அறந்தாங்கி நண்பர் கவிஞர் அஜயின் கவிதை பின்வருமாறு

ஒரு ஊரையே
அள்ளிக்கொண்டு
ஓடிக் கொண்டிருக்கிறது

இலக்குமன்
கோட்டிற்குக்
கட்டுப்பட்டு

எப்போதாவது
விபத்து
நடக்கும் விபரீதம்

அது கோட்டின்
பிழையன்றி
இரயிலி்ன்
மீறல் அல்ல


க, அஜய் குமார்
அறந்தாங்கி

சொல்லி மாள்வதில்லை

தாத்தா இறந்து பல நாள்கள்
ஆகின்றன
அவர் இறப்பின் துக்கத்தின்
கடைசி நிமிடங்கள் சந்திக்க
இயலாதாயின
அதனால்
அவர் இன்னும் இருப்பதாக மனம் எண்ணுகிறது
அவர் சொல்லித்தந்தது பல நல்ல விசயங்கள் விருந்துக்கு அழைத்துப்போவார்
வேண்டுவன குறைவன பார்த்து விருந்தை
ருசிக்கக் கற்றுத் தந்தார்
இலையில் மிச்சம் மீதி
குறைவின்றி முழுமையாக்கும்
பழக்கம் அவரிடம் இருந்து பெற்றதே

இன்னும் பல நினைவு கூர்வார்
என் அப்பா அவருக்கு மச்சினன் முறை
அதனால் அவரின் சிறு வயதுக் கன்னங்களைக்
கடித்து மகிழ்ந்தது கூறுவார்।

என் அப்பா அவரின் மருமகன் ஆனது
அடுத்த நிகழ்வு

தபால் நிலையத்தில் சண்டை போட்ட
விசயம் சொல்வார்।
வங்கியில் வேலை பார்த்தவர்
இப்போதைய வங்கிப்
பணியாளர்களின் மீது நம்பிக்கை கொள்ளாதவர்
சேர்த்து வைக்கப் பழகியவர்
அது தனக்கல்ல என தன்னைச்
சுருக்கிக் கொண்டவர்
மகன்கள் இப்போது பெருக்கிக் கொண்டிருக்கிறhர்கள்
மகளுக்கு ஒன்றும் சேர்க்கவில்லை
என்ற நினைப்பில் உறுதியாய் நின்றவர்
கடைசி காலணுகளில்
தன் துணை இழந்து
உணவிற்கு பிறர் கரம் நோக்க வேண்டிய துயரம் ஆறாது
மனைவியின்
அருமை அப்போது மட்டுமே
உணர்ந்தவர்
இறப்பின் மிச்சங்கள் அவரின்
கைப்பிடி அறுந்துபோன பெட்டியில்
இருந்ததாய் அம்மா சொன்னாள்
வங்கியின் நிரந்தர வைப்புகள் மகன்கள்
பெயரில் கெட்டியாய் சாகும் வரை
காப்பாற்றியது அதுமட்டுமே
இன்னும் இருக்கிறார்
இருபது வருடங்களுக்கு நிரந்தர
வைப்பின் கால அளவு அது வரை உள்ளதே

குரல்கள் மாறிப் போகின்றன

குரல்கள் மாறிப் போகின்றன
அரசியல்வாதிக்கு ஒருகுரல்
மேடைப்பாடகனுக்கு ஒன்று
இலக்கியவாதிக்கு ஒன்று
பட்டிமன்ற நடுவருக்கு ஒன்று

கணவனுக்கு ஒன்று
மனைவிக்கு ஒன்று
பிள்ளைக்கு ஒனறு
எனக் குரல்களில் பல மாற்றங்கள் உண்டு

குரல்கள் தடிப்பு ஏறிப்போய்
கரகரத்து விலைக்காக வேளைக்கொன்றாகப் பேசும் எதிராளியைச் சொறிந்துவிடும்

ஆணுக்கொரு
குரல்
பெண்ணுக்கு
ஒருகுரல்
குழந்தைக்கு ஒன்று
இளைஞனுக்கு உடைந்த குரல்
ஆண்குரல் பெண்ணுக்கு இருந்தாலும்
பெண்குரல் ஆணுக்கு இருந்தாலும் குரல்பேதம் காட்டிக் கொடுத்துவிடும்

போராட்டக்குரல்
சண்டைக்குரல்
மௌனக்குரல்
கலகக்குரல்
கேலிக்குரல்
அடிமைக்குரல்
அன்புக் குரல்
ஆசைக்குரல்
இன்பக்குரல்
துன்பக்குரல்
கேட்ட குரல்
கேட்காத குரல்
இவை எல்லாவற்றுக்கும் தனித் தனி முத்திரை உண்டு

உண்மைக்குரல்
ஒலிபெருக்கிக்குரல்
வானொலிக்குரல்
தொலைக்காட்சிக்குரல்
திரைப்படக்குரல் இத்தனைக்கும் வேறுபாடுண்டு

நூலிலை குரல் வித்தியாசம் கூட விபரீதத்தை உண்டாக்கிவிடலாம்
கணவனது குரல் என
ஏமாந்து கள்வனின் குரல் அதுவாகலாம்

குழந்தையின் குரல்
இது என வேறுகுரலுக்குப் பால்சுரக்கலாம்

மனைவியின் குரல் இது
என மயக்கம் கொள்ளலாம்

மனைவியின் குரலில்
காதலியைத் தேடலாம்,
காதலன் குரலில் கணவனைக் காணலாம்
குரல் பேதம் குறிப்பிடத் தக்கதே