இணையம் தரும் முத்தமிழ் அமிழ்தம்

இன்றைய நாளில் மொழிப் பாடங்களுக்கு மதிப்பும், வலுவும், செழுமையும் சேர்க்க வேண்டிய இன்றியமையாமை நிலவி வருகின்றது. அறிவியல்துறைசார் கல்வித் துறைகளின் பரப்பும், வளர்ச்சியும், ஆராய்ச்சிகளும் மனிதத்தேவைகளை எளிதாக்கி நிறைவேற்றி வரும் சூழலில் அவையே மாணவ சமுதாயத்தினரால் அதிகம் விரும்பிக் கற்கக் கூடியனவாக உள்ளன. அறிவியல் துறைகளில் தற்போது ஏற்பட்டுள்ள இற்றைநாள் தேவைக்கேற்ப பாடப்பகுதிகளை அமைத்துக்கொள்ளுதல் என்ற நிலையை மொழிப்பாடங்களுக்கும் ஏற்றிப் பார்க்க வேண்டி இருக்கிறது.
இதற்காக மரபு சார்ந்த பாடப்பகுதிகளை விடுத்து முற்றிலும் புதிதான பாடங்களை மட்டும் படிக்கத் தருவது என்ற நிலைக்குச் சென்றுவிடவும் முடியாது. பழையன கழிதல் புதியன புகுதல் வழுவல என்ற நிலையில் பழைய இலக்கிய இன்பங்களைப் புறந்தள்ளிப் போட்டுவிட இயலாது. புதுமை மட்டுமே மொழியின் பெருமைக்கு அடித்தளமாகவும் இருந்துவிட முடியாது.
பழைய பாடங்களைப் புதிய நவீன வெளியீட்டுக் வாயில்கள் முலம் தருவதால் பழமையைப் போற்றவும் முடியும். புதுமையை வரவேற்கவும் முடியும். இவ்வகையில் தற்போதைய நிலையில் இணையம் மொழிப்பாடத் தேவைகளை அள்ளித்தரும் அமுத சுரபியாக விளங்குகிறது என்றால் அது மிகையாகாது.
குறிப்பாகத் தமிழ் மொழியைக் கற்பிக்கப் பல வசதி வாய்ப்புகள் தற்போது இணையப் பரப்பில் கிடைத்து வருகின்றன. இயல், இசை, நாடகம் ஆகிய முத்தமிழ்ப் பரப்பையும் சுவைத்து அதன்வழி மாணவர்களுக்குத் தமிழ்ப் பாடங்களை நடத்திக் கொள்ள பெருவாய்ப்புக் காத்துக்கிடக்கின்றது. பல்வேறு வகைப்பட்ட இணையதளங்கள் தமிழ் மொழிக்கு வளமை சேர்த்து வருகின்றன. அவை பற்றிய ஒரு கண்ணோட்டத்தை வழங்குவதாக இக்கட்டுரை அமைகின்றது.
இயல் தமிழ்
இயல் தமிழ் என்ற பகுப்பில் தமிழின் பழமையான இலக்கண இலக்கியங்கள் தற்போது இணையத்தில் எழுத்துவடிவில் கிடைக்கின்றன. தமிழ் இலக்கிய இலக்கணங்கள் பற்றிய அறிமுகச் செய்திகள், கட்டுரைகள் போன்றனவும் இணைய தளங்களில் கிடைக்கின்றன. இவ்வகையில் பழைய அரிதான இலக்கண இலக்கியங்களை கைச்சுட்டுக்குள் அடக்கி உடன் கிடைக்கச் செய்யும் இணையதளங்கள் பல உள்ளன.
குறிப்பாகத் திருக்குறள் பற்றி அறிந்து கொள்ள பல இணையதளங்கள் உள்ளன. இவற்றில் பொருளும், வார்த்தைத் தேடல்களும், மொழிபெயர்ப்புகளும் சேர்ந்துக் கிடைப்பது குறிக்கத்தக்கது ஆகும். குறிக்கத்தக்க சில இணையதளங்கள் பின்வருமாறு.
http://chittarkottai.com/thirukural/search.php இத்தளத்தில் திருக்குறளில் இடம் பெற்றுள்ள சொற்களின் அடிப்படையில் தேடுதலை நிகழ்த்த முடியும். திருக்குறள் முழுமையும் தனித்த பாடமாக வைக்கப் பெற்றுள்ள மாணவர்களுக்கு இத்தளம் மிகச் சிறப்பான பலன்களைத் தரும்.
http://www.thirukkural.com இத்தளம் திருக்குறளுக்கு கலைஞர், மு.வ. போன்றோர் உரைகளைத் தருகின்றது. மேலும் ஆங்கில ஆக்கங்களையும் இணைத்து இது தருகின்றது.
இவை போன்ற பல தளங்கள் திருக்குறளுக்குக் கிடைக்கின்றன. தேடுதல் அடிப்படையில் இவற்றைத் தொகுத்தால் இம்முயற்சி பெருகும். எவ்வாறு திருக்குறள் பதிப்பு அளவிலும், பரவுதல் அளவிலும் மற்ற தமிழ் நூல்களை விட முன்னணி பெற்றுள்ளதோ அதுபோல இணைய தள அளவிலும் அதிக அளவினைப் பெற்றுத்திகழ்கின்றது. திருக்குறளை இசையோடு வழங்குகின்ற தளங்கள் பலவும் உள்ளன.
இது போன்று தொல்காப்பியம், சங்க இலக்கியங்கள், காப்பியங்கள், சிற்றிலக்கியங்கள் போன்றவற்றையும் தமிழ் இணையப் பல்கலைக்கழகம்;( http://www.tamilvu.org)> மதுரைத்திட்டம் ((http://www.project madurai.org), சென்னை லைப்ரரி (http://www.chennailiberary.com) போன்ற இணைய தளங்களில் பெற முடிகின்றது. சென்னை லைப்ரரியில் நாவல்கள், சிறுகதைகள் போன்றனவற்றையும் பெற முடிகின்றது.
இவ்வகையில் உடனுக்கு உடன் தமிழ் இலக்கிய இலக்கணங்களை அவற்றின் முலபாடம், உரை இவற்றுடன் பெற்றுக் கொள்ளும் இவ்வசதி வழியாக மாணவர்களுக்கு முல பாடத்தைப் பார்க்கச் செய்ய இயலும். உரைகளை ஒப்பிட்டு நோக்க இயலும்.
பொள்ளச்சியில் உள்ள சிற்றிதழ் சேகரிப்பாளர் திருமிகு நசன் அவர்கள் தமிழம். காம் என்ற இணையதளத்தை நிறுவியுள்ளார். தமிழ் மொழிக்குச் சீரிய முறையில் தொண்டாற்றி வருகின்ற தளங்களில் இது குறிக்கத்தக்கதாகும். இத்தளத்தில் இருநூற்று எழுபத்தாறு தமிழறிஞர்களின் புகைப்படங்கள் அடங்கியுள்ளன. பெரும்பான்மையான தமிழறிஞர்கள் இற்றைக் காலத்திற்கு முன்னான முன்னூறு ஆண்டுகளுக்குள் வாழ்ந்த பெரியார்கள் என்பதும் குறிக்கத்தக்கது.
இத்தளத்தின் வாயிலாக இதழியல் படிக்கின்ற மாணவர்கள் சிற்றிதழ்களை அறிந்து கொள்ள முடிகின்றது. மேலும் பல வசதிகள் இதனுள் உள்ளன.
தனி நபர்களும் தங்களின் இணையதளங்கள் வழி தமிழ்க்கல்விக்குத் தொண்டாற்றி வருகின்றனர். எடுத்துக்காட்டிற்கு ஒன்று காட்ட இயலும். கடையம் என்ற ஊரில் தற்போது வாழ்ந்துவரும் ஒருவரின் வலைப்பூ குறிக்கத்தக்கதாகும். http://barathikannammablogspot.com என்ற இணைய தளம் பாரதியார் வாழ்ந்த கடையப்பகுதிகளைக் கண்முன் விரிக்கின்றது.
தமிழ் நேசன் என்ற வலை தளம் தமிழ்ப் பண்பாடு, தமிழர் இலக்கியம் குறித்த பல்வேறு தகவல்களை ஆங்கிலத்திலும் தமிழிலும் தந்து கொண்டுள்ளது. சிலப்பதிகாரம் பற்றிய தகவல்கள் மிகச் சிறப்பாக அமைந்துள்ளன. மதுரை தீப்பற்றிய காட்சியை ஓர் ஓவியரின் கற்பனைப் படைப்பில் விளைந்த நிலையை இத்தளம் தந்துள்ளது சிறப்பிற்குரியது. இத்தளத்தைப் பார்த்துவிட்டுப் பாட ஆசிரியர்கள் பாடம் நடத்துவது நல்லது எனக் கூறும் அளவிற்கு இதனுள் பல செய்திகள் அடைந்து கிடக்கின்றன.
இதுபோன்றே அறிமுகச் செய்திகளை வழங்கும் விக்கிப்பீடியா(http://ta.wikipedia.org) என்ற தளமும் கவனிக்கத்தக்கது. இதுதற்போது மேம்படுத்தப்பட்டு வருகிறது. சில செய்திகள் இவற்றில் சுருங்கிய அளவில் உள்ளன. இதனை மேம்படுத்த இதனைப் பார்ப்பவர்களையும் அழைக்கும் தளமாக இதனுள் உள்ளது.
நூலகம் என்றொரு தளம் தினம் ஒரு நூலை இணையத்தில் ஏற்றி வருகின்றது. இத்தளம் இலங்கைத் தமிழ் நூலாசிரியர்களின் நூல்களை இணைய மயமாக்குவதன் வாயிலாக இலங்கைத் தமிழ் சார்ந்தத் திறனாய்வாளர்களை, படைப்பாளர்களைப் பற்றியும் அவர்களின் ஆக்கங்கள் பற்றியும் அறிந்து கொள்ள முடிகின்றது. (www. noolagam.net)
சொற்பொருள் தெரிவிக்கும் அகராதிகள் பலவும் இணையதளங்களில் கிடைக்கின்றன. இதற்கு ஓர் காட்டாக விளங்குவது http//dsal.uchicaco.edu என்ற தளமாகும். இத்தளத்தில் ரோமன் ஆங்கில முறையில் அமைந்த ஒலிபெயர்ப்பு நிலையில் சொற்களை உள்ளிட்டுப் பொருள் பெற இயலும்.
மேலும் தனிநபர் வலை தளங்களில் குறிக்கத்தக்கனவாக இக்கால எழுத்தாளர்களின் தளங்கள் விளங்குகின்றன. மறைந்த எழுத்தாளர் சுஜாதா தான் உயிருடன் இருக்கும் காலத்தில் இத்தகைய தனிநபர் வலைதளமாக தன் தளத்தை உருவாக்கிப் பல வாசகர்களுடன் தொடர்பு கொண்டார். தற்போது எஸ். இராமகிருஷ்ணன், ஜெயமோகன் போன்றோரின் இணையதளங்கள் இவற்றில் முக்கியத்துவம் வகிக்கின்றன.
பல்சுவை தரும் இணையதளங்கள் பல தமிழில் ஆக்கப்பட்டுள்ளன. அவற்றிற்குக் காட்டாக அப்புசாமி . காம் என்பது அமைகிறது. இதனுள் பல்சுவை நிரம்பிய பல பக்கங்களைக் காணமுடிகிறது.பாக்கியம் ராமசாமி என்பவரின் கற்பனைப்பாத்திரமான அப்புசாமி சீதாப்பாட்டி இருவரும் இதழியல் உலகால் அதிகம் உணரப் பெற்றவர்கள். இவர்களை இணையத்தில் சந்திக்க இந்தத்தளம் வாய்ப்பளிக்கிறது.
மழலைகள். காம் என்பது குழந்தைகளுக்கான பல தகவல்களை உள்ளடக்கி உள்ளது. குழந்தைகளே வலைதலங்களை உருவாக்கும் மகத்தான முயற்சிக்கு இது வழிகோலுகின்றது.
செம்மொழித்தமிழுக்கு வளம் சேர்க்கும் வகையில் ((ciil.classicaltamil.org) மைசூரில் உள்ள இந்திய நடுவண் அரசின் மொழி நிறுவனம் செம்மொழிக்காக ஒரு தளத்தை உருவாக்கி உள்ளது. இதன் வழியாக ஒரு நூலகமும் இயங்கி வருகின்றது. மேலும் தொல்காப்பியம், சங்க இலக்கியங்கள் போன்றன இசைவடிவமாகக் கிடைக்கின்றன. இவை மாணவர்களுக்குப் பெருத்த பயன் அளிப்பனவாகும்.
இவ்வகையில் இயல்தமிழின் ஆற்றலுக்கு இணையம் சிறப்போடு தன்னால் ஆன உதவிகளைச் செய்து வருகின்றது. இதன் வழியே சென்றால் தமிழின் பெருமையும் தகைமையும் கூடும் என்பதில் ஐயமில்லை.
இசைத்தமிழ்
தமிழிசை என்பது தற்போது தேய்ந்து வரும் சூழலாக உள்ளது. இதனை மீட்டெடுக்கும் முயற்சியாக தமிழிசை இணையதளங்கள் விளங்குகின்றன. குறிப்பாக சைவத் திருமுறைகள் கற்பிக்கும்போது இத்தளங்கள் மிகவும் உதவுகின்றன. ஆசிரியருக்குப் பாடத் தெரியவில்லை என்ற குறையை இவை போக்குகின்றன. மேலும் மாணவர்களுக்கு உண்மையான தமிழிசையின் மாண்புகளை இவை அறிவிக்கின்றன.
தமிழ்ச்சங்கம்.பிளாக்ஸ்பாட். காம் இசைத்தமிழ்ப் பற்றிய பல தகவல்களை அளிப்பதாக உள்ளது. ஓதுவார்.காம் என்ற தளம் பல திருமுறை ஓதுவார்களின் பாடல்களைத் தக்கப் பின்னணி இசையுடன் வழங்கி வருகின்றது. இது கௌமாரம். காம் என்ற இணையதளத்தின் இணைப்பில் உருவானதாகும். கௌமாரம்.காம் என்ற தளம் மிக்கப் பயனுடையது. கந்தன் குறித்தப் பனுவல்கள் அனைத்தும் இதனுள் கிடைக்கின்றன. இசைவடிவம், எழுத்து வடிவம், காட்சி வடிவம் எனப் பல இதன் வழியில் கிடைக்கின்றன.
முதுசொம்இசையரங்கு என்ற தளம் தமிழிசைப்பாடல்கள் கொண்ட இணையதளங்களின் பெயர்களைத் தரும் தொகுப்புத் தளமாக விளங்குகிறது.
தமிழிசை மும்முர்த்திகள், அருணாசல கவிராயர் போன்றோரின் பாடல்களை ஒலிபரப்பும் தளங்கள் கூட உள்ளன.
இதுதவிர தற்போது திரைஇசைப்பாடல்களும் பாடப்பகுதிகளா அமைந்துவருகின்றன. அவ்வகையில் திரையிசைப்பாடல்களைக் கேட்க ஓசை.காம், தேனிசை.காம் போன்றன உள்ளன. இத்தளங்கள் வழியாக பாரதியார் பாடல்கள், பாரதிதாசன் பாடல்கள், பட்டுக்கோட்டை பாடல்கள், சுரதா பாடல்கள் போன்றவற்றைப் பதிவிறக்கம் செய்து ஒலிபரப்ப இயலும்.
இவற்றின் அடிப்படையில் இணைய வானொலி ஒன்றைப் புதியதாக மாணவர்கள் கூட உருவாக்க முடியும்.
இவை தவிர நாட்டுப்புற இசை, பக்தி இசை, பாரதியார்பாடல்கள் போன்றனவற்றைத் தரும் இணையதளங்களும் உள்ளன.
இவ்வாறு இசைத்தமிழ் மேன்மைபட பல இணையதளங்கள் உதவி வருகின்றன.
நாடகத்தமிழ்
தமிழ் இலக்கிய வரலாற்றில் எவ்வாறு தமிழநாடகத்தின் இடம் சுருங்கிக்கிடக்கிறதோ அதுபோலவே இணைய உலகத்திலும் இதன் பக்கங்கள் குறைவாகவே உள்ளன. இதன் இடத்தைக் குறும்படங்கள் எடுத்துக் கொண்டுள்ளன. குறும்படங்கள் தமிழில் அதிகமாக வெளிவரத்தொடங்கியுள்ளன. இவற்றின் ஒட்டு மொத்த சேமிப்புக் கூடமாக தமிழ்ஸ்டுடியோ.காம் விளங்குகின்றது. கூத்தரங்கம் என்ற ஒரு தளம் இலங்கையின் நாடக முயற்சிகளை வெளியுலகிற்கு அளிக்கின்றது.
கௌமாரத்தில் கந்தபுராணக் காட்சிகள் காட்டப் பெறுகின்றன. இவை நாடகப்பாங்கிற்கு உதவுகின்றன. தமிழ் இணையப்பல்கலைக்கழகத்தின் பாடத்திட்டம் ஓரளவிற்கு பிளாஷ் பிளேயரில் ஓடக்கூடிய அசைபடங்களை உருவாக்கிப் பாடம் சொல்லும் முயற்சியைக் கையாண்டு வருகின்றது. சிலப்பதிகாரம் இவற்றுள் சிறப்பு வாய்ந்ததாக உள்ளது.
இவ்வாறு பல நிலைகளில் தமிழ் இணையதளங்கள் தமிழ்க்கற்பிப்பு முயற்சிக்கு உறுதுணையாக நின்று விளங்கி வருகின்றன. இவற்றின் பெருக்கம் தமிழ்ப் படிப்போரை ஊக்குவிக்கும் என்பதில் ஐயமில்லை.
முடிவுகள்
முத்தமிழைப் பரப்பும் வகையில் இணையத் தளங்கள் பல செயல்பட்டு வருகின்றன.
தனிமனித உழைப்பு, நிறுவன உழைப்பு என்ற இரு நிலையிலும் இச்செயல்பாடுகள் நடைபெற்றுவருகின்றன.
இயல் தமிழைப் பொறுத்தவரையில் இதற்கே முத்தமிழில் மிக முக்கிய இடம் இருக்கின்றது. வளர்ச்சியிலும் இதுவே இணைய நிலையில் சிறப்பிடம் பெறுகிறது.
நூலகங்கள், தேடும் வசதிகள் போன்றன கொண்ட இயல்தமிழ்ச்சேவை தமிழ் மாணவர்களுக்குப் பயன்மிக்கது.
இசைத்தமிழில் பெரும்பாலும் சைவம் சார்ந்த பாடல்கள் அதிக அளவில் காணப்படுகின்றன. மற்ற சமயங்கள் குறித்த இசைப்பக்கங்கள் வரவேண்டும்.
கௌமாரம் . காம் குறிக்கத்தக்க பணியை இசைத்தமிழுக்குச் செய்துவருகிறது.
நாடகத்தமிழுக்கு ஓரளவிற்கே பங்களிப்பை இணையப்பக்கங்கள் செய்துவருகின்றன.
* manidalblogspot.com, muppalam2006@gmail.com.
--