தாலும் இதனையும் ஒரு முன்னேற்றப் படியாகவே கொள்ளவேண்டும்.. இந்த அளவிற்கு வளமை பெற்ற இக்காலத்திலும் தினத்தாள்களில் நாள்தோறும் பெண்ணிழிவுச் செய்திகள் வராமல் இல்லை. முன்னேற்றம் ஒரு புறம் பின்னேற்றம் ஒரு புறம் என்ற ஏற்ற இறக்கத்திற்கு என்ன பதில் சொல்வது? எப்படி பதில் சொல்வது என்பதை பெண்ணியவாதிகள் சிந்திக்க வேண்டும்,
இந்த வளர்ச்சியில் கண்ணுக்குத் தெரிந்த மிகப் பெரிய மாற்றம் பெண்களின் ஆடை அணிகலன்களில் ஏற்பட்டுள்ள மாற்றங்கள் ஆகும், நகரத்தில் பரவலாகி வந்த இந்த மாற்றங்கள் தற்போது கிராமங்களிலும் புகுந்து விட்டன, இதற்குப் பல காரணங்கள் உண்டு. இந்த ஆடை அணிகலன் மாற்றங்களினால் பெண்களின் சமுதாயக் கட்டுப்பாடு சற்று தளர்ந்திருக்கிறது. பெண்களின் உடலை இறுக்கிய ஆடைகள் சற்று இறுக்கம் தவிர்த்து இருக்கின்றன. இறுக்கம் தவிர்த்தல் என்ற இந்த வசதி பெண்களுக்கு வசதி அளித்ததோ இல்லையோ ஆண்களின் கண்களுக்கு புதுக்கவர்ச்சியை உண்டு செய்து இருக்கின்றன. ஆண்களின் கண்கள் ’’ ஆடை அணிகளிலே இவ்வளவு நெகிழ்வுத் தன்மை உள்ளதென்றால் ஆண்களிடம் பழகுவதிலும் இத்தகைய நெகிழ்வை எதிர்பார்க்கலாம் ’’ என்ற எண்ணத்திலேயே பெண்களைக் கவனிக்கின்றன. இச்சூழலில் பெண்களுக்கு வசதி தரும் ஆடைகள் அதே நேரத்தில் ஆண்களின் கண்களைக் கவராத ஆடைகள், அணிகள் இவற்றை பெண்ணியவாதிகள் முன்வைக்கலாம், ஆண்கள் அணிகளைத் தவிர்த்ததுபோல (குடுமி, காதுகடுக்கண், கழல்) பெண்களும் அணிகளைத் தவிர்த்துவிடலாம், இதனால் இழப்பு ஏதுமில்லை. பல திருட்டுகளைத் தவிர்க்கலாம். இது குறித்துப் பெண்கள் முடிவெடுக்க வேண்டிய கட்டாயம் தற்போது தேவை.

பெண்களின் சமுதாய வாழ்வில் காதல், திருமணம் இவற்றில் தற்போது சலசலப்புகள் ஏற்பட்டுள்ளன. ஒத்துவரின் ஒத்துவருவதாகவும், ஒத்து வராவிடில் ஒத்துவராததாகவும் வாழும் வாழ்க்கை முறையை வாழ்ந்து கொள்ளப் பெண்கள் தயாராக உள்ளனர். இந்த வாழ்க்கை முறை குறித்துப் பிறர் கருத்து என்பதைவிட தன்கருத்து என்ற அளவில் பெண்கள் சிந்திக்கத் தொடங்கியுள்ளனர். இந்தத் தயாராகுதலுக்கும் இந்தச் சிந்திப்புக்கும் பெண்கள் வந்திருப்பது ஒரு முக்கயமான மாற்றமே ஆகும், வழக்கு மன்றங்களில் வரும் பெண்களுக்கு எதிரான பெண்களுக்குச் சாதகமான வழக்குகள், தினத்தாள்களில் வரும் பெண்களுக்கு எதிரான செய்திகள் சாதகமான செய்திகள் இவை பெண்களின் விழிப்புணர்விற்குச் சான்றுகள். இவற்றில் இடம் பெறும் உண்மை நிலை நாளொரு மேனியும் பொழுதொரு வண்ணமுமாகத் திரிக்கப் படுவது ஏன் என்று எண்ணிப்பார்க்கையில் வழக்கு மன்றங்கள் ஆனாலும் சரி தினத்தாள்கள் ஆனாலும் சரி இவற்றில் வேலை பார்ப்பவர்கள் முற்றிலும் பெண்கள் என்பதைக் கவனத்தில் எடுத்துக் கொள்ள வேண்டும். முற்றிலும் பெண்கள் மட்டுமே பெண்தேவைகளைப் பூர்த்தி செய்யும் நிறுவனங்களை நடத்தும் நிலை ஏற்படும்வரை இந்தச் சாதக பாதகங்கள் தொடரும்.

இச்சூழலில் பெண்களுக்கு எதிரான நச்சுக்காற்றைச் சுட்டிக்காட்டும் விலக்கும் நிறுவனங்கள் தேவை. அவற்றின் தன்னலமற்ற பெண்குல விழிப்புணர்ச்சிச் செயல்கள் மேலும் பெண்களை முன்னேற்றும். அதற்குத் தக்க தருணம் இதுவே. அதுவரை மார்ச் 8 என்பது ஒரு குறியீட்டுத் தினமே அன்றி வேறு இல்லை.

வால்மீகி X கம்பன்

வால்மீகி ராமாயணம் பற்றித் தெரிந்து கொள்ள வலைப்பக்கங்களைத் தேடினேன். கிடைத்தது ஒரு முகவரி இதனுள் வால்மீகி முனிவர் எழுதிய வடமொழி வடிவத்தின் ஆங்கில ஒலிபெயர்ப்பும் அதன்கீழ் ஆங்கில மொழி பெயர்ப்பும் கிடைக்கிறது. அகல்யை கதை கம்பரால் எவ்வளவு நாகரீகமாக எழுதப்பட்டுள்ளது என்பதற்குக் கீழ்க்காணும் வரிகள் சான்று. புதிதாக வால்மீகி ராமாயணம் பற்றி ஒரு வலைப்பதிவு வர இருப்பதாக தேன்கூடு மூலமாக அறிந்தேன்.. அவரின் இடுகைகளுக்கும் இது உதவலாம். அகல்யை சூழல் காரணமாகவும் தானே விரும்பியும் இந்திரனை ஏற்றதாக வால்மீகி எழுதியுள்ளார், ஆனால் கம்பர் நெஞ்சில் தவறு இல்லாதவளாக அகல்யைப் படைத்துள்ளார்.

http://www.valmikiramayan.net/

R^itu kaalam pratiikSante na arthinaH susamaahite sa.ngamam tu aham icChaami tvayaa saha sumadhyame 1-48-18

I, desire.
" 'Oh, finely limbed lady, indulgers do not watch out for the time to conceive, as such oh, slender-waisted one, I desire copulation with you. [1-48-18]
Vividly: 'Oh, Ahalya, Brahma crafted you so well that all your limbs are symmetrically conjoined, so who in the universe will not yearn to have intercourse with you... and on seeing your slender waist and thickset hips I wish to copulate with you now itself... and let there be no fear of safe period or unsafe period for I do not wish to have any progeny of mine from you...

muni veSam sahasraakSam vij~naaya raghuna.ndana matim cakaara durmedhaa deva raaja kutuuhalaat 1-48-19

"Oh, Rama, the legatee of Raghu, though knowing him as the Thousand-eyed Indra in the guise of her husband Gautama, she is inclined to have intercourse ill-advisedly, only to satisfy the impassion of the King of Gods. [1-48-19]

Her thinking is: 'This is none but Indra in the guise of my husband, for my husband never asks me like this nor he violates times... I heard that Indra is seeking me for a long time... and when King of Gods expresses such a desire, it cannot be refused... let him have it?

சேந்தனாரின் கடவுளர் இருவர், காதலியர் இருவர்

திருவிசைப்பா, திருப்பல்லாண்டு என்ற இரு பகுதிகளையும் உள்ளடக்கியது ஒன்பதாம் திருமுறை. அகத்துறை சார்ந்த திருக்கோவையாரின் சாயல் இத்திருமுறையில் உண்டு. ஏறக்குறைய பத்துப் பதிகங்கள் அகத்துறை சார்ந்தன என்பது மேற்கருத்திற்கு அரண் சேர்க்கும். இத்திருமுறையுள் சேந்தனார் மொத்தம் நான்குப் பதிகங்கள் பாடியுள்ளார். இவற்றுள் மூன்று திருவிசைப்பாவில் அடங்கும். ஒன்று திருப்பல்லாண்டு ஆகும். இவற்றுள் இரண்டு திருவிசைப்பாக்கள் அகப்பொருள் அடிப்படையில் அமைவன. திருவாவடுதுறை இறைவனைக் காதலித்த மங்கை ஒருத்தியைப் பற்றித் தாய் கூறுவதாகவும், திருவிடைக்கழி முருகனைக் காதலித்தப் பெண் ஒருத்தியைப் பற்றித் மற்றோர் தாய் கூறுவதாகவும் இவ்விரு பதிகங்கள் அமைந்துள்ளன. திருமுறை வரிசையில் திருவிடைக்கழி முருகனைப் பற்றிச் சேந்தனார் ஒரு பதிகத்தைப் பாடியிருப்பது முற்றிலும் புதுமையானது. இதுவரை எவரும் பாடாதது. இதற்கு முன்னுள்ள திருமுறைகளில் சிவன் பற்றிய செய்திகளே இடம் பெற்றிருக்க இத்திருமுறை அவற்றில் இருந்து இவ்வழியால் மாறுபடுகின்றது. மேலும் இத்திருமுறையில் சேந்தனார் பாடிய பல்லாண்டும் குறிப்பிடத் தகுந்த மாற்றம் உடையதாகும். ஆண்டவனுக்கே பல்லாண்டு வாழ வாழ்த்தும் தன்மையதான இம்முறை வைணவ நடைமுறைக்குச் சரிசமமானது என்பது கருதத்தக்கது. இவ்வாறு ஒன்பதாம் திருமுறை வேறுபட்ட பல கருத்து மாறுபாடுகளுக்கு இடமளித்து மற்ற திருமுறைகளில் இருந்து வேறுபட்டு நிற்கிறது என்பது போற்றத் தக்க உண்மையாகும். இத்திருமுறையுள் இடம் பெற்றுள்ள சேந்தனாரின் இரு அகச்சார்பு பதிகங்களும் தம்முள் வேறுபட்டமைகின்றன. சிவனைக் காதலித்த தலைவியின் காதல் மறைமுகமாகவும், நாகரீகமாகவும், எல்லை கடவாததாகவும் அவளின் தாயால் வெளியிடப் பெற்றுள்ளது. முருகனைக் காதலித்த தலைவியின் காதல் - காதல் என்ற எல்லையைக் கடந்து காமம் என்ற எல்லையைத் தொட்டுவிடுகிறது. இவளின் காதல் இவளின் தாயால் வெளிப்படையாக, நேர்முகமாக, காதல் எல்லை கடந்ததாக வெளிப்படுத்தப் பெற்றுள்ளது. மேலும் சிவனைக் காதலித்தவள் வயதில் மூத்தவளாக விளங்குகிறாள். முருகனைக் காதலித்தவள் வயதில் இளையவள். சேந்தனார் பாடிய இவ்விரு அகம் சார் பதிகங்;களில் எதற்காக இவ்வேறுபாடு பின்பற்றப் பட்டுள்ளது என்பதை அறியத் தூண்டுவதாக இப்பதிகங்;கள் உள்ளன. அவற்றை விவரிப்பதாக இக்கட்டுரை அமைகிறது. சிவனைக் காதலித்தவள்வயது இவள் அரிவை பருவத்தினள். அதாவது இருபத்தைந்து வயதை அடைந்தவள்(68). இவள் தையல் (63) என்றும், இளமான் (65) என்றும், சேந்தனாரால் குறிப்பிடப் பெறுகிறாள். இவளின் இயல்பு இவள் திலக நுதலி(61). இவள் வெண்ணீறு அணிபவள். அஞ்¢செழுத்து அன்றி வேறு பேசாதவள். இவளின் காதல் வருத்தம் இவள் சிவபெருமானின் நெடிய திண்தோளைப் புணர எண்ணும் காதல் நோக்கினள்(59). இவளின் அழகும், வளையல்களும் காதல் மெலிவால் இவளை விட்டு நெகிழ்ந்தன(66). இவளின் எதிர்பார்ப்பு இவள் சிவபெருமானின் கொன்றை மலர் மாலையைப் பெற்று அணிய விரும்புகிறாள்(60). இவள் சிவபெருமானின் அருளை எண்ணி அழிகிறாள்(58). இவள் சிவபெருமானின் திருவிளையாடல்களை ஓயாமல் சொல்லிய வண்ணம் உள்ளாள். இவ்வாறு சிவனைக் காதலிப்பவள் சிவவழிபாட்டுச் சிந்தனை மிக்கவளாக உள்ளாள். இப்பதிகத்தின் அடுத்து அமைவது முருகனைப் பற்றிய பதிகம். அதில் காணப் பெறும் காதலி இவளிலிருந்து மாறுபட்டவள். முருகனைக் காதலித்தவள்வயது இவள் மடந்தைப் பருவத்தினள் (73). அதாவது அரிவைக்குச் சிறியவள். சிறுமி(73), மெல்லியல் (69) என்ற இவளைப் பற்றிய வயதுக் குறிப்புகள் இப்பதிகத்துள் காட்டப் பெற்றுள்ளன. இவளின் இயல்பு இவள் வெருளும் மானின் விழிகளைப் போன்ற விழிகளை உடையவள்(76). கொவ்வைப் பழம் போன்ற இதழ்களை உடையவள்(73). துடி போன்ற இடையை உடையவள். சுடரோ, மதியோ, மின்னலோ, பவளத்தின் குழவியோ, சித்திரமோ, மணித்திரளோ, சுந்தரத்து அரசோ என இவள் முருகனைக் காண்கிறாள். இவளின் பார்வை முருகனின் புறஅழகு சார்ந்து அமைந்துள்ளது. இவளின் காதல் வருத்தம் இவள் காதல் வருத்த மேலீட்டால் பசலை நோயைத் தன் தனங்களில் பெற்றாள்(70). இவளின் இடையில் இருந்த மேகலை இவளின் மெலிவாள் நீங்;கியது(71). மேலும் இவள் காதல் வருத்தத்தால் மடல் ஏறவும் துணிந்தாள்(76). மடல் ஏற முயன்றாலும் இவளைக் கண்கொண்டு முருகன் பார்க்கவில்லை(77). இவளின் எதிர்பார்ப்பு முருகவேள் தனக்கு அருளவேண்டும் என்ற எதிர்பார்ப்பு இவளிடம் இருந்தது. மேற்கண்ட இருபெண்களில் அதிக காதல் வருத்தம் கொண்டவளாக முருகனைக் காதலித்தவள் காணப் பெறுகிறாள். சிவன் - முருகன் இருவரையும் தந்தை மகன் என்ற உறவுமுறை அமைப்பில் காணும் முறைமையின் பாற்பட்டதாக இப்பதிகங்கள் அமைந்துள்ளன. இவர்களைக் காதலிப்பதாகப் பதிகவழி அறியலாகும் இரு பெண்களும் வயது, காதல் திறம், வருத்தம் ஆகியவற்றால் வேறுபடுத்தப் பெற்று காட்டப் பெற்றுள்ளார்கள். இதற்கு என்ன காரணம் என்று சிந்திக்க வேண்டியுள்ளது. சிவன், முருகன் ஆகிய இரு தெய்வங்களுக்கு இடையே உள்ள உறவு முறை வயது வேறுபாடு, அருளலில் உள்ள எளிவந்த தன்மை, பக்தர்கள் அணுகும் முறை ஆகியனவே இவற்றிற்குக் காரணங்களாக அமைகின்றன. இவ்வேறுபாடுகளின் அடிப்படையில் சில முடிவுகளுக்கும் வரமுடிகின்றது. சிவபெருமானின் பக்தர்கள் பக்தியில் முதிர்வு நிலையை அடைந்தவர்கள் என்றும், முருகனின் பக்தர்கள் பக்தியில் இளமைநிலையில இருப்பவர்கள் என்பதும் இப்பதிக வேறுபாட்டின் மூலம் பெறக் கூடிய இன்றியமையாத முடிவாகும். மேலும் தெய்வம் கருதிய காதல் பாடல்களைப் படைக்கும்போது அந்தத் தெய்வங்;களின் தன்மைக் கேற்ப மாறுபாடு கொண்டு பாடல்கள் படைப்பாளர்களால் படைக்கப்பெற்றுள்ளன என்பதும் தெரியவருகிறது. இவ்வழியில் சேந்தனார் என்ற படைப்பாளர் ஒரே நிலையில் இருபதிகங்களை வரையப் புகுந்தாலும் அவற்றில் சில மாறுபாடுகளைப் புகுத்தி அதன் மூலம் சில கருத்துக்களை பதிய வைக்க முனைந்துள்ளார் என்பது தௌவு.

உ.வே.சா உரைநடை நூல்கள் வெளியீடு

11.3.2006 சனிக்கிழமை மாலை சென்னை பாரதீய வித்யாபவன் சிற்றரங்கில் நடைபெற்ற உ. வே. சாவின் உரைநடை நூல்கள் வெளியீட்டு விழாவிற்குச் சென்றிருந்தேன். குறித்த நேரத்தில் தொடங்கிய விழா. பல தமிழறிஞர்களால் நிறைந்த விழா, நிறைவான விழா.

பாண்டிச்சேரி பிரெஞ்சு நிறுவனம் சென்னை பெசண்ட் நகரில் உள்ள உ. வே. சா நூல்நிலையத்தில் பாதுகாக்கப் பட்டு வரும் 61 கட்டு சங்க இலக்கிய ஓலைச்சுவடிகளை குறுவட்டுகளாகச் சேமித்துத் தந்துள்ளார்கள். இதன் வெளியீட்டுவிழாவும் இதனோடு நடைபெற்றது. இவ்வட்டுக்களில் சாமிநாதையர் நூல்நிலையத்தில் உள்ள சுவடிகள் மின்படி எடுக்கப்பட்டுள்ளன. அவற்றை மின்படி எடுப்பதில் உள்ள சிக்கல்கள் குறித்து பிரெஞ்சு நிறுவனத் தமிழ்த்துறைப் பொறுப்பாளர் இவான் என்ற பெண்மணி எடுத்துரைத்தார். அவர் திரையில் கணினி வழி காட்டிய ஏட்டுப்பிரதிகள் செல்லரித்துப் போயிருந்தன. உடைந்து செல்லோடேப் இடப்பட்டு படி எடுக்கப் பட்டிருந்தன. இது போன்ற பல இடர்பாடுகள். இவற்றை அழியாமல் காத்த பெருமையை புதுவை நிறுவனத்திற்கு உரியது. அதன் இயக்குநர் ஒரு கணினியையும் அன்பளிப்பாக நூலகத்திற்கு அளித்தார். வாழிய தமிழ்.

மேலும் புதுவை பிரெஞ்சு நிறுவனம் வெளியிட்டுள்ள இந்திய நாட்டு ஆகம ஏட்டுப்பிரதிகள் யுனெஸ்கோ நிறுவனத்தால் மிகப் பழமையான ஏட்டுச்சுவடிப் பதிவுகள் எனப் பாராட்டப் பட்டுள்ளன.

உ.வே.சா பல தமிழ் நூல்களைப் பதிப்பித்தவர். தமிழ்த்தாத்தா எனப் புகழப்படுபவர். இவரின் இலக்கியத்தேடல் அனுபவங்கள் பல இவரது உரைநடை நூல்களில் வெளியிடப்பெற்றுள்ளன.

இவரது உரைநடைக்கட்டுரைகள் பெரும்பாலானவற்றில் கும்பகோணம் கல்லூரியும், சென்னை பிரஸிடென்சி கல்லூரியும் அதிக அளவில் இடம் பெற்றுள்ளன.

வெளியீட்டுவிழாவில் உ.வே. சா உரைநடை நூல் தொகுப்புகள் (நான்கு தொகுதிகள்) ரூபாய் 350க்குக் கிடைத்தது. அதன் விலை 475நானும் அங்கு இங்கு கடன் வாங்கி வாங்கிவிட்டேன். படித்துக் கொண்டிருக்கிறேன்.

பெண்கவி 2

பெண்ணே!
நெருப்பாயும் வேண்டாம்
செருப்பாயும் வேண்டாம்
உனது இருப்பு
உனது விருப்போடு
உனதாய் இருக்கட்டும்

சந்திரவதனா - 8.3.02 --

நல்ல கவிதை தந்தமைக்கு நன்றி.
உனது என்ற சொல்லாடலில் ஓரளவிற்கு மறைந்து கிடக்கிறது பெண் எழுத்து.

இருந்தாலும் எழுதிய பெண் கவிஞர் உனது எனக் குறிப்பிடும்போது விலக்கப்படுகிறது நமது........................
பெண்மையின் பொதுமை விலக்கப்படும் உனதை நீக்கி நமதாய் கவிதை வாசித்தால்.......................

நமது இருப்பு
நமது விருப்போடு
நமதாய் இருக்கட்டும்

என்று இருப்பின் பெருமையாய் இருககுமோ

பெண்கவி 1

மகளிர் தினத்திற்காக சில மகளிர் கவிதைகளை இங்கு உங்களுக்காகத் தர உள்ளேன். அவற்றில் ஒன்று. அவற்றைக் காணுங்கள், படியுங்கள், அதன் சிறப்பை உணருங்கள், முதல்கவிதை பழைய இலக்கியமான குறுந்தொகையில் இருந்து அள்ளுர் நன்முல்லையார் என்பவர் எழுதிய ஒரு பாடல், பாடலுக்குச் செல்லும் முன் அதன் பொருளை நீங்கள் அறியுங்கள்,,,,,
தலைவி ஒருத்தியின் பாடல் இது. தலைவியோடு தலைவன் சிறிது காலம் குடும்பம் நடத்தி வந்தான். அதன்பின் ஏதோ ஒரு காரணமாகத் தலைவன் வேறு ஒரு பெண்ணை நாடிச் சென்றுவிட்டான். நாடிச் சென்ற அவன் மீண்டும் தன் வீட்டிற்கு வருகிறான். ஆனால் தலைவி அவனை வரவேற்காமல் முகம் கோணுகிறாள். இதைப்பார்த்த பக்கத்துவீட்டுத்தோழி நீ இவ்வாறு செய்யக்கூடாது. கணவனிடத்தில் அன்பு செய்ய வேண்டும் என்று கூறுகிறாள். ஆனால் தலைவி என்னைவிட்டு அவர் சென்றுவிட்டார். சென்றுவிட்ட காலங்களில் என்அழகை ருசித்துப் பார்க்க அவர் இல்லை. என் நலம் அவர் இல்லாததால் ஊர் முழுவதும் சிரிப்பாய் சிரித்துவிட்டது. இருந்தாலும் அழகு போய் குடும்ப நலம் போய் என் உயிர் போகின்ற சூழலில் அது எவ்வாறு போகின்றது என்பதைக் காணுவதற்காக அவர் வந்துள்ளாரா? அவரைப் போகச் சொல் வேண்டாம் அவர் இங்க வரவேண்டாம் இந்த குடும்பத்தை வளர்க்க அவர் வரவேண்டாம்
அவர் நமக்கு அன்னையும் தந்தையும் போன்றவர். அவரிடம் கணவருக்கான தகுதி இல்லை. காதல் இல்லை. ஒரு குழந்தைக்கு அம்மாவிடம் இருக்கும் அப்பாவிடம் இருக்கும் பிள்ளை அன்பு இருக்கிறதே தவிர மனைவி மீது கணவன் வைத்திருக்கும் காதல் அன்பு காமவின்பம் இல்லை. அவரிடம் சண்டை போட்டும் என்ன,,,,, அந்த சண்டையை நீ தீர்த்து வைத்தும் என்ன,,,,,,,,,,, வரச்சொல் அவர் அப்பாவாக என்பிள்ளைகளுக்கு இருக்கட்டும். இந்தக் குடும்பத்தில் பிள்ளைகளுக்கு நான் அம்மாவாக மட்டும் இருந்து இந்த வாழ்க்கை நிறைவு பெறட்டும்.
இந்தக்கவிதையில் மற்றொரு பெண்ணைத் தொட்டவன் அனுபவித்தவன் தன்னை அவளோடு ஒப்பு வைத்தோ அவளை என்னோடு ஒப்பு வைத்தோ அவன் அனுபவித்திருக்கக் கூடும். அந்த அனுபவிப்பில் மனதில் ஒருத்தியும் உடலளவில் ஒருத்தியும் அவளோடு செயல் பரிந்திருப்பார்கள் இதனால் சிந்தையால் ஒரு மாதையும் உடலால் ஒரு மாதையும் தொடும் சூழலை உண்டாக்கிய தலைவன் தவறு செய்தவனாகிறான். இவன் தவறை மெல்லக் காட்டும் பாட்டு நேயம் பெண்களுடையது.

இதோ இப்போது உங்களுக்குப் பாடல்

நன்னலம் தொலைய நலம் மிகச் சாஅய்

இன்னுயிர்க் கழியினும் உரையல் அவர்நமக்கு

அன்னையும் அத்தனும் அல்லரோ தோழி

புலவியது எவனோ அன்பிலங்கடையே

மகளிர்தின வலைப்பூ வாழ்த்துக்களும் அதன் எதிர்வினைகளும்

பெண்கள்தினம் குறித்து விழிப்புணர்ச்சி வலைப்பூக்களிலும் இடம் பெற்றிருப்பது மகிழ்ச்சி.
என் நேற்றைய பதிவிற்கு சில பதில்கள் வந்துள்ளன.

பெண்கள் தினத்திற்கான வாழ்த்தாக இட்லி வடை வலைப்பூக்காரர் ஒரு கவிதை தந்துள்ளார்.
ஐயா,
பெண்கள் தினத்தில் வாழ்த்துச் சொல்ல ஒரு நல்ல கவிதை கிடைக்கவில்லையா? பெண் இரண்டு எழுத்து மூன்றெழுத்து நான்கெழுத்து எழுத்தெண்ணிப்பாடும் ஆண்கவிதைதான் கிடைத்ததா? எதை ஏத்துவது எதை ஏத்தி அபபுறம் எதை ஏத்துவது? வாலியின் கவிதை அவ்வளவு நன்றாக இல்லையே
நல்ல பெண்கவிதை ஒன்றைத் தாருங்கள்

March 8 - is the simbal for female growth?

மார்ச் 8

இது பெண்களின் தினம்

இந்தத் தினத்தில் எப்பொழுதும் கேட்கப் படுகிற ஒரு கேள்வி. பெண்களுக்கு என ஒரே ஒரு தினம் மட்டும் தானா ? மற்ற தினங்கள் எல்லாம் ஆண்களுக்கானதுதானே! என்பதுதான்.

இது பெண்கள் கேட்கிற கேள்வி! ஆனால் ஆண்கள் இதனைச் சற்று மாற்றி ஒரு கேள்வி கேட்பார்கள். இந்த ஒரு நாளவது பெண்கள் தினம் என்று கொண்டாடப் படுகிறதே! எங்களுக்கு என்று ஒரு தினம்கூட கொண்டாடப் படுவதில்லையே என்பது

எது எப்படி இருந்தாலும் பெண்கள் தினம் கொண்டாடப்படுவதன் விளைவுகள் பல. சில பெண்கள் கல்லூரிகளில் மகளிர் தினக் கருத்தரங்குகள் கொண்டாடப்படுகின்றன. (சென்னை எத்திராஜ் மகளிர் கல்லூரியில் பெண்கவிஞர்கள் பலர் பங்கேற்கும் ஒரு கூட்டம் மார்ச் 8 அன்று நடைபெறுவதாக தினமணி வழியாக அறிந்தேன். போக ஆசை. ஆனால் ஆண்களை உள்ளே விடுவார்களா என்ற அச்சம் தலையெடுப்பதன் வாயிலாகச் செல்ல மனமில்லை.)

எது எப்படியானாலும் ஒரு ஐம்பது ஆண்டுகால வரலாற்றில் பெண்கள் பல அடிதூரம் வளர்ந்திருக்கிறார்கள். கல்வி அளவில் அவர்கள் எட்டியுள்ள தூரம் அதிகம் எனத் தௌ¤வாகத் தெரிகிறது. வேலைவாய்ப்பில் அதே வெற்றி தொடர்கிறது. வாகனங்கள் ஓட்டுவது, வெகுஐன ஊடகங்களில் பெண் அறிவிப்பாளர்கள் பெண் பத்திரிக்கையாளர்கள் இவர்கள் தனியாகக் கண்டறியப்படுகின்றனர். மகளிர் இதழ்கள் மகளிர் நிகழ்ச்சிகள் மகளிர்மட்டும் கலந்து கொள்ளும் நிகழ்ச்சிகள் இவை வளர்ந்து வருகின்றன.
ஓரளவிற்குப் பெண்கள் வளர்ச்சி பெற்றுள்ளார்கள். ஆனால் சமூகக் கட்டுப்பாடுகள், சமூகமதிப்புகள் இவற்றில் அவர்கள் நிலை இன்னமும் விடுதலை பெறவில்லை என்பது என் கருத்து, இதில் மாறுதல் இருந்தால் வேறுபாடு இருந்தால் தெரிவுயுங்கள்,

ஆனால் மகளிர் நிகழ்ச்சிகள் என்று புது அவதாரம் எடுத்திருக்கும் மகளிர்க்கான நிகழ்ச்சிகளின் வாசகர்கள் யார். இதன் இயக்குநர் யார் இதன் காட்சித் தொகுப்பாளர்யார் இவர்கள் எல்லாம் பெண்களா? பெண்களின் நிகழ்ச்சிகள் என்று நடத்தப்படும் நிகழ்ச்சிகள் ஏன் ஆண்களும் பார்க்க ஏற்ற வகையில் ஒளிபரப்பப் படுகின்றன. இவை நீளும் கேள்விகள்
சரி மகளிர்தினம் கொண்டாடுவோம். என்மனைவிக்கு வாழ்த்து சொல்ல ஒரு நாள் கிடைத்தது. வாசிக்க ஒரு பெண் படைப்பைத் தேடுகிறேன். இவ்வளவும் மகளிர் தினத்தின் விளைவுகள்,,,,,

பெண் வளர்ச்சிக்கான குறியீடா மகளிர்தினம்

Ecs அதாவது எழவெடுக்கும் சிக்கலான சிஸ்டம்

இது ஒரு நல்ல முறை என்று நான் தேர்ந்தேன். சென்னையில் குடியேற ஒரு நான்கடுக்கு வீடு. இதனை வாங்க படாத பாடு பட்டு கடன் வாங்கினேன். இந்தக் கடனை மாதந்தோறும் செலுத்த என் சேமிப்புவங்கிக் கணக்கு உள்ள வங்கியில் எழவெடுக்கும் சிக்கலான சிஸ்டத்தில் சேர்ந்தேன். பத்து மாதங்கள் எல்லாம் ஒழுங்காய்த்தான் இருந்தது. நடந்தது. கடன் வாங்கிய நிறுவனத்திற்கு மாதம் 10ம் தேதியானதும் பணம் போய்ச் சேர்ந்தது. ஆனால் இந்த வரி மாதம் இருக்கிறதே அதாவது பிப்ரவரி இன்கம்டாக்ஸ் வரி மாதம் இந்த மாதம் ஒரு ஞாயிற்றுக்கிழமை காலையில் என் தொலைபேசி அபாய மணி அடித்தது.

கடன் வாங்கிய நிறுவத்தில் இருந்து ஒரு பெண் குரல். சார் நீங்க இந்த மாதம் பணம் கட்டடலையா. என்று கேட்டது அந்தப் பெண்குரல். இல்லையே கட்டிவிட்டேனே. நேற்று கூட ஏடிஎம் சிறு அறிக்கையில் பணம் எடுக்கப்பட்டுவிட்டதாகக் காட்டப்பட்டதே என்று அதிர்ந்தேன். அந்தப் பெண் அப்படியா உங்கள் வங்கிக் கணக்கைச் சரிபார்த்துவிட்டு பணம் எடுக்கப்பட்டு இருந்தால் அதனை ஒரு ஜெராக்ஸ் எடுத்துக் கொண்டு மெயின் ஆபிஸ் சென்று பாருங்கள் என்றார். அப்போதே எனக்கு உள்ளுக்குள் உதைத்தது.
நானும் திங்கட்கிழமை காலையில் அலுவலகத்தில் பர்மிசன் வாங்கிக் கொண்டு வங்கி சென்றேன், அங்கே பணம் டெபிட் ஆயிருந்தது. அதனை ஜெராக்ஸ் எடுத்துக் கொண்டு மேற்படி கடன் தந்த நிறுவனத்திடம் சென்று காட்டினேன், அவர்கள் சார் எங்களுக்குப் பணம் வரவில்லை, இதோ பாருங்கள் என்று கடன் கட்டாதவர் பட்டியலில் என்பெயர் இருப்பதை ஜெராக்ஸ் தந்தார்கள். ஆகா ஜெராக்ஸ் வசதி வந்தாலும் வந்தது. எல்லோரும் சான்று தருகிறார்கள். ஆகா இதுவல்லவோ மகத்தான உலகம்
சரி என்று மீண்டும் வங்கிக்குப் படையெடுத்தேன். அங்க சென்றதும் அவர்கள் ஆமாம் சார் பிப் 10ம் தேதியில் ஒரு தொகை மட்டும் திருப்பி எங்களுக்கே வந்துவிட்டது. அது உங்கள் தொகையாக இருக்கலாம் என்று கூறினார்கள். பிடித்தது ஏழரை நாட்டுச் சனி, அது என் பணமே தான். கூடுதலாக அனுப்பிவிட்டதாக சர்வீஸ் பிரான்ஜ் திருப்பி அனுப்பியிருந்தது. அதனை மீண்டும் ஒரு பையில் கட்டி மேற்படி வங்கி சர்வீஸ் பிரான்ஜ்க்கே திருப்பி அனுப்பப்பட்டுவிட்டது. சரிதான். இப்போ பணம் எங்கே இது யாருக்குத் தெரியும்

எனக்கு நேரே போன் பேசினார்கள் சண்டை போட்டார்கள் ,,,, ஆனால் பணம் அவ்வளவுதான்யார் மேல் தவறு தெரியாது நான் எழுதித்தந்தேன்.

அதற்குள் கடன் தந்த உயிரைக் காப்பீடு செய்யும் நிறுவனத்தின் சகோதரி நிறுவனம் என் உயிரையும் என் மனைவியின் உயிரையும் சேர்த்து வாங்க போன் மேல் போன் பேசியது. அலுத்துப் போய் கடன் வாங்கி பிப் மாதத் தொகையையும் அதற்கு தண்டமாக ரூ 321 ஐயும் கட்டி என் உயிரையும் மனைவி உயிரையும் காப்பாற்றினேன். இதில் வேடிக்கை என்னவென்றால் ECS வழங்கும் வங்கிக்குக் கட்டணமாக ருபாய் 120 தண்டம் கட்டியிருக்கிறேன்.
இன்னும் எனக்குப் பிப்ரவரி மாதத்தவணை என்ன ஆயிற்று என்பது தெரியவில்லை. யாராவது பையில் பணம் பார்த்தால் என் கையில் தாருங்கள். இந்தத் தொல்லையைத் தந்தது பேர் போன ஒரு வங்கி. அந்த வங்கி மாநில வங்கி. மைசுர் ஹைதராபத் போன்ற மாநில பெயரில் துணை வங்கிகளும் அதற்கு உண்டு

நாட்கள் நகர்ந்தபின் கன்சுயுமர் கோர்ட் செல்ல வேண்டும். கன்சுயுமர் கோர்ட்டில் யாராவது தெரிந்தவர்கள் இருந்தால் இமெயில் செய்யுங்கள்
ஆனாலும் இன்னும் பணம் அவ்வளவுதான்

தமிழோவியம் இணையஇதழில் என் கவிதை

நண்பர்களே
என் கவிதை ஒன்று தமிழோவியம் இணைய இதழில் வெளியாகி உள்ளது. சிறு குழந்தையின் உலகம் பற்றிய கவிதை அது, வாசித்துப் பார்ப்பதற்காக உங்களுக்கு இங்கே தருகிறேன். தமிழோவியம் நண்பர்களுக்கு நன்றி

கவிதை : தனியுலகு - மு. பழனியப்பன் [muppalam2003@yahoo.co.in]

குழந்தையின் உலகம்
வேறுவிதமாய் இருக்கிறது

வீட்டு வாசல்
சாலையின் ஒரு பகுதி

வாசல் விட்டுசாலையில்
இறங்கித்
திடு திடுவென ஓடிவரும்
அம்மனக் குழந்தை
கால்கள் தரையில்
பாவாமல்தாண்டிக்
குதித்தோடும் நடையழகு

வாசல் வந்து
சாலை இயக்கத்தைக்கண்டு கொள்ளாமல்
தன் பாட்டுக்குப் போகும்

நிறுத்த முடியாமல்
இரு சக்கர வாகனத்தை
தடால் என நிறுத்தி
கால் ஊன்றி
வாகனத்தை நிறுத்த முற்பட
வழுக்கி விழும்
பின் இருக்கை மனைவி
கீழ்விழுந்துஎழ முயல
குழந்தைநிற்காமல் ஓடுகிறது
திரும்பிப் பார்க்காமல் ஓடுகிறது
எங்களின் வீழ்ச்சியைப் பார்க்காமல்
செல்லுகிறதே என்ற எமது எதிர்பார்ப்பு

குழந்தையின் உலகம் வேறுவிதமாய் இருக்கிறது
சரிந்த மனைவி
தன் பிள்ளையை நினைக்கிறாள்
நான் ஊரார் பிள்ளை
நடையழகைஅதன் உலகை எண்ணி வியக்கிறேன்.
http://www.tamiloviam.com/unicode/02160609.asp

இணயவழி தமிழ் கற்பித்தல் - தொடக்கக்கல்வி

இணையம் தற்போது மக்களுக்குத் தேவையானச் செய்திகளை அள்ளித்தரும் அமுதசுரபியாக விளங்கி வருகிறது. உள்ளூர் செய்திகள், வெளியூர் செய்திகள், வெளிநாட்டுச் செய்திகள், அயல் கண்டச் செய்திகள் எனப் பலவகைச் செய்திகளை விரல் நுனிச் சொடுக்கலில் பெற முடிகிறது. உள்ளூர், வெளியூர், வெளிநாடு, வெளி கண்டம் ஆகிய எப்பகுதி மாந்தருடனும் நேரில் பேசுவது போல காட்சி மற்றும் பேச்சு வழியாக உரையாடமுடிகிறது. கற்பித்தல், மருத்துவம், பொழுதுபோக்கு, விற்பனை, இடப்பதிவு, அஞ்¢சல் முதலான பல துறைகளில் இக்காலத்தில் விரைவான முன்னேற்றங்கள் இணைய நுழைவால் ஏற்பட்டுள்ளன என்பது உண்மை.

தற்போது இணைய வழிக் கற்பித்தல் முறை பரவலாகி வருகிறது. இக்கற்பித்தல் முறை வெறும் வகுப்பறைக் கற்பித்தல் போல் ஆசிரியரிடமிருந்து மாணவர் கற்கும் ஒருவழிப்பாதையாக மட்டும் இல்லாமல் பல்வழிப்பாதை கொண்ட முழுநிறைவு கொண்ட கற்பித்தல் முறையாக விளங்குகின்றது. இக்கற்பித்தல் முறையில் பாட வல்லுநர்களால் வடிவமைக்கப்படும் பாடங்கள் பல்லூடக வசதிகளுடன் கற்பவருக்குத் தரப்படுகின்றன. தேவையான இடங்களில் பேச்சுரைகள், அசைவுப்படக் காட்சிகள், புகைப்படங்கள், செயல்முறை விளக்கங்கள், பின்னணி இசையுடன் பாடல்களை கேட்டல், முறையான இராகத்தில் பாடல்களைக் கேட்டல், பாடத்திற்குத் தேவைப்படும் பாடம் அல்லாத மற்ற பயில்வுத் துணைக்கருவிகள் ( எடுத்துக்காட்டிற்கு - பார்வை நூல்கள், மூலநூல்கள், சோதனைச்சாலைச் செய்முறைகள், பாடத்தோடு தொடர்புடைய பிற வளைதளங்கள் ஆகியவற்றைப் பெறவும் இக்கற்பித்தல்முறை உதவி செய்கிறது) முதலானவற்றைக் கொண்ட பல்வழிக் கற்பித்தல் முறைகளைத் தருவதாக இணையவழிக் கல்வி முறை விளங்குகிறது.

மேலும் இக்கற்பித்தல் முறையில் ஓர் ஆசிரியர், ஒரு மாணவர் என்ற கற்றல் நிலை பின்பற்றப்படுகிறது. இதன்மூலம் மாணவரின் கவனம் சிதறாமல் தடுக்கப்படுகிறது. நடப்பில் உள்ள வகுப்பறைகளைப் போல நூறுபேருக்கு ஓர் ஆசிரியர் என்ற தொல்லை இக்கற்பித்தல் முறையில் இல்லை. மேலும் தேவையான நேரத்தில் பாடங்களைப் படித்துக்கொள்ளலாம். இரவு பகல் என்ற நேர எல்லை இல்லை. இக்கற்பித்தல் முறையில் திரும்பத் திரும்பப் கற்ற பாடங்களையே பார்வையிடலாம். சொல்லித்தருபவருக்கு சலிப்பு வரும் என்ற நிலை இல்லை.

தற்போது வகுப்பறைக் கற்பித்தல் தவிர மற்றொரு கல்விமுறையாக தொலைத்தூரக் கல்வி முறை தமிழகத்தில் பெருமளவில் உள்ளது. தொலைதூரக் கல்விப் பாடங்கள் பெரும்பாலும் குறிப்புரைகளாகவே (notes) அமைந்திருக்கின்றன. மூல நூல்களை மாணவர்கள் நூலகங்களில் தேடிக் கண்டுபிடித்துப் படிக்க வேண்டும். ஆனால் இணையக்கற்பித்தல் முறையில் தரப்படும் கல்வி குறிப்புரைகளைக் கொண்டு இருந்தாலும் நூலக வசதியை இக்¢கல்வி முறை இணையவழியாகவே பெற்றிருப்பதால் மாணவர் இந்தத்தொல்லைக்கும் ஆளாக மாட்டார்கள். மூலநூல்களை அவர்கள் விரல் சொடுக்கலில் சொடுக்கிப் படித்துவிட முடியும்.

தற்போது இயங்கிவரும் வகுப்பறைக் கற்பித்தல், தொலைநிலைக் கற்பித்தல் ஆகிய இருநிலைகளையும் விட மேம்பட்ட கற்பித்தல் முறையாக இணையக் கற்பித்தல் முறை விளங்குகின்றது.

இக்கற்பித்தல்முறையின் மற்றொரு சிறப்புக் கூறு அதன் தேர்வு முறையாகும். இணையவழிக் கற்பித்தல் முறையில் தேர்வுகளும் இணைய வழியாகவே நடத்தப்படுகின்றன. இருப்பினும் எழுத்தறிவை முழுமையாகச் சோதித்தறியச் சில நேரங்களில் எழுத்துத் தேர்வுகளும் வைக்கப்பெறுகின்றன.
இணையவழித்தேர்வு என்பது மிகச் சிறந்த தேர்வு முறையாகும். இத்தேர்வை வீட்டில் இருந்தே எழுதலாம். தேர்வெழுத பொது இடத்திற்குக் குறிப்பிட்ட நேரத்திற்கு வருதல், காலதாமதம் ஏற்பட்டால் தேர்வில் பங்கேற்க இயலாமை போன்ற இன்னல்கள் இணையவழித்தேர்வில் களையப்படுகின்றன.
மேலும் இத்தேர்வில் தேர்வின் கால எல்லை சரியாக பின்பற்றப்படுகிறது. கணினியில் தேர்வைத் தொடங்கிவிட்டால் அதுவே முடிக்கும் நேரம் வரும் போது இயங்காமல் நின்று விடும். மேலும் கேள்வித்தாள் தேர்வு எழுதும் ஒவ்வொரு மாணவருக்கும் சுழல் அடிப்படையில் வேறுவேறாக அமையும் என்பதும் கவனிக்கத்தக்கது. இதன்மூலம் காப்பியடித்தல் என்ற பெருங்குறை தவிர்க்கப்படுகிறது. தேர்வு முடிந்த மறுநிமிடமே அதற்கான மதிப்பெண் முடிவையும் இணையவழித் தேர்வில் பெற இயலும். இதன்மூலம் மாணவர்கள் உடனடியாகத் தேர்வு முடிவுகளைத் தெரிந்து கொள்ளும் வாய்ப்பைப் பெறுகின்றனர்.

இத்தேர்வில் பங்கேற்க ஒருவகை அனுமதி எண்ணும் அதற்குரிய கடவுச்சொல்லும் தரப்படும். அதைப் பயன்படுத்தி குறிப்பிட்ட மாணவர் மட்டுமே தேர்வை எழுதமுடியும். இம்மாணவர்தான் தேர்வை எழுதுகிறாரா என இணையதள படக்காட்சிப்பதிவுக் கருவி மூலம் கவனித்துக் கொள்ள இயலும். இதன்வழி ஆள் மாறாட்டத்தையும் தவிர்க்கலாம்.
இவ்வகையில் பலவகைச் சிறப்புக்களைக் கொண்டதாக இணையவழிக் கற்பித்தல் முறை விளங்குகிறது.

தமிழ் தொடக்கக் கல்வி முறையைக் கற்பிக்கப் பல இணைய தளங்கள் தற்போது உள்ளன. பேச்சுத்தமிழ் கற்கவும், தமிழ் இலக்கணம் கற்கவும், தமிழ் எழுத்தொலிகளைக் கற்கவும் பல இணையத் தளங்கள் இலவசமாகவும், கட்டண அடிப்படையிலும் ¢ தற்போது கிடைக்கின்றன
இவற்றில் பெரும்பாலான இணையதளங்கள் மொழியியல் அடிப்படையில் தமிழைக் கற்பிக்கின்றன. இதன்மூலம் பிற மொழி தெரிந்த வளர்ந்த அறிவுடையவராலேயே தமிழைக் கற்க முடியும் என்ற நிலை ஏற்பட்டுள்ளது. சிறு குழந்தைகள் மொழியியலைப் புரிந்து கொண்டு மொழியைப் படிக்கவருவது என்பது இயலாத ஒன்று.

எனவே சிறு குழந்தைகள் முதல் வளர்ந்த வயதினர் வரை கற்கும் வகையில் பாடங்களை அமைப்பது மிக்க நன்மை தரும் என்பது இக்கட்டுரையாசிரியரின் கருத்து. இக்கட்டுரையாசிரியர் தமிழ் இணையப்பல்கலைக் கழகத்தில் உதவி இயக்குநராகப் டிசம்பர் 2004 முதல் பணியாற்றிவருகிறார். இவர் தமிழ் இணையப் பல்கலைக் கழகத்தின் இணையதளத்தில் தற்போது உள்ள துவக்கக் கல்விப் பாடங்களை மேம்படுத்துவதற்காகவும், துவக்கக் கல்வியின் அடுத்த நிலைப்பாடங்களைத் தயாரிக்கும் பணியிலும் தொடர்ந்து பணியாற்றி வருகிறார்.

அவர் தம் அனுபவத்தின்போது இக்கற்பித்தல் முறை வாயிலாகப் பெற்ற சில அனுபவங்களை இக்கட்டுரையில் உரைப்பது பொருத்தமுடையது.
தமிழ் இணையப்பல்கலைக் கழகத்தில் தமிழ் மொழியைக் கற்றுத்தரும் துவக்கக் கல்வி என்பது தமிழ்நாட்டுப் பாடநூல் நிறுவனத்தாரால் வழங்கப்பட்டுவரும் பள்ளிக் கல்வி பாடப்புத்தகங்களை அடிப்படையாகக் கொண்டு அமைக்கப் பெற்றுள்ளது. இப்புத்தகப் பகுதிகளை அப்படியே கையாண்டு கொள்ளாமல் மாணவர்தம் கற்கும் திறன்களை அளவிடும் முன்மாதிரி அளவுகோல்களாக அப்புத்தகங்கள் கொள்ளப்படுகின்றன. இதனடிப்படையில் புதிய பாடப்பகுதிகள் உருவாக்கிக் கொள்ளப் படுகின்றன.
இப்பல்கலைக் கழகத்தில் துவக்கக் கல்வி மூன்று பகுதிகளாக உள்ளது. முதற்பகுதி - மழலைக்கல்வி என்பதாகும். இக்கல்வி முறை தமிழ் கற்க விரும்பும் மாணவர்களுக்குத் தமிழ் மொழி குறித்த அறிமுகச் செய்திகளை வழங்கும் வகையில் பல்லூடக வசதிகளோடு அமைக்கப்பெற்றுள்ளது. இதனைக் கற்க எவ்விதப் பணமும் கிடையாது. இக்கல்விமுறை குழந்தைப் பாடல்கள், கதைகள், உரையாடல்கள், எண்கள், எழுத்துகள் என பல தரவுகளை உள்ளடக்கியது.

அடுத்த நிலை சான்றிதழ் என்றும், அதற்கு அடுத்த பகுதி மேற்சான்றிதழ் என்றும் வகைமை செய்யப்பட்டுள்ளன. இதற்கு அடுத்த நிலையில் பட்டப்படிப்பையும் இவ்வகையில் தொடரும் வாய்ப்பினைத் தமிழ் இணையப் பல்கலைக்கழகம் தந்து கொண்டிருக்கிறது.

சான்றிதழ்க்கல்வி என்பது முதல் ஆறு வகுப்புகள் வரையான எல்லையை உடையது. இக்கல்வி முறை மூவகைப்பட்டது. அவை பின்வருமாறு 1. அடிப்படை, 2. இடைநிலை, 3. மேல்நிலை என்பனவாகும். இப்பாடங்களை வடிவமைக்க வல்லுநர்க் குழு அவ்வப்போது அமைக்கப் பெறும். இவர்கள் தந்த பாடவடிவமைப்பு அவ்வப்போது இணையதளப் படுத்தப்படும். அடிப்படை நிலை என்பது தமிழகப் பள்ளிக் கல்வி நிலை அளவில் ஒன்றாம் இரண்டாம் வகுப்பு மாணவர்கள் படிக்கக் கூடியது. இதில் தமிழ் எழுத்துக்கள் பற்றி அறிந்து கொள்ளலாம். ’’ட’’ என்ற எழுத்தில் இருந்து ஆரம்பித்துப் படிப்படியாக எழுத்துக்கள் கற்றுத்தரப்பெறுகின்றன.

இடைநிலை என்பது தமிழகப் பள்ளிக் கல்வி நிலையில் மூன்றாம் நான்காம் வகுப்புகளுக்கு உரிய தர நிலையில் அமைக்கப் பெற்றுள்ளன.

இப்பாடப்பகுதியில் பேச்சுத்தமிழும் அறிமுகப் படுத்தப்பட்டுள்ளது. இப்பாடங்கள் எளிய நிலையில் புரிந்து கொள்ளும் வகையின.
மேல்நிலை என்பது ஐந்தாம் ஆறாம் வகுப்பு மாணவர்களின் தகுதி கருதியது. இதில் மொத்தம் 18 பாடங்கள் உள்ளன.

இம்மமூவகையும் கல்வித்திறன் ஊட்டும் வகையில் வடிவமைக்கப் பெற்றவை. இவற்றை இலவசமாகப் பார்வையிடலாம். சான்றிதழ் பெறவேண்டும் என எண்ணுவோர் அதற்கான கட்டணத்தைக் கட்டவேண்டும். இப்பாடங்களைக் குறுந்தகடுகள் வழியாகவும் இவற்றைப் பெறமுடியும். தற்போது மழலைக்கல்வி, அடிப்படை, இடைநிலை ஆகியன ஒவ்வொன்றும் நூறு ரூபாய்க்குக் கிடைக்கின்றன. இவற்றைக் காண்பதில் எவ்வித எழுத்துருச் சிக்கல்களும் இருக்காது.

தற்போது மேற்சான்றிதழ் நிலை ஒன்றுக்கான பாடங்கள் தயாராகி வருகின்றன. மேற்சான்றிதழ் என்பதும் மூன்று நிலைகளை உடையது. நிலை 1. ( 7,8 வகுப்புகளின்தரத் தகுதி ) நிலை 2. ( 9,10 வகுப்புகளின்தரத் தகுதி ), நிலை 3. ( 11,12 வகுப்புகளின்தரத் தகுதி ) என்பன அவை. இப்பாடத்தயாரிப்பின் போது சில சிக்கல் ஏற்பட்டன. எடுத்துக்காட்டிற்காகச் சில கூறி இக்கட்டுரையை நிறைவு செய்வது பொருத்தமுடையது.

பாடங்களில் வழக்குத் தொடர்களை, மரபுத்தொடர்களைப் பயன்படுத்துவதில், பழமொழிகளைக் கையாள்வதில் சிக்கல்கள் ஏற்படுகின்றன. ஏனெனில் வெளிநாட்டு மாணவர்களுக்கு இத்தொடர்களை அறிந்து கொள்வதற்கான வாய்ப்புகள் மிகக் குறைவு.

எடுத்துக்காட்டிற்காக ஒரு தொடர் இங்கு தரப்படுகிறது. ’’காஞ்சிபுரம் பட்டுச் சேலைகளுக்கு ஈடு இணை இல்லை’’ என்ற தொடர் பாட ஆசிரியரால் ஒரு பாடத்தில் தரப்பெற்றிருந்தது. இந்தத் தொடரை வெளிநாட்டு மாணவர்களுக்கு அறிமுகம் செய்வதில் சிக்கல் எழுகிறது. ஈடு என்பதற்கும் இணை என்பதற்கும் "equal" என்ற ஒரு பொருளே ஆங்கில அகராதிகளில் தரப்பெறுகின்றன. ஆங்கில வழியாக தமிழைக் கற்பித்தல் என்ற முறையில் இயங்கிவரும் இப்பாடத்திட்டங்;களில் ஈடு என்பதையும் இணை என்பதையும் வேறுபடுத்தி அறிவிக்க முடிவதில்லை. இச்சிக்கலைத் தீர்க்கச் சில வழிகளும் உள்ளன. பாடத்தில் பயன்படுத்தப்பெறும் மரபுத் தொடர்களை, வழக்குத் தொடர்களை, பழமொழிகளை விளக்குவதற்காகவே தனிப்பக்கங்கள் ஏற்படுத்தப்பெற்று அவற்றை விளக்கம் செய்தபின் பாடத்திற்குள் நுழையும் வண்ணம் செய்யப்படுவதால் இச்சிக்கலைத் தீர்க்கமுடிகிறது.

அடுத்து பாடங்களில் தமிழர் பழக்க வழக்கம் சார்ந்த பகுதிகளை, பண்பாட்டுச் செய்திகளை அறிமுகம் செய்வதிலும் சிக்கல் எழுகிறது. எடுத்துக்காட்டிற்காக இங்கு ஒன்று சுட்டப் பெறுகிறது. ’’தமிழ் விடு தூது’’ என்ற செய்யுள் பகுதி இடம்பெறும் பாடத்தில் ’’தள்ளிச் சிறலீர் கூடித் தாலாட்டி’’ என்ற பாடலடி வருகிறது. இப்பாடலடியை விளக்கும்போது தொட்டில், தாலாட்டுதல் முதலான குழந்தையை வளர்க்கும் தமிழர் பழக்க வழக்கங்களைக் கூற வேண்டியுள்ளது. வெளிநாட்டு மாணவர்கள் தாலாட்டுதல், தொட்டில் என்பதை அறிந்திருப்பரோ என்ற ஐயம் ஏற்படுகிறது. எனவே இச்சிக்கலைத் தீர்க்க தொட்டில் குறித்த அசைவுப்படக்காட்சிகள், தாலாட்டுதல் குறித்த அசைவுப்படக்காட்சிகள் பாடங்களில் தரப்பட்டு இச்சிக்கலும் தீர்க்கப்பட்டது.
தமிழ் இலக்கணங்களைக் கற்பித்தலிலும் பல சிக்கல்கள் உள்ளன. பயன்பாட்டு நிலையில் பயன்படும் தமிழ் இலக்கணங்களைச் சொல்லித்தருவதில் சிக்கல்கள் எழுவதில்லை. ஆனால் பயன்பாட்டில் இல்லாத வழக்கொழிந்த இலக்கணக் கூறுகளை இணையவழிக் கற்பித்தலில் சொல்லித் தரும்போது சில சிககல்கள் ஏற்படுகின்றன. எடுத்துக்காட்டிற்கு உரிச்சொல் என்ற இலக்கணக் கூறைக் கற்பிக்கும்போது ஏற்படும் சிக்கலைக் கூறலாம். தற்போது உரிச்சொற்கள் அதிகமாக மக்களால் பயன்படுத்தப்படுவதில்லை. ஏனவே பழைய ‘‘கடி’’ முதலான எடுத்துக்காட்டுகளையே உரிச்சொல்லுக்குச் சொல்ல வேண்டி உள்ளது. இவற்றைத் தவிர்த்துவிட்டுப் பாடத்தை நகர்த்தவும் முடியாது. இந்தச் சிக்கலையும் பல முறை வழக்கொழிந்த இலக்கணங்களை மாணவர்க்கு அறிவிக்கும் நிலையில் தீர்க்க இயலும். இதன்மூலம் மாணவர்கள் மீண்டும் நினைவாற்றல் பெறும் கல்விமுறைக்கே தள்ளப்படுகின்றனர்.

இவை போல பல சிக்கல்கள் இணையவழிக் பாடத் தயாரிப்பில் உள்ளன. இவை விரிப்பின் பெருகும். இவ்வகைச் சிக்கல்களை ஓரளவு நீக்கி தமிழ் இணையப்பல்கலைக்கழகம் பாடத்திட்டங்களைத் தயாரித்து வருகிறது.
தமிழ் இணையப்பல்கலைக்கழகம் நடத்தும் இப்பாடத்திட்டங்களைத் துவக்கக்கல்வி ஆசிரியர்கள் அறிந்து தம் மாணவருக்கு அறிவிக்க வேண்டும். அக்காலம் விரைவில் வரவேண்டும்.

தமிழகத்தில் தமிழ்மொழிக் கல்வி பெறாமல் தடைபடுத்தப்பட்டவர்களும் தமிழ் இணையப் பல்கலையில் இணைந்து தமிழ்க்கல்வியைப் பெற இயலும். சான்றிதழைப் பெற முடியும். அக்காலமும் விரைவில் வரவேண்டும்.
அதற்கு உதவும் வகையில் தமிழ் இணையப் பல்கலைக் கழகம் செயலாற்றி வருகிறது. அதன் இணையத்தள முகவரி tamilvu.org

அதன் இருப்பிட முகவரி - தமிழ் இணையப்பல்கலைக்கழகம், எல்நெட் மென்பொருள் நகரம், நான்காம்தளம், தரமணி சென்னை- 113
தமிழ் இணையப்பல்கலைக் கழகம் அதன் செயல்பாடுகளை அவ்வப்போது பயிற்சிப் பட்டறைகள் மூலமாகவும் தெரிவித்து வருகிறது. இவ்வகைப் பட்டறைகளை நடத்தத் தமிழ் இணையப் பல்கலைக் கழகம் ஒரு கை தர தயாராக உள்ளது. மறு கை தர தங்களை அழைக்கிறோம். நம் இரு கைகளும் இணைந்து கூடி, கைகள் தட்டித் தமிழ் பரப்புவோம்.

தமிழ் இணையப்பல்கலைக்கழகம்

தமிழ் இணையப்பல்கலைக்கழகம்

சென்னை தரமணியில் இயங்கும் இந்நிறுவனம் தமிழறிவை உலகம் முழுவதும் வளர்க்கும் செயல்பாடுகளைச் செய்து வருகிறது.

இதன் முகவரி tamilvu .org

இத்தளத்தில் மின் நூலகம் ஒன்று உள்ளது. இதில் ஏறக்குறைய 200 நூல்கள் கிடைக்கின்றன. இவை அனைத்தும் பொதுமக்கள் பார்வைக்கு எவ்வித செலவும் இல்லாமல் கிடைக்கிறது. மேலும் இதில் தேடுதல் வசதிகள் உள்ளன. ஒரு ஒரு பக்கமாக நூலைப் பார்க்கத் தேவையில்லை, தேவையான பாடலை பக்கத்தை சொல்லை விரைவில் சென்றடைய முடியும்.

மேலும் மழலைக் கல்வி என்றொரு பகுதி உள்ளது. இதில் குழந்தைகளுக்கான பாடல்கள் கதைகள் பயிற்சிகள் உள்ளன. இதன் மூலம் தமிழ் அறியாக் குழந்தைகள் கூட தமிழ் அறிய முடியும்

இந்தக் கல்வித் திட்டம் பள்ளிக்கல்வி கல்லூரிக்கல்வி முதுகலைக் கல்வி என வளர்ந்து வருகிறது

"சொல்’’

மு.பழனியப்பன்

தெரியாமல் செய்யும் சின்ன சேட்டைகள் பெரிய பாதிப்புகளை ஏற்படுத்தி விடுகின்றன, ஸ்ரீராமன் தெரியாமல் செய்த சின்ன சேட்டைதான். வில் வளைக்கும் வயதில், கூனி முதுகில் அவன் விட்ட அம்பு, சொல்லம்பாகி சோகம் தந்தது, நினைக்க, நினைக்க இதுபோல் பல கதைகள் தோன்றும், என்றாலும் இன்று காலையில் என் வாய் தவறி வந்த சொற்களுக்கு வலிமை இருக்குமா என்ன?
சொல்லியிருக்கக் கூடாது, வார்த்தைகள் என்னை அறியாமல் விழுந்துவிட்டன,
அலுவலகத்திற்கு சைக்கிளில் போகும் வழக்கம் என்னுடையது, இந்த சைக்கிள் பயணத்தால் பல பயன்கள் உண்டு, ஒன்று பெட்ரோல் மிச்சம், யாரும் அலுவலகத்தில் கடன் கேட்க இயலாது, கேட்டாலும் "காற்று இல்லை,டியூப் வீக்" என பல பதில்கள் தயார்,
மோட்டார் சைக்கிள் பயணம் என்றால் கடன் கேட்பவர் "பெட்ரோல்தானே போட்டாப்போச்சு " என்று இருக்கிற ரிசர்வையும் உறிஞ்சு விட்டு, ஊர் சுற்றி விட்டு வந்து "இல்ல பாஸ், நேரம் ஆயுடுச்சி, கோபிச்சுக்காதிங்க,, இந்தாங்க பணம்" என்று தந்தும் தராமலும் வழிவார், "அவரிடம் பணம் பெறுவது அவ்வளவு நல்லா இருக்காது" என நாமும் பணத்தை வாங்க மறுப்போம், அடுத்த முறையும் அவர் கூச்சமின்றி வண்டி கேட்டு வந்து நிற்பார், இந்தத் தொல்லைகளுக்குப் பயந்துதான் என் பயணம் சைக்கிள் பயணம்,
மேலும் என் எடையில் குறிப்பிட்ட அளவைக் குறைக்கச் சொல்லி மனைவி தினம் துதி பாடுகிறாள், அவள் எதற்காக எடை குறைக்கக் கூறுகிறாள் என்பது எனக்கு மட்டுமே தெரிந்த விசயம், உங்களுக்குத் தெரிந்து இருந்தால், உங்கள் மனைவியும் துதி பாடுகிறார் என்று அர்த்தம், அந்த எடை குறைப்பு நடவடிக்கையின் ஒரு பங்காகவும் இந்த வெற்றிப் பயணம் தொடர்கிறது,
அலுவலகத்திற்குச் சைக்கிளில் போவது என்பது எளிதான செயல் அன்று, அதுவும் சென்னை போன்ற மா,,,,நகரங்களில் இது சற்று இம்சைக்கு உரிய அல்ப விசயமே, மோட்டார் சைக்கிளில் போகும், நம்மைவிட அழகான பெண்கள் நாம் ஏதோ குறைந்தவர்கள் போல வேகமாகக் கடந்து போவார்கள், அவர்களின் கழுத்தாடை, நமக்கு டா,,டா, சொல்வது போல் இருக்கும், கார் கனவான்கள் நம்மை ஜந்துவாகப் பார்ப்பார்கள், பேருந்துப் பயணிகள் சாய்ந்து தூங்கி நம்மைக் கிண்டல் செய்வார்கள்,
சைக்கிளிலில் போகும் நம்மை ஆட்டோவின் பையிங்,,,, பையிங் ஒலிப்பான் ஓசை மிரளச்செய்யும், சாலையை அடைத்துப்போகும் நகரப் பேருந்து நம்மை கடக்கவும் விடாது, தயங்கி நிற்கவும் விடாது, வளைவுகள் எதிரிகளாகும்,, ஏனெனில் எதிரில் வருபவர் என்ன நினைப்பில் வருகிறார் என்பது நமக்குத் தெரியாதல்லவா?
இத்தனை இன்னல்களுக்கிடையில் மழை வந்தால் இன்னும் தொந்தரவு, வெயில் அடித்தால் மயக்கம் ஆட்கொள்ளும்,, மழை வந்தால் எருமை மாடாக வேண்டும், இப்படி இப்படி கடந்து வந்து அலுவலகம் சேர்ந்தால் நமக்குப் பணப்பட்டுவாடா செய்யும் கணக்குத்துறை உதவியாளர், மாருதி 800 ல் வந்து இறங்கிக் கேட்பார் " சார் லேட்டாகவில்லையே?" என்று,,,, நேரந்தான், அவர் மாமியார் வீடு வாங்கித் தந்த கார் அது, இண்டேன் காஸ்ஸில் தண்ணீராய் ஓடுகிறது,, நமக்கு ஏது பாக்கியம், கார் நிறுத்தக் கூட இடமில்லை,
இராமாயணக் கதை நினைவுக்கு வந்தாலும், சைக்கிள் சோகம் கூறினாலும்,,,,
அந்த வார்த்தைகளை என் மனம் கூறியிருக்கக் கூடாது, எப்படி என் மனம் இத்தகைய வார்த்தைகளைக் கூறியது? அந்த அளவுக்கு அது துன்பப்பட்டதா?
"அவன் பொண்டாட்டி தாலி அறுக்க’’ இது கூறும் அளவிற்கு ஒன்றும் பெரிய தவறு நிகழ்ந்து விடவில்லை,
என்றும் போல் அன்றும் சைக்கிள் சவாரி, அலுவலகம் நோக்கி,,,,சரியாக 20 நிமிடத்தில் அலுவலகம் அடைந்து விடலாம், எனினும் அன்று சோதனை, நான் கிளம்பியதே நேரம் கழித்துத்தான், பத்து நிமிடங்கள் மட்டுமே கையில்,. சாலை முழுவதும் ஊர்திகளின் திக்குமுக்காடல், நேற்று பெய்த மழையில் சாலைகளில் தண்ணீர்க் குட்டைகள்
இடம் கிடைத்த இடைவெளியில் நுழைய முற்பட்டேன், வேகமாக முன்னேறினேன், ஊர்திகளும் தடைபட்ட வெள்ளம் திறந்து விட்டதுபோல விரைந்தன, ஒன்றன் பின் ஒன்றாய்ப் போனபின் நிதானம் வந்தது,
இன்னும் பத்து நிமிடங்களில்,,,, அலுவலகக் கட்டிடம் தென்பட்டுவிட்டது, ஐயோ,,,, என் வெள்ளைச்சட்டையில் பேருந்து ஒன்றின் சக்கரத்திலிருந்து புறப்பட்ட சேற்றுநீர்த் தெறிப்புகள்,,,, மெல்ல நுழைந்து பரவி உலகப்படம் வரையப் பெற்றிருந்தது,, ஆஸ்திரேலியா எனது வேட்டியிலும் தெரித்தது,
மனத்திலிருந்து பீறிட்ட சொற்களின் வேகம் "அவன் பொண்டாட்டி தாலி அறுக்க’’
தெரியாமல் செய்யும் சின்ன சேட்டைகள் பெரிய பாதிப்புகளை ஏற்படுத்தி விடுகின்றன, ஸ்ரீராமன் தெரியாமல் செய்த சின்ன சேட்டைதான். வில் வளைக்கும் வயதில், கூனி முதுகில் அவன் விட்ட அம்பு, சொல்லம்பாகி சோகம் தந்தது, நினைக்க, நினைக்க இதுபோல் பல கதைகள் தோன்றும், என்றாலும் இன்று காலையில் என் வாய் தவறி வந்த சொற்களுக்கு வலிமை இருக்குமா என்ன?
வார்த்தைகளுக்கு வலிமை இருந்து பேருந்து ஓட்டுநர் மனைவி தாலி அறுத்துவிடுவாளோ?, பேருந்து ஓட்டுநர் இறந்தே போவாரோ?
ஒருவேளை அவர் மனைவியை இழந்தவராக இருந்தால்,,,, இந்த சிந்தனை இன்னும் மோசம், கைப்பையில் வைத்திருந்த குடிநீர் கொண்டு சட்டையில் இருந்த உலகப்படத்தை அழித்தேன், சேறு போனது,, ஆனால் தேசங்களைப் பிரிக்கும் எல்லைக் கோடுகள் மறையவில்லை,
----

முளைத்த பல்

மு. பழனியப்பன்

புத்த பிரானின்
தங்கப் பல்லைத்தடவிப் பார்த்ததைப் போல
அக மகிழ்ந்தாள் மனைவி.
அலுவலகக் கோப்பிற்குள்கிடந்த
என்னைஉசுப்பியதுதொலைபேசியின் முனகல்
மறுமுனையில் மனைவியின் குரல்
பல் முளைத்துவிட்டதாம்குழந்தைக்கு
மகிழ்வின் உடன் நொடியைப் பகிர்ந்து கொள்கிறாள் மனைவி
கேட்டதும்
சிறுமின்னல் எனக்குள்
அலுவலக பொதுப் பேசி
அதனால்மகிழ்ச்சி எல்லோருக்கும் பரவியது
மென்மை உதடுகள்
ஈறு வரம்பில்புதிய பல்லின் சிறுமுனைவந்தும் வராமலும்விரல் வைத்தால் கடிக்க முனைகிறாள்
உள்ளம்வளர்ச்சிக்கு ஏங்குகிறது.

அவசரம்

மு பழனியப்பன்

பரபரப்பான சாலை
முந்துதலில்
பறந்து போன தொப்பி
பேருந்தின்
நெருக்க வேதனையில்
படியில் பயணம்
பறிபோன ஒற்றைக்கால் செருப்பு
அலுவலக வேலை
நேரம் முடிந்ததும்
விரட்டும் இரவுக் காவலாளி
ரயில் வர
பாதி குடித்த டீ
பொதுக் கழிப்பிடம்
அடுத்தவன் தீண்டுதலில்
அதிர்ந்துபோய்
வெளியேறி
வாங்க மறந்த சில்லறை
நேரத்தை மட்டும்
குறை சொன்னால் போதாது
அவசரத்திற்கு
அத்தியாயங்கள் நூறு எழுதலாம்.----
muppalam2003@yahoo.co.in

வேண்டிய உலகம்

மு பழனியப்பன்

1 வயது சிறு குழந்தை
அலுவலக நேரங்கள் தவிர
அவளோடு
உண்ணத் தயாராக்குவது
தயாராவது
உறங்கத் தயாராக்குவது
தயாராவது
வாரம் ஒரு கோவில், தினம் ஒரு ஷாப்பிங்
எனும் தமிழக வாழ்க்கை


காசிக்கு டிராவல்ஸ்ஸில்
பயணம்
போய் வந்ததோடு
இராமேஸ்வரம் முதன் முறையாய்

கோதுமை சப்பாத்தி
வறட்டிட இட்லிக்கு ஏங்கும்

மஞ்சள், குங்குமம், வண்ணப் பட்டாடை
உலவும் இந்திய வாழ்க்கை

குழந்தைகளை விட வேலை பெரிதெனும் கணவன்
கணவனுக்கு உதவவேண்டும் மனைவி
மனைவிக்கு உதவி வேண்டாம்,
ஆண் உலகம் (அல்லது) ஆசிய வாழ்க்கை

அமெரிக்க நண்பன் இமெயில்
இங்கிலாந்து நண்பன் ஐஎஸ்டி போனில்
உள்«ளுர் நண்பன் செல்லில்
விரிகிறது உலக வாழ்க்கை

உள்ளங்கையில் உலகம்
வியப்பாய்த்தான் இருக்கிறது
வேண்டியவர்களின் உலகம்

இரு கவிதைகள்
மு. பழனியப்பன்

விஷயம்

விஷயம் இல்லாதவர்கள் இல்லை,விஷயம் தெரியாதவர்கள் உண்டு,
எழுதத் தெரிவதுபடித்து நினைவில் இருத்துவதுகணக்கு போடுவதுவருமானவரிக்கு ஏற்ப சேமிப்பது
குறைந்த செலவில் அதிக வசதிதேவைக்கு ஏற்ப மனிதர்களின் பழக்கம்வேலையை முடிக்க குழைவு
இப்படிப் பலப்பல விஷயங்கள்இதைத் தெரியாதவர்கள் இருக்கலாம்ஆனால் விஷயம் இல்லாதவர் எவரும் இல்லை
புத்தித் தௌ¤விலும் புத்திக் கூர்மையிலும்வேகம் கூடலாம் குறையலாம்
விஷயம் சொல்லித் தெரிகிற விஷயம் இல்லைசொல்லாமல் அறியப்படுகிற விஷயமும் இல்லைஇரண்டுக்கும் இடையில் சிக்கிக் கொண்டிருப்பது
இது இது விஷயம் எனத்தௌ¤வு பிறக்காமலேவிஷயம் விஷயமாக இருக்கிறது
எனினும் மனிதர்கள் விஷயமாக இருக்கிறார்கள்

--------------------------------------------------------------------------------

வில் + அங்கம் = வில்லங்கம்

வில்லங்கமானஆட்களைப் பற்றிய விபரக்குறிப்பு இது
இவர்கள்அறிமுகமாகும் போதுமிக மென்மையானவர்களாகத் தோன்றக் கூடும்
விபரங்களைச் சேகரிப்பார்கள்
தேவையானவை கிடைக்கும்வரை மௌனம்இவர்களின் மொழியாகும்
பாரட்டுக்களை எதிர்பார்க்க முடியாது
தேவையானவை கிடைக்காவிட்டால்மென்மை வன்மையாகும்விபரங்கள் விபரீதமாகும்மௌனம் வெடித்துச் சிதறும்
ஒவ்வொருவருள்ளும் இவைநிகழலாம்
ஏனென்றால் வில்லங்கம்பழிவாங்கலின் தொடக்கம்

சேதிராயர்

முனைவர் மு. பழனியப்பன்

பன்னிரு திருமுறைகளில் இசைப்பா என்று இசையின் பெயரால் அழைக்கப்பெறும் திருமுறை திருவிசைப்பா ஆகும். இது ஒன்பதாம் திருமுறையின் ஒரு பகுதியாகும். இதனுடன் சேந்தனார் அருளிய திருப்பல்லாண்டும் இணைந்து இத்திருமுறை முழுமை பெறுகின்றது.
சம்பந்தர், அப்பர், சுந்தரர், மாணிக்கவாசகர் ஆகிய சமயக்குரவர்களின் பாடல் தொகுப்புகளுக்கு அடுத்தநிலையில் திருவிசைப்பா, திருப்பல்லாண்டு அமைக்கப் பெற்றிருப்பதன் வழியாக இத்திருமுறையின் பெருமையை உணர்ந்து கொள்ள இயலும்.
இந்த ஒன்பதாம் திருமுறை- திருமாளிகைத்தேவர், சேந்தனார், கருவூர்த்தேவர், பூந்துருத்தி நம்பிகாட நம்பி, கண்டராதித்தர், வேணாட்டடிகள், திருவாலியமுதனார், புருடோத்தமர், சேதிராயர் ஆகிய ஒன்பது அருளாளர்களால் பாடப்பெற்றதாகும். ஒன்பது அருளாளர்கள்- ஒன்பதாம் திருமுறை என்ற எண் பொருத்தம் கருதியும் இத்தொகுப்பு இவ்வரிசையில் வைக்கப் பெற்றிருக்கலாம்.
மேலும் காந்தாரம், புறநீர்மை, நட்டராகம், இந்தளம், பஞ்சமம் ஆகிய தேவாரப்பண்களே இத்திருமுறையிலும் கையாளப் பெற்றுள்ளது. இத்திருமுறையில் சாளரபாணி என்ற பண் மட்டும் புதிதாய் பயன்படுத்தப்பெற்றுள்ளது.
இத்தொகுப்பில் 301 பாடல்கள் அடங்;கிய 29 பதிகங்;கள் உள்ளன. திருவிசைப்பாவின் நிறைவுப் பதிகமாக அமைவது சேதிராயர் அருளிய ’சேலுலாம்’’ எனத் தொடங்கும் பதிகமாகும். இப்பதிகம், தில்லைக் கோயில் இறைவனைப் போற்றிப் பாடுவதாக உள்ளது. இப்பதிகம் திருவிசைப்பாவின் ’திருக்கடைக்காப்புப் பதிகம்‘என்ற பெருமைக்கும் உரியதுமாகும்.
இப்பதிகம் பத்துப்பாடல்களைக் கொண்டது. அந்தாதி யாப்புடையது, நான்கடிகள் கொண்ட இப்பதிகப் பாடல்கள் இறுதியடியில் ஒரு சீர் குறைந்து வருமாறு பாடப்பெற்றுள்ளன, இவ்வமைப்பு இசைப்பாடலுக்கு உரியது என்பர் இசை வல்லுநர்கள்.
இக்கட்டுரை இப்பதிகத்தை அருளிய சேதிராயர் குறித்தும், அவரின் அருட்பதிகச் சிறப்பு குறித்தும் ஆராய்வதாக உள்ளது.
சேதிராயர்
’’ஏயு மாறு எழில் சேதிபர் கோன் தில்லை
நாயனாரை நயந்துரை செய்தன‘‘
என்ற அடிகள் பதிகத்தின் பத்தாம் பாடலில் இடம்பெறுகின்றன. இங்கு சேதிராயர் ’சேதிபர்கோன்‘’என விளிக்கப் பெற்றுள்ளார். இதன் வழியாக இவர் அரசர் என்பது தௌ¤வாகின்றது.
’சேதி’’ என்பது குலப்பெயர் ஆகும்.
’’முதற்குலோத்துங்கன் (1070-1120) காலத்தில்(லும்) இராசராசசேதிராயன், இராஜேந்திர மலையமான் என்று பட்டம் தரித்தவர்கள் திருக்கோவிறலூர், கிளியூர் ஆகிய நகரங்;களைத் தலைநகராகக் கொண்டு வாழ்ந்திருக்கிறார்கள். இதனால் 11-12 ஆம் நூற்றாண்டுகளில் சேதிராயர் குறுநிலமன்னராய்ச் சோழரின் கீழ் வாழ்ந்தமை தௌ¤யப்படும். இவர்களுள் திருவிசைப்பாப் பாடியவ்ரும் ஒருவர‘‘(மு. அருணாசலம், திருவிசைப்பா திருப்பல்லண்டு பாவும் பயின்ற நிலையும், சென்னைப் பல்கலைக்கழகம், 1974, ப. 126-127) என்ற குறிப்பின்படி சேதிராயரின் மரபுவழி பெறப்படும்.
திருக்கோவலூரில் வாழ்ந்த மெய்ப்பொருள் நாயனாரும் சேதி நாட்டைச் சார்ந்தவர் என்ற பெரியபுராணக் குறிப்பு இங்;கு ஒப்புநோக்கத்தக்கது. மேற்கண்டவற்றின் வழியாகச் சேதிராயர் திருக்கோவகரலூர் நகரைத் தலைமையிடமாகக் கொண்டு, சோழமன்னர்களின் ஆளுகைக்கு உட்பட்டு குறுநிலமன்னராக அரசாண்டவர் என்பது பெறப்படுகின்றது. இச்சேதிராயர் சைவ சமயம் சார்ந்து, தில்லைப்பதியை வணங்கி, திருமுறை தந்த பெருமைக்குரியவரும் ஆகின்றார்.
சேதிராயரின் பக்திச்சிறப்பு
இவர் தில்லையுள் உள்ள பெருமானைப் பதிகப் பாடல்தோறும் போற்றிப் பரவுகின்றார். அவ்வாறு போற்றிப் பரவும் தில்லைச் செய்திகளைத் தொகுத்துக் காண்கையில், பொது முடிவுகள் சிலவற்றைப் பெறமுடிகின்றது.
’’சேலுலாம் வயல் தில்லை உளீர்’’(1)
’’சேணு தற்பொலி தில்லையுளீர்’’((2)
’’சீரியல் தில்லையாய்ச் சிவனே’’((3)
’’செம்மலோர் பயில் தில்லை உளீர்’’((4)
’’செயலுற்றார் மதில் தில்லை உளீர்’’((5)
’’தில்லை வாதித்தீர் என் மடக் கொடியை’((6)
’’சிறைவண்டார் பொழில் தில்லையுளீர்’’((8)
’’தென்றலார் பொழில் தில்லையுளீர்’’(9)
’’தில்லை நாயனார்’’((10)
இவ்வாறு தில்லையைப் பாடல்தோறும் விளிப்பதன் மூலம் இவர் தில்லையின் மீது கொண்டுள்ள பக்தியை உணரமுடிகின்றது.
தில்லை நகரின் நிலப்பெருமை, நிலத்துள்ளோர் பெருமை, ஈசன் பெருமை ஆகிய மூன்று நிலைகளில் இவர் தில்லையைப் பெருமைபட கண்டுள்ளார்.
’கெண்டை மீன்கள் வாழும் வயல்கள் கொண்டது தில்லை (1), சிறகுகளை அசைத்துத் தேன் உண்ணும் வண்டுகள் நிறைந்த பூங்காக்களை உடையது தில்லை (8), தென்றல் உலாவும் சோலைகளை உடையது தில்லை(9)‘¤ ஆகிய பகுதிகள் தில்லையின் நிலவளத்தைக் கூறுவன.
’வான் முகட்டைத் தொடும் அளவிற்கு மதில்களை உடையது தில்லை(2), நுட்பமான வேலைப்பாடுகள் அமைந்த மாளிகைகளை உடையது தில்லை (5)‘ என்பன தில்லைநகரின் அமைப்பை, அழகைக் கூறுவன.
’பெருமை உடைய சான்றோர்கள் பயில்கின்ற இடம் தில்லை (4), மிக்க சிறப்புடைய தில்லை(6)‘ என்பன- தில்லையில் வாழ்பவரைக் குறிக்கும் அடிகள் ஆகும்.
’தில்லை வாதித்தீர் (6), தில்லைநாயனார்(10)‘ ஆகியன தில்லையில் வீற்றிருக்கும் எம்பெருமானைக் குறித்த பகுதிகளாகும்.
நிலங்களின் அமைப்பு, நகர அமைப்பு, நகர மாந்தர் திறம், நகரத்துள்ள சிவன் திறம் ஆகியனவற்றை ஒரு வழிப்போக்கர் முதன் முதலாகத் தில்லையை ஆர்வம் கொண்டு காணும் நிலையில் சேதிராயர் கண்டு பாடியுள்ளார்.
சேதிராயர் தில்லைப்பதியைக் காணும் விருப்பம் கொண்டு தன் நகரமான திருக்கோவ்லலூர் விட்டுக் கிளம்பியிருக்க வேண்டும். முதன்முதலாகத் திருக்கோவலூர் விட்டு தில்லைப் பதிக்கு மன்னர் குலத்தவரான சேதிராயர் எழுந்தருளிய சூழலில், அதற்கான அனுமதியை அப்பகுதி மன்னரிடம் பெற்றபின் தில்லைக்குள் நுழைந்திருக்க வேண்டும்.
அவ்வாறு நுழைந்த இவர் அரசர் என்பதால் தில்லை நகர அமைப்பை, மாந்தர் நிலையைக் கண்டு வியந்திருக்க வேண்டும். அதன் வெளிப்பாடுதான் இப்பதிகம் என்பது மேற்கண்ட தில்லை வருணனைகள் வாயிலாக வெளிப்படுகின்றது.
பாடலின் கூற்று
இப்பத்துப்பாடல்களும் செவிலி கூறுவனவாக அருளப்பெற்றுள்ளன. அகப்பாடல் மரபில் தலைவியின் காதல் வருத்தம் கண்ட தோழி -செவிலிக்கும், செவிலி -நற்றாய்க்கும் தலைவியின் காதலை மொழிவது அறத்தொடு நிற்றல் என்னும் துறையாக கொள்ளப்படுகின்றது. அத்துறையில் இப்பாடல்கள் பாடப்பெற்றுள்ளன.
தோழி செவிலிக்கும், செவிலி நற்றாய்க்கும் அறத்தொடு நிற்கும்
இம்முறை இப்பதிகத்துள் சற்று மாறுப்படுத்தப் பட்டுள்ளது.
தலைவியின் வருத்தத்தைக் கண்ட செவிலி தானாக முயன்று -அவள்
காதலையும், அவளின் காதலனையும் அறிந்துகொள்கிறாள். அறிந்த அவள்
நற்றாயிடம் சென்று அறத்தொடு நிற்காமல், காதலைத் தந்த தலைவனிடமே சென்று
திருமணம் செய்து கொள்ளக் கூறி வரைவு (திருமணம்) கடாவுகிறாள்.
வரைவு கடாதல் என்னும் தோழியின் செயலை இங்குச் செவிலித்தாய் செய்கிறாள். நற்றாயிடம் அறத்தொடு நிற்க வேண்டிய செவிலித் தாய், அவ்வாறு நிற்காமல் காதலனிடம் சென்று கூறுவதாக -இப்பதிகத்துள் மாற்றமடையச் செய்திருப்பதன் நோக்கம் என்ன? என்று வினா எழுப்பினால்க்ஷ ’சிவனே உயிர்களுக்கு நற்றாய் போன்றவன் அவனே உயிர்களை ஈடேற்றுவான்‘ என்ற பதில் கிட்டும்.
எனவே தலைவனாகவும், நற்றாயாகவும் -இங்;கு உயிர்களுக்கும், ஆன்மாக்களுக்குத் தில்லைச் சிவன் விளங்கும் காரணத்தால் சேதிராயாரால் படைக்கப்பெற்ற செவிலி- இறைவனான தலைவனிடம், நற்றாயிடம் தன் மகளின் (ஆன்மாவின் ) குறையை நேர்கிறாள். சேதிராயர் செவிலியாக விளங்கி இங்கு உயிர்களை உய்விக்கும் வண்ணமாக இப்பதிகம் பாடப்பெற்றுள்ளது என்பது கவனிக்கத்தகது.
தலைவன், நற்றாய்- தில்லைச்சிவன்
செவிலி - சேதிராயர்
தலைவி - உலகஉயிர்கள் (ஆன்மா)
இவ்வாறு அகத்துறையில் இப்பதிகம் அமைந்து சிறக்கின்றது.

தலைவியின் வருத்தம்
’’தலைவி காதல் மயக்கம் பெற்றள்ளாள்(1), நாணம் உற்றனள்(2), அழுகிறாள் (3), விம்மி விம்மியே வெய்து உயிர்த்து ஆளெனா உம்மையே நினைந்து ஏத்துகிறாள் (4), ஒன்றும் ஆகிலள் (4), அயர்வுற்றாள்(5), அஞ்சலி கூப்பினாள் (5), அந்தோ என்னை உய்யச் செய்ய கொன்றை மாலை தந்து அருள்வாய் (5), மையலுற்றாள்(6), கிளியோடு பேசுவாள்(6), ’என்று முடியும் நீர் செய்த மயக்கம்‘ என அரற்றுவாள் (7), என்னை வாதை செய்யேல் (8), உம்பொருட்டால் ஒன்றும் ஆகிலன் (9) ‘‘ ஆகிய பகுதிகள் தலைவியின் வருத்தம் கூறும் பகுதிகளாக இப்பதிகத்தில் விளங்குகின்றன.
இப்பகுதிகள் தலைவிக்கு உரியன போல் தோன்றிடினும் ஒவ்வொரு உயிரும் ஆண்டவனை அடைய- படும் துயரங்கள் இவைஆகும். விம்மி விம்மி அழுதல், அஞ்சலி செய்தல், மயக்கம் பெறல் ஆகியன ஆன்மாவிற்கே உரியன. இதன் மூலம் ஆன்மாவிற்கான குறியீடாக இங்;கு தலைவி காட்டப்பெற்றுள்ளாள் என்பது தௌ¤வாகின்றது.
அகத்துள் புறம்.
அகச்சுவைப்பாடலான இப்பதிகத்துள் ஆண்டவனின் புறச் செயல்கள் காட்டப்பெற்றுள்ளன. இதன் மூலம் அகமும் புறமும் நிறைந்த அழகு மிகு பாக்களாக இப்பதிகப்பாடல்கள் விளங்;குகின்றன. ஆண்டவனின் வீரச் செயல்கள் பின்வருமாறு.
1) ’’வேலையார்விடம் உண்டுகந்தீர் (1)
-(ஆலகாலவிடம் அருந்துதல்)
2) மால்கரி ஈருரித்தெழு போர்வையினீர் (3)
-(யானையின் தோலைப் போர்த்தல்)
3) சேதித்தீர் சிரம் நான்முகனை (6)
- (பிரம்மாவின் தலை ஒன்றைக் கொய்தல்)
4) பகைத்தார் புரம் இடிய செஞ்சிலைக் கால் வளைத்தீர் (7)
- (திரிபுரம் அழிக்க மேருவை வில்லாக்கி
நாணேற்றல்)
5) பன்றிப்பின் ஏசிய மறவனே (6)
-(அர்ச்சுனனுக்குப் பாசுபதமருள பன்றியின்பின்
ஏகுதல்)
6) அருக்கனைப் பல்லிறுத்து (9)
-சூரியனின் பல்லை அறுத்தல்
7) ஆனையைக் கொன்று (9)
-தாருகவன முனிவர்களின் யானையைக் கொல்லல்.
8) காலனைக் கோளிழைத்தீர் (9)
-மார்க்கண்டேயனுக்காக யமனை உதைத்தல்.
ஆகிய சிவபொருமானின் அட்ட வீரட்ட செயல்களும் இங்கு எடுத்துக்காட்டப் பெற்றுள்ளன. அகப்பாடலுள் புறச்செய்திகள் கலந்து வருவதிலும் ஓர் அழகு உள்ளது என்பதை இப்பாடல்கள் விளக்குகின்றன.
சிவபெருமானின் திருநாமங்கள்
தில்லைப்பதியில் விளங்கும் பெருமானை அழைத்த சேதிராயர், பொதுவாகவும் அவனது திருநாமங்;களைப் பதிகப் பாடல்களில் தந்துள்ளார்.
மாதோர் கூறன் (6), வண்டார் கொன்றை மார்பன் (6), அறவன் (8),மறவன்(8) ஆகிய பெயர்கள் சேதிராயரால் சிவபெருமானுக்குத் தரப்பெற்ற பெயர்களாகும். இவற்றைத் தலைவி கூறுவதாக சேதிராயர் படைத்துள்ளார்.
இவ்வாறு இப்பதிகம் அகத்துள் புறத்தையும், அகத்துள் பக்தியையும் கலந்து தந்து சிறப்பதாய் உள்ளது. மேலும் இப்பதிகத்தின்வழி இதனை அருளிய சேதிராயர் காதலாகி, கசிந்து கண்ணீர் மல்கிச் சிவனிடம் பக்தி செலுத்தும் அன்பர் என்பதும் தௌ¤வாகின்றது.
அவரின் ஓர் அருட்பாடலுடன் இக்கட்டுரை நிறைவு செய்வது பொருத்தமாகும்.
’’அறவனே‘ அன்று பன்றிப் பின்ஏகிய
மறவனே‘ எனை வாதைசெய் யேல்எனும்
சிறைவண் டார்பொழில் தில்லையு ளீர் எனும்
பிறைகு லாம்நுதற் பெய்வளையே’’(பா-9)

நம்பி வந்த வழியில் சேக்கிழார்

முனைவர். மு. பழனியப்பன்.

சிலப்பதிகாரம், பெரியபுராணம் ஆகிய இரு காப்பியங்களும் தமிழ்மண்ணில், தமிழர் வாழ்வைத், தமிழர்க்குக் கூறுவனவாகத் தமிழரால் படைக்கப்பெற்றவை. இவை தமிழர் வாழ்விற்கும், பண்பாட்டிற்கும், நாகரீகத்திற்கும் உரைகல்லாக விளங்குவன.
சிலப்பதிகாரம் முத்தமிழ்க்காப்பியம். தமிழின் முதற்காப்பியம்.
புதுமையான இவ்விலக்கியவகையைச் செய்ய முற்பட்டபோது இளங்கோவடிகள், ஒரு திட்டமிடலை தனக்குள் வகுத்துக் கொண்டிருக்கவேண்டும். செவிவழிக்கதை, உண்மைக்கு மாறுபாடில்லாமல் சிலப்பதிகாரமாக எழுந்துள்ளது. தமிழகத்தின் முப்பகுதிகளையும் களமாக்கிக் கொண்டு, தமிழரின் ஒருங்கிணைப்பாக, தமிழரின் இலக்கியச் செம்மையாக இந்நூல் அமைக்கப்பெற்றுள்ளது.
சிலப்பதிகாரத்திற்குக் கூறிய செவிவழிக்கதை, உண்மைக்கு மாறுபாடில்லாமல் ஆக்கப்படல், தமிழரின் ஒருங்கிணைப்பு, தமிழரின் இலக்கியச் செம்மை ஆகிய அனைத்து கூறுகளும் பெரியபுராணத்திற்குப் பொருந்தும். ஒரு வரியில் சுந்தரர் வடித்ததை, ஒரு பாடலில் நம்பியாண்டார்நம்பி வழி மொழிந்ததை அடிப்படையாகக் கொண்டு, அடியார்தம் வாழ்விடங்களுக்குச் சென்று அவர்கள் பற்றிய வாழ்வைக் கேட்டறிந்துச் சேக்கிழார் செய்துள்ள இக்காப்பியமும் மிகச்சிறந்த திட்டமிடலைத் தன்னுள் கொண்டிருந்திருக்க வேண்டும் என்றால் அது மிகையாகாது.
சிலப்பதிகாரம் காப்பியத்தலைவர் ஒருவர் குறித்த தனிக்காப்பியம். ஆனால் பெரியபுராணம் ஒருவர் தழுவிய அறுபதிற்கு மேற்பட்டவரை உள்ளடக்கிய காப்பியம். இவ்வேறுபாடு சேக்கிழார் என்னும் படைப்பாளருக்குப் பலவித நெருக்குதல்களைத் தந்திருக்கும். இதன் காரணமாகவே காப்பியத்தலைமை குறித்த கருத்துவேறுபாடுகள் பெரியபுராணத்திற்கு ஏற்பட்டது. ஆனால் சேக்கிழார் தனது திட்டமிட்ட காப்பியப்படைப்புத்திறனாலும், கவிதைநலனாலும் படைப்பாக்கத்தில் தனக்கு நேர்ந்த பல சவால்களை எதிர்கொண்டு வெற்றி கண்டுள்ளார்.
தனக்கு முன்னால் நிகழ்ந்த காப்பியப் படைப்பாக்கங்கள், அவற்றின் காப்பியஅமைப்பு, காப்பியமரபு, இராமாயண படைப்பு நிகழ்தல் இவற்றினைக் கருத்தில் கொண்டு, அதே நேரத்தில் தன் பாடுபொருளை ஏற்றத்தாழ்வின்றி பாடவேண்டிய சூழல் சேக்கிழாருக்கு நேர்ந்துள்ளது.
சிலப்பதிகாரத்தின் செவிவழிக்கதையை அரசன் கேட்க, சீத்தலைச்சாத்தன் கேட்க, இளங்கோ கேட்க- உணர்ச்சிமயமாக இருந்தது. அதனால் அப்படைப்பாக்கத்திற்கு உணர்வுமயமான நேரடித்தன்மை உதவியது. ஆனால் பல நூற்றாண்டுகளுக்கு முன்னர் ஒற்றை வரியில் அடையாளம் காட்டப்பெற்ற அடியார்கள், ஒரு பாடலால் அணிசெய்யப் பெற்ற அவர்கள் ஒரு காப்பியப்பகுதியாக மாறவேண்டிய, மாற்றப்படவேண்டிய காப்பிய திட்டமிடல் சேக்கிழாருக்கு வாய்த்தது.
முன்னோர் மொழியைப் பொன்னேபோல் போற்றவேண்டும் என்ற நெறி ஒருபுறம், காப்பிய மரபு ஒருபுறம், இரண்டிற்கும் இடையில் அறுபத்துமூவரின் வாழ்வைக் குறைவின்றி வரலாற்று அடிப்படையில் தரவேண்டிய உண்மைத்தன்மை மற்றொரு புறம்- என்ற பல கோணச் சிக்கல்களுக்கு இடையில், ஒருகாப்பியத்தைப் படைத்து- அதனைத் திருமுறைகளில் ஒன்றா¦க, பக்திக்குக் காட்டாகத் தந்துள்ள சேக்கிழார் இதற்காக மிகச் சிறந்த திட்டமிடலைக் கைக்கொண்டிருக்க வேண்டும் என்பது உறுதி. அதனை உரசிக்காட்டுவதாக இக்கட்டுரை அமைகின்றது.

தொகை, வகை, விரிநூல்
இந்த மாதவர் கூட்டத்தை எம்பிரான்
அந்தம் இல்புகழ் ஆலால சுந்தரன்
சுந்தரத் திருத்தொண்டத் தொகைத்தமிழ்
வந்து பாடிய வண்ணம் உரைசெய்வாம் (பா.எ.146)
தம்பிரான் தோழர் அவர் தாம் மொழிந்த தமிழ் முறையே
எம்பிரான் தமர்கள் திருத்தொண்டு ஏத்தல் உறுகின்றேன்(பா.எ.349)
என்பன சேக்கிழாரின் மொழிகள். இவற்றின் மூலம் சுந்தரர் பாடிய திருத்தொண்டத்தொகையை அடியொற்றி யாம் காப்பியம் செய்யப் புகுந்தோம் எனச் சேக்கிழார் தௌ¤வாகக் குறிப்பிட்டுவிடுகின்றார். எம்பிரானின் சொந்தங்களான அடியார்கள் வரலாறு சுந்தரரால் சொல்லப்பெற்ற முறையிலேயே என்னால் சொல்லப்பெறுகின்றது எனவும் சேக்கிழார் இப்பாடல்களின்வழி அரிதியிட்டு உரைக்கின்றார்.
ஆனால் சுந்தரரால் குறிப்பிடப்பெறாத செய்திகளைக் கொண்ட பாயிரம், திருமலைச்சிறப்பு, திருநகரச்சிறப்பு, திருநாட்டுச்சிறப்பு, தடுத்தாட்கொண்ட புராணம், நிறைவாக அமைந்துள்ள வெள்ளானைச்சருக்கம், ஆகியன காப்பியத்திற்கு முன்னுரை, முடிவுரைப்பகுதிகளாகச் சேர்க்கப்பெற்றுள்ளன. இவை சேர்க்கப் பெற்றதற்கான காரணங்கள், எடுக்கப் பெற்ற மூலங்கள் எவையென ஆராய வேண்டியுள்ளது.
காப்பிய இலக்கணம் கருதி இவற்றைச் சேக்கிழார் இணைத்துள்ளார் என்பது உறுதி. அறம், பொருள், இன்பம், வீடு என்ற நான்கையும் முற்ற மொழிவது பெருங்காப்பியம் என்பதால் இங்கு இவை சேர்க்கப் பெற்றுள்ளன என்பது தௌ¤வு. இருப்பினும் சுந்தரர் பாடாத இவற்றை எம்மூலம் கொண்டு, எதன் சான்றாகக் கருதி சேக்கிழார் இணைத்துள்ளார் என்ற வினாவை எழுப்பினால் அதற்குக் கிடைக்கும் விடை திருத்தொண்டர் திருவந்தாதி என்பதாக இருக்கும். பெரியபுராணத்தின் வகை நூலாகக் கருதப்பெறும் இந்நூல் பல வழிகளில் பெரியபுராணக் காப்பியக் கட்டமைப்பிற்கு உதவியுள்ளது. எனவே இவ்விரண்டின் அடிப்படையிலேயே சேக்கிழார், சுந்தரர் சுட்டாத சிலவற்றையும் இணைத்துள்ளார் என்பது உணரப்பெறுகின்றது.
காப்பிய இலக்கணம் கருதியவை
பாயிரம், திருமலைச்சிறப்பு, திருநாட்டுச்சிறப்பு, திருநகரச்சிறப்பு முதலானவை காப்பிய இலக்கணமரபு கருதிப் படைக்கப்பெற்றவை. எனினும் அதனுள்ளும் சுந்தரர் சார்புச் செய்திகளே இடம்பெற்றுள்ளன.
திருமலைச்சிறப்பு
இப்பகுதி கயிலை மலையின் பெருமையாக விரிகின்றது. இதனுள் உபமன்னிய முனிவர் தென்திசையில் இருந்து ஒரு ஒளி புறப்பட்டு சிவஉலகம் போவதாகவும், அதுவே நம்பியாரூரர் சிவ இருக்கை சேரும் நிலை என்பதாகவும், அவரால் தென்திசை வாழ்ந்ததாகவும் குறிப்பிடுகின்றார். இதன்மமூலம் திருமலைச்சிறப்பென்பதும் சுந்தர் சிறப்பெனவே கருதத்தக்கதாக உள்ளது.
திருநாட்டுச்சிறப்பு
உலகம் உய்யவும் சைவம் நின்று ஓங்கவும்
அலகுஇல் சீர்நம்பி ஆரூரர் பாடிய
நிலவு தொண்டர்த் கூட்டம் நிறைந்துஉறை
குலவு தண்புனல் நாட்டு அணி கூறுவாம் (பா.எ. 50)
எனச் சுந்தரர் பாடிய தொண்டர் கூட்டம் உறையும் சோழநாட்டை நாட்டுச் சிறப்பாகச் சேக்கிழார் பாடியுள்ளார்.
திருநகரச்சிறப்பு
சுந்தரர் பரவையாரை மணந்த இடமும், அடியார் கூட்டம் உறையும் இடமும், திருத்தொண்டத்தொகை பாடிய இடமும் ஆன திருவாரூரைச் சேக்கிழார் திருநகரச் சிறப்பாகக் கண்டுள்ளார்.
இவை காப்பியக் கூறுகள் கருதி பெரியபுராணத்துள் இடம்பெற்றாலும், தொகை நூலான திருத்தொண்டத்தொகை வழி நடக்கும் முறைமை இவற்றுள் உள்ளமை குறிக்கத்தக்கது.
திருத்தொண்டர் திருவந்தாதி வழிப்பட்டவை.
நம்பியாண்டார் நம்பி படைத்த திருத்தொண்டர் திருவந்தாதி- பெரியபுராணத்திற்கு சேக்கிழாரால் வகை நூலாகக் கொள்ளப்பெற்ற சிறப்புடையதாகும். இநநூலிலிருந்துச் சேக்கிழார் காப்பியக் கட்டமைப்பிற்கான பல கூறுகளைப் பெற்றுள்ளார்.
திருத்தொண்டர் திருவந்தாதியில் மொத்தம் 89 பாடல்கள் இடம்பெற்றுள்ளன. அந்தாதி வகை மொத்தம் நூறு பாடல்களைக் கொண்டு அமைக்கப்பெற வேண்டும். திருத்தொண்டர் திருவந்தாதி குறைவுபட்டுள்ளதே என்று எண்ணினால், நம்பியாண்டார் நம்பி சுந்தரரின் திருத்தொண்டத்தொகை- பதினொரு பாடல்களையும் தம் நூலுக்கு முன்னதாகக் கொண்டு நூறு என்ற எண்ணிக்கையை முழுமைப்படுத்தியுள்ளார் என்பதை உணர்ந்தால் குறை தேய்ந்து நிறைவு பெறும். இக்குறிப்பு இலக்கிய வரலாற்றில் முக்கியமான ஒன்றாகும்.
சுந்தரர் வாழ்விணைப்பு
தில்லை வாழ் அந்தணர் தம் அடியார்க்கும் அடியேன் என திருத்தொண்டத் தொகை நேரடியாக அடியார் வணக்கத்தில் தொடங்குகின்றது. ஆனால் திருத்தொண்டர் திருவந்தாதியோ
தொண்டத்தொகை வகை பல்க மந்தாதியைச்
சொன்ன மறைக்குல நம்பி பொற்பாதம் துணை தி.தி. பா.எ.1.)
எனத் தொடங்குகின்றது. இப்பாடலில் திருத்தொண்டத்தொகைக்கு வகைநூலான திருத்தொண்டர் திருவந்தாதியைச் செய்த நம்பியாண்டார் நம்பியின் பொற்பாதங்களின் துணை வேண்டப்படுகிறது. அதன்பின் தில்லை வாழ் அந்தணர் பெருமை கூறப் பெற்று நூல் திருத்தொண்டத்தொகை வழி நடக்கின்றது.
தில்லை வாழ் அந்தணர் புராணத்திற்கு முன்னதாக சிலவற்றை இணைத்துக் கொள்ள இப்பாடல் சேக்கிழாருக்குத் துணைபுரிந்துள்ளது. மேலும் திருத்தொண்டத்தொகை, வகை ஆகியன எழுவதற்குக் காரணமான நிகழ்ச்சிகளை இவ்விடத்தில் வைத்து அதன்பின் அவை கூறும் அடியார் வாழ்க்கையைக் கூறுவதற்கான முற்கதையைக் கூறிடவும் இப்பாடல் துணையாகியுள்ளது.
தடுத்தாட்கொண்ட புராணம் என்ற பகுதியைச் சேக்கிழார் அமைத்துக்கொண்டு, அதனுள் சுந்தரர் வரலாற்றின் தொடக்கப் பகுதிகளைப் படைத்துள்ளார். தடுத்தாட்கொண்ட புராணம் -திருத்தொண்டத்தொகை பாடுதல் வரையான சுந்தரர் வாழ்வு நிகழ்வுகளை உள்ளடக்கியது என்பது இங்குக் கருதத்தக்கது.
தம்பெருமான் கொடுத்தமொழி முதல் ஆகத் தமிழ் மாலைச்
செம்பொருளால் திருத் தொண்டத்தொகையான திருப்பதிகம்
உம்பர் பிரான் தான் அருளும் உணர்வு பெற உலகு ஏத்த
எம்பெருமான் வன் தொண்டர் பாடி அவர் எதிர் பணிந்தார்
(பா.எ.348)
என்ற பாடல் மேற்கூற்றினுக்குச் சான்றாகும்.
பெரியபுராணத்தில் சுந்தரரின் வாழ்க்கை நிகழ்ச்சிகள் ஏயர்கோன் கலிக்காமர் புராணத்தில் மீண்டும் விரிவு பெறுகின்றன. சுந்தரர் ஏயர்கோனார்க்கும் அடியேன் எனக் குறிப்பிட்டு முடித்துவிட, அதனை விரித்த நம்பியாண்டார் நம்பி திகழ் வன்றொண்டனே மற்றிப் பிணி தவிர்ப்பானென்று உடைவாள் உருவி(தி.தி.பா.எ.35) எனப்பாடுகின்றார். இதன்மூலம் ஏயர்கோனுக்குப் பிணி தீர்க்கும் வரலாறு, அதனுடன் தொடர்புபட்ட சுந்தரர் வாழ்வு நிகழ்ச்சிகள் ஆகியன இவ்விடத்தில் காட்டப்பெறுவதற்கு சேக்கிழாருக்குக் களம் கிடைத்தது.
நிறைவுப் பகுதியான வெள்ளானைச் சருக்கமும்- நம்பியாண்டார் நம்பியின் திருத்தொண்டர் திருவந்தாதியின் நிறைவுப்பாடலை அடியொற்றியதே ஆகும்.
. . . வாரூரரைச் சேரரை யல்லது நாமறியோம்
மானவ வாக்கையொடும் புக்கவரை வளரொளிப்பூண்
வானவராலும் மருவற்கரிய வடகயிலைக்
கோனவன் கோயில் பெருந்தவத்தோர் தங்கள் கூட்டத்திலே
(தி.தி.பா.எ.89)
என்ற பாடலின் விரிவே வெள்ளானைச்சருக்கமாகும்.
இவ்வாறு முழுமையான காப்பியமாக பெரியபுராணத்தை அமைத்துக்கொள்ள திருத்தொண்டர் திருவந்தாதி மிகுதியும் சேக்கிழாருக்கு உதவியுள்ளது என்பது தௌ¤வாகின்றது.
சுந்தரர் பெற்றோர்
சுந்தரர்தம் பெற்றோரான இசைஞானியார், சடையனார் ஆகியோர்க்குத் தனித்தனிப்பாடல்களைத் திருத்தொண்டர் திருவந்தாதி அமைத்துள்ளது. அதன்வழிப்பட்டு அவர்களையும் சேக்கிழார் தொண்டர் கூட்டத்துள் அமைத்துக் கொண்டு காப்பியம் செய்துள்ளார். இவர்களுக்குச் சேக்கிழார் ஒவ்வொரு பாடல்களை அமைத்துள்ளமை எண்ணற்குரியது.
சருக்கப் பிரிவினுக்கான அடிப்படை திருத்தொண்டர் திருவந்தாதியின் இறுதியில் திருத்தொண்டத் தொகைப் பாடல்களின் முதற்குறிப்புகள்- மறவாமல் இருப்பதற்காகத் தொகுத்துச் செய்யுள் வடிவில் தரப்பெற்றுள்ளது. அப்பாடல் பின்வருமாறு.
பணிந்தநல் தொண்டத் தொகைமுதல் தில்லை, இலைமலிந்த,
அணித்திகழ் மும்மை, திருநின்றா, வம்பறா, வார்கொண்ட சீர்,
இணைத்தநல் பொய்யடிமை, கறைக்கண்டன், கடல் , , , ,
மணித்திகழ் சொற்பத்தர், மன்னிய, சீர்மறை நாவனொடே.
(தி.தி.பா.எ.88)
இதில் இடம்பெற்றுள்ள பாடல் முதற்குறிப்பு அகராதி சேக்கிழாருக்கு, முதற்குறிப்பாக மட்டும் தெரியாமல் அவை சருக்கத்தலைப்புகளாகவும் தெரிந்துள்ளன. சேக்கிழார், சுந்தரர் வழிப்படி அவரது ஒவ்வொரு பாடலிலும் காட்டியுள்ள அடியார்களை ஒவ்வொரு சருக்கத்தில் அமைத்துக்கொண்டு, சுந்தரர் மொழியையே அதற்குத் தலைப்பாகவும் ஆக்கிக்கொண்டமை அவரின் காப்பியத் திட்டமிடலுக்குச் சிறந்த எடுத்துக்காட்டாக விளங்குகிறது.

சுந்தரர் துதிகள்
திருத்தொண்டத்தொகையுள் ளஆருரன் ஆரூரில் அம்மானுக்காளே என ஒவ்வொரு பாடலின் நிறைவிலும் தன்னை உளப்படுத்திப் பாடுகிறார் சுந்தரர். இதன்மமூலம் பதினொரு இடங்களில் சுந்தரர் பெயர் இடம்பெற்றுள்ளது. இப்பதினொரு வரிகளில் இடம்பெற்றுள்ள சுந்தரர்தம் குறிப்புகளை ஆங்காங்கே விரித்து பதினொரு பாடல்களாக திருத்தொண்டர் திருவந்தாதி வாழ்த்திச் செல்லுகின்றது. இவ்வழியில் விரிவைச் செய்ய வேண்டிய சேக்கிழார் பதினொரு இடங்களில் சுந்தரர் தம் கதையைப் பகுதி பகுதியாகச் சொல்லிச் சென்றிருக்கவேண்டும். இது படிக்கும் வாசகர்க்கு இடையூற்றை ஏற்படுத்தலாம் எனக் கருதி அவ்வவ் இடங்களில் சுந்தரர் துதியாக ஒரு பாடலைச் செய்து அதற்கும் அமைதி கண்டுள்ளார். இதன்மூலம் பெரியபுராணச் சருக்கங்கள் அனைத்தும் (தடுத்தாட்கொண்ட புராணம், வெள்ளாணைச் சருக்கம் நீங்கலாக) சுந்தரர் துதி கொண்டு நிறைவு பெற்றுள்ளன. பெரும்பாலும் காப்பிய உட்பிரிவுகள் கடவுள் வாழ்த்தோடு தொடங்கும். முடிவில் வணக்கங்கள் ஏதுமிராது. ஆனால் பெரியபுராணம் காப்பிய உட்பிரிவின் முடிவில் ஒரு வாழ்த்தோடு முடிவது புதுமையாகும்.
இவ்வாறு சேக்கிழார் தொகை, வகை நூல்களை உளப்படுத்தித் தன் விரி நூலை யாத்துள்ளார். பெரியபுராணத்தைப் பதிப்பிக்க விரும்புவோர் இவையிரண்டிற்கும் முதலிடம் தந்து பின்பு பெரியபுராணத்தைப் பதிப்பித்தால்தான் அப்பதிப்பு முழுமையும், நிறைவும் அடையும். இதனைத் தமிழ்ப்பதிப்பக உலகம் நினைவில் கொள்ளவேண்டும். இவற்றை உள்ளடக்கிய பல பதிப்புகளும் இதுவரை வெளிவந்துள்ளன. அவற்றில் குறிக்கத் தக்கது சி.கே. சுப்பிரமணிய முதலியாரின் பதிப்பு. இனியும் இம்முறை தொடரவேண்டும்.

பேசாநாடகம் பிறந்ததுவே

முனைவர் மு. பழனியப்பன்

1970 ஆம் ஆண்டு பாரதிதாசனாருக்கு, அவரின் பிசிராந்தையார் நாடக நூலுக்காக சாகித்திய அகாதமி பரிசு வழங்கப்பெற்றது. கவி ஞரான அவருக்கு கவிதைக்கான பரிசு வழங்கப் பெறாமல், நாடகத்திற்கு ஏன் வழங்கப் பெற்றது என்ற ஐயம் பலருக்கு ஏற்படலாம். பிசிராந்தையார் நாடகம் கவிதை நாடகமாகும். பாரதிதாசனாரின் கவிதை புனைதிறனுக்கும், நாடக ஆற்றலுக்கும் அந்நூல் சான்று பயப்பதால் அவ்விரு திறனுக்காக பாரதிதாசனாருக்கு அப்பரிசினை சாகித்திய அகாடமி வழங்கியுள்ளது என உணரும்போது மேற்கண்ட ஐயம் சற்று விலகலாம்.
இருப்பினும் பாரதிதாசனாரின் கவிதையாற்றல் மக்களிடம் பரவிய அளவிற்கு, நாடகத்திறன் சென்றடையவில்லை. கவிதைகளைப் படைத் த பாரதிதாசனார் அவற்றோடு ஆங்காங்கே நாடகங்களைப் படைப்பதிலும் மிகவும் ஆர்வம் கொண்டு விளங்கியுள்ளார். நல்ல தீர்ப்பு(1944), சௌமியன்(1947), பாரதிதாசன் நாடகங்கள்(1959), பிசிராந்தையார்(1959- தொடக்குதல்), அமைதி, பாண்ழயன் பரிசு திரைப்பட ஆக்கமுயற்சி(1961) எனத்தொடரும் அவரது நாடகப்பணிகள் அவருக்கிருந்த நாடக ஆர்வத்தை வெளிப்படுத்துவனவாக உள்ளன.
மேற்கண்ட நாடகப்பட்டியலில் இடம்பெறும் நாடகங்களிலிருந்து அமைதி என்ற நாடகம் முற்றிலும் மாறுபட்டப் புதுமை உடையதாக உள்ளது. இதில் இடம்பெறும் பாத்திரங்கள் அனைத்தும் வசனம் பேசாப் பாத்திரங்களாகச் செயலாற்றும் செயல் வீரர்களாகப் படைக்கப் பெற்றுள்ளன. பாரதிதாசனார் இந்நாடகம் குறித்துப் பின்வருமாறு எடுத்துரைக்கின்றார். ??அமைதி என்னும் இச்சிறு நாடகம், நாடகஉறுப்பினர்- நடிகர் எவருக்கும் பேச்சில்லாது நிகழ்ச்சிகளைக் கண்ணால் காணுவதால் மட்டும் கருத்தறியுமாறு அமைக்கப் பெற்றுள்ளது... இந்நாடகம் எம்மொழியாராலும் நடத்துவிக்க முடியும், கருத்துக்களும் உலகப்பொதுவானவை.?? என்ற அவரின் கருத்துப்படி இந்நாடகம் இயக்கும் நிலையிலும், கருத்தமைவு நிலையிலும் உலகப் பொதுமை பெற்றே விளங்குகின்றது. மொழி என்ற வட்டத்தைக் கடந்து, உணர்வுகளால் இந்நாடகம் நடைபெறுவதால், அனைத்து மொழியினராலும் உணரத்தக்க வகையில் அமைந்துள்ளது. மேலும் இந்நாடகம் நகைச்சுவையுணர்வுடையதாகவும், பொதுவுடைமைக் கருத்துக்களை முன்வைப்பதாகவும், புரட்சி எண்ணங்களை மௌனத்தால் செயல்படுத்துவதாகவும் அமைந்துவிளங்குகின்றது. இவ்வகைச் சிறப்புகளுடன் கதையமைப்பிலும் உயர்ந்து நிற்பதால் பழப்போருக்கு புதுவகை இன்பத்தினைப் பயப்பதாக உள்ளது.
பிண ஊர்வலத்தில் தொடங்கும் இந்நாடகம், கதைநாயகன் பிணமாகும் முடிவினைக் கொண்டுள்ளது. இத னால் நாடகத்தின் தொடக்கம் முதல் இறுதி வரை அமைதிக்கான பின்புலம் இயல்பாக அமைய வாய்ப்புண்டாகிவிடுகின்றது. முதற்காட்சி -ஆர்பாட்டம், ஆடுதல், பாடுதல் இல்லா பிண ஊர்வலமாக நகர்வதால் நாடகம் அமைதி கொண்டதாய் தொடங்கிவிடுகின்றது. அதனை எதிர்பார்க்கும் வாசகரையும் அது அமைதிப்படுத்தி தனது அமைதிச் சூழலுக்கு கொண்டு வந்துவிடுகின்றது. மேலும் ??நிலையாமை உடைய உலகில் எதுவும் நிலையானதல்ல. அனைத்தும் மாறக் கூடியன,, பொருளை வறியவர்க்கு வழங்காது சேர்த்து வைப்பதால், சுயநலங்கொண்டே வாழ்வதால் பயனொன்றும் இல்லை,, பொதுநலத்திற்கு வாழ்தல் நன்று,, அதனால் வரும் புகழ் மட்டுமே நிலையானது?? என்ற தத்துவ நிலைக்கு பார்வையாளரைக் கொண்டுவருவதற்காகவும் இந்நாடகம் இறப்பு ஊர்வலத்தில் தொடங்கி, இறப்பிலேயே முடிவதாக பாரதிதாசனாரால் அமைக்கப் பெற்றிருக்கவேண்டும்.
மண்ணாங்கட்டியின் பயணம்
மண்ணாங்கட்டியின் பயணமாக நாடகம் அமைகின்றது. தனக்கென மனைவி, மக்கள், குடும்பம் ஏற்படா நிலையில், தன்தாயை இழந்த அவன் ஊரார் உதவியுடன் அவளுக்கு இறுதிக்கடன் செய்கின்றான். அதன்பின் அவ்வீட்டில் தனிமையில் இருக்கப் பிடிக்காது, சில துணிமணிகளுடன், காசுகளுடன் புறப்பட்டு விடுகின்றான்.
தங்குவதற்கு நல்ல வீடில்லா ஓர் ஏழைக்குத் தான் இருந்த வீட்டைக், கடிதம் மூலம் தந்து உதவுகின்றான். சேலை இல்லாக் கிழவியொருத்திக்குத் தன் அம்மாவின் ப?டுச் சேலையைத் தந்து காக்கின்றான். பிள்ளையில்லா குடும்பத்திற்குத் தெருவில் வீசப்பட்ட, அனாதையாக்கப் பெற்ற ஒரு குழந்தையைத் தக்க முறையில் மறைமுகமாகத் தந்து இவன் குழந்தையையும் வாழவைக்கின்றான், குழந்தையற்ற குடும்பத்தையும் மகிழ்வு கொள்ளவைக்கின்றான். உணவில்லா ஏழைகளுக்குக் கோயில் மடப்பள்ளி உணவைப் பகிர்ந்தளிக்கின்றான். இரவில் ஒரு வீட்டிற்குத் திருட வந்த திருடர்களைத் தடுத்து அவ்வீட்டின் பொருட்கள் களவு போகாவண்ணம் காக்கின்றான். மற்றொரு ஊரில் பணத்தைக் குவித்து வைத்துள்ள பண்ணையார் இருவரின் சொத்துக்களுக்கு சேதமூட்டி அதனைச் செப்பமிடச் செய்வதன் மூலம் ஏழைகளுக்கு வாழ்வையும், வேலையையும் பெற்றுத் தருகிறான். பொன், மண், பெண், பதவி போன்ற எவ்வித ஆசைகளும் இல்லா மனிதனாய், மற்றவர்க்கு உதவும் தயாள குணம் மிக்கவனாக இவன் விளங்குகின்றான். பாரதிதாசனார் கண்ட புரட்சிமனிதன் இவனெனக் கொள்வது தகும். இறுதியில் சேதமுண்டாக்கிய நிலையில் காரணமானவன் தானே என்பதைத் ஒப்புக்கொண்டு அதற்கான தண்டனையாகத் தன் உயிரை இழப்¤பவனாக இவன் படைக்கப் பெற்றுள்ளான்.
சிறுகதையல்ல- நாடகம்.
மேற்சொன்ன நாடகக் கதையைச் சிறுகதையமைப்பில் சொல்லியிருப்பினும், சிறுகதையாக அதனை அமைக்காது நாடகமாகப் பாரதிதாசனார் படைத்துள்ளார். வரிக்குவரி பாத்திரச் செயல்முறைகளைக் கூறுவதாலும், பயணக்கதை என்பதால் காட்சிகளை அடிக்கடி மாற்றியமைப்பதாலும் நாடகமாக இதனை அவரால் படைக்க முடிந்துள்ளது.
எடுத்துக்காட்டிற்கு இரண்டாம் காட்சியின் தொடக்கப் பகுதியைச் சுட்டலாம். ??பிணத்தோடு சென்றவர்கள், மண்ணாங்கட்டி உள்ள வீடு நோக்கி வருகிறார்கள். மண்ணாங்கட்டி தன் வீட்டுக் குறட்டில் நின்று கைகூப்ப, பிணத்தோடு சென்று மீண்ட அனைவரும் கை கூப்பிச் செல்லுகின்றனர்.?? என்ற காட்சி வருணனை- பாத்திரங்களின் செயல்பாடுகளை உரைத்து, படக்காட்சி போல நடிப்பவரைச் சுட்டி நிற்பதால் நாடகத்தன்மை பெற்றுவிடுகின்றது. இவ்வமைப்பிலேயே பாரதிதாசனார் இந்நாடகத்தினை நகர்த்திச் சென்றுள்ளார்.
நகைச்சுவை நலம்
பதினாறு பிரிவுகளைக் கொண்ட இந்நாடகம் ஆங்காங்கே நகைச்சுவைப் பண்பினையும் கொண்டு விளங்குகின்றது. இரவுப் பொழுதில் ஒரு வீட்ழல் திருட, திருடர்கள் இருவர் திட்டமிடுகின்றனர். ஒருவன் வீட்டின் வெளியில் நின்று கொள்ள, மற்றொருவன் உள்புகுந்து திருடத் தொடங்குகின்றான். அவ்வீட்டிலுள்ள இரண்டு சன்னல்களின் கம்பிகளையும் வளைத்து, அவர்கள் திருடத் தொடங்குகிறார்கள். உள்ளிருப்பவன் பாத்திர, பண்டங்களை எடுத்துத் தர மற்றவன் வாங்கி வெளியே வைத்துவிடுவது, பின் கொண்டு செல்வது என்பது அவர்களின் ஏற்பாடு. அத்திட்டம் நடைமுறையாகிக் கொண்டிருக்கிறது. அந்நேரத்தில் வெளியில் இருப்பவனை, மண்ணாங்கட்டி தன்னை வெளிப்படுத்திக் காடடி அச்சமூட்ட அவன் நடுங்குகின்றான். நழுவிச் செல்லும் அவன்மீது சிறுகல்லை எறிந்து, அவனை மண்ணாங்கட்டி ஓடச் செய்து விடுகின்றான். இதைப் படிக்கும்போதே வாசகர்கள் சிரிக்கும் சூழலுக்கு வந்து விடுகின்றனர். இதன்பின் உள்ளிருப்பவன் பொருள்களை எடுத்துத் தர, வெளியே மண்ணாங்கட்டி வாங்கிக் கொண்டு மற்றொரு சன்னல் வழியாக அதனை உள்வைக்க, திருட்டு தடுக்கப் பெறுகின்றது. கடைசியாக உள்ளிருப்பவன் சோறு, குழம்பு தர, அதை வாங்கிய மண்ணாங்கட்டி சன்னல் மீதே வைத்துவிட்டு மரமேறிக் கொண்டுவிடுகின்றான். உள்ளிருப்பவன் மெதுவாக வெளியேறி வந்து, தன் துணைவனை அங்குமிங்கும் தேடுகின்றான். காணாது கலக்கமுறும் வேளையில் ஒருகல் அவன் முன் வந்து விழுகின்றது. மற்றொருகல் அவன்மேல் விழுகின்றது. அவன் சோற்றையும், குழம்பையும் அள்ளிக்கொண்டு ஓடுகின்றான். இந்தக்காட்சி நகையுணர்வின் உச்சமாக பாரதிதாசனாரால் அமைக்கப் பெற்றுள்ளது. இக்காட்சித் தொடரை நகையுணர்வுடன், மிக சாமர்த்தியமாக, காரணகாரியத் தொடர்பு குன்றாமல் பாரதிதாசனார் படைத்துள்ளமை எண்ணி எண்ணி வியக்கத்தக்கதாகும்.

புரட்சிக்கருத்துக்கள்.
இந்நாடகத்தில் நகையுணர்வுக்கு அடுத்து புரட்சிக் கருத்துக்களின் வெளிப்பாடு சிறப்பிடம் பெறுவதாக உள்ளது. பெருமாள் கோவில் ஒன்றின் மடைப்பள்ளியில் தயாரிக்கப்பெறும் பண்டங்கள், ஏழைமக்களுக்குச் சென்று சேராது, உண்டு பெருப்பவர்க்குச் சென்றடைகின்றது. இதனைக் கண்ட மண்ணாங்கட்டி, அவ்வுணவைத் தந்திரமாகத் தான் பெற்று உண்டு, ஏழைகளுக்கும் ஈந்தளிக்கின்றான். கடவுள் மறுப்புக் கொள்கையுடையவரான பாரதிதாசனார், கோயில் உணவு ஏழைகளுக்குச் சென்று சேருமானால் அதன் நலம் ஏற்கத்தக்கதே எனக் கருதியுள்ளமை இக்காட்சி மூலம் தெரியவருகின்றது.
மற்றொரு காட்சி மூலம் மண்ணாங்கட்டி பணம் படைத்த பண்ணையாரின் கொழுத்த செல்வத்தை ஏழை மக்களும் பெற்றிட அமைதி வழியில் புரட்சி செய்கின்றான். அவன் ஏழைகளுக்கு எதுவும் தராத பெரிய பண்ணையாருக்குப் பாடம் புகட்ட ஊர் ஏரி யைப் பலர் உதவியுடன் உடைக்கின்றான். ஏரி நீர் புகுந்து, தன்வீட்டை நோக்கி அழிக்க வரும் சூழலில் அதனைச் செப்பனிட பெரிய பண்ணையார் ஊர்மக்களின் உதவியை நாடுகின்றார். இதன்மூலம் ஏழைகள் பிழைத்திட வN கிடைக்கின்றது.
இவ்வேலை முழயும் தருணத்தில் சின்னப் பண்ணையாரின் மாளிகைக்குப் பெரிய பண்ணையார் தீயிட்டு விடுகின்றார். பெரிய பண்ணையாரின் மனைவியைச் சின்னப் பண்ணையார் மோகிக்கும் மோக நாடகம் வெளிப்பட்டுவிடுவதால் இவ்வேற்பாட்டினைப் பெரிய பண்ணையார் செய்து விடுகின்றார். தீயினால் ஏற்பட்ட பேரழிவைப் போக்கிட மீண்டும் ஊர் மக்கள் உதவி நாடப் பெறுகின்றது. இதன்மூலம் மீண்டும் அவ்வேழைகள் வேலை பெறுகின்றனர்.
அதன்பின் இரு பண்ணையார்களுக்கும் இடையிலான பகை வளருகின்றது. பெரிய பண்ணையார் ஏரியை உடைத்தப் பலரைத் தாக்க முயலுகின்றார். அந்நேரத்தில் தானே அச்செயலுக்குக் காரணம் என மண்ணாங்கட்டி குறிப்பு எழுதித் தர அவனை அரசின் காவலர்கள் அடித்துத் துன்புறுத்துகின்றனர். அவன் மீளா வாழ்வெய்துகின்றான். ??ஏழைகள் வா?வில் சமத்துவம் கண்ட அம்மாவீரன் சாதாரண மண்ணாங்கட்டி அல்ல, அவன் பொன்கட்டி. தன்னை உருக்கி, மற்றவர்க்கு அணியாக்கியவன் அவன்.?? என்று அவன்வாழ்வை நாடக இறுதியில் எடுத்துரைக்கின்றார் பாரதிதாசனார்.
அமைதி என்ற தலைப்புக்கேற்ப அமைதியுடன் புரட்சிபுரியும் தீரனாக மண்ணாங்கட்டி இதில் படைக்கப் பெற்றுள்ளான். தன்வாழ்வு மடிந்தாலும் பிறர் வா?வு எழத் தன்னை அவன் உரமாக்கிக் கொண்டுள்ளான். இந்நாடகத்தினைத் திட்டமிட்டு படைத்ததன் மூலம் பாரதிதாசனார் தமி?நாடக உலகில் அழியா இடம் பெறுகின்றார். இவரது நாடக ஆற்றலின் முழுமையை உணரும் போது, சாகித்திய அகாதமி இவரது கவி, நாடக படைப்பாற்றலுக்கு இணைத்துப் பரிசை வழங்கியிருப்பதன் நோக்கம் புலனாகின்றது.